在我小時候，家母唔鼓勵我勤力讀書，佢話考第一的壓力很大，高處不勝寒，不但要很勤力才可以保住第一位，而且在畢業後入大學或者到社會工作的壓力仲大，如果入唔到好大學或者搵唔到一份好工，就會被人笑住講，考第一又點樣，都唔可以入到好大學，如果成績在中上，壓力反而冇咁大，課餘又可以享受生活，點解要咁辛苦讀書，起舞弄清影，何似在人間，萬一唔覺意入到名牌大學，就可以向前列學兄耀武揚威。

其實我阿媽理論是錯的，不過，她知道我是懶人一名，如果強逼我讀書，就會剝削我的童年，所以講反話來安慰我。不過，她亦有要求，最少有一兩科是出類拔萃。

新加坡總理李顯龍卸任，記得李顯龍二十年前就任新加坡總理時，中國副總理吳儀向佢祝賀，李顯龍答了一句，高處不勝寒。老實說，新加坡是一個小國，當時人口二百多萬，國內政治形勢明朗，根本不存在甚麼高處不勝寒，但李顯龍真係叻，可以將新加坡搞到有聲有色，不但在世界很多排名都處於前列位置，甚至排首位，在金融方面，更加將香港的位置取代，紐倫坡代替紐倫港，現在新加坡已經在世界之巔，接任總理黃循財將會領略到甚麼是高處不勝寒。

在上任之前，有外媒問黃循財，如果中美爭拗，他會選哪一邊？他話，既不親美，亦不親中，以利益為先，這個答案好似阿爺面對兩個孫仔爭寵，阿爺話兩個都唔錫，睇吓邊個最錫阿爺。如果新加坡是阿爺，這個答案就冇問題，可惜新加坡是孫仔，這個答案就有所斟酌。現在是阿爺同阿嫲問孫仔錫邊個多啲，孫仔話兩個都唔錫，邊個畀最多利益給佢就錫邊個，這個答案大家都唔會認同，對於一個小國或者小孩來說，唔選邊站比選邊站更危險。

其實，新加坡人最能感受到甚麼是高處不勝寒，根據一項訪問了接近四千人的調查，有六成一新加坡人打算移民海外，地點分別是澳洲、馬來西亞、日本、英國及美國，主要原因是新加坡生活水平太高，令人有高處不勝寒感覺。

香港近日甚麼也被新加坡比下去，我覺得人們對香港要求太高，復活節假期來港人士減少，又話香港沒有特色；股市下跌，又話資金撤離，連貨櫃碼頭都攞嚟講。其實，香港好似少年的我，千祈唔好渴望甚麼都可以做到最好，只希望有幾樣嘢做得好就夠啦，搞好金融，資金可以自由進出，盡量吸引多些公司到香港上市；旅遊則化整為零，搞多一些地區性活動，例如長洲飄色、天后火龍等，唔好同新加坡比較，自己力求進步便可以，香港人可以享受生活，唔需要移民，起舞弄清影，何似在人間。