以作品說話，盡顯真章，實力多少，有目共睹。

33歲無綫小生阮浩棕，去年一口氣憑三部劇集《隱形戰隊》、《隱門》、《靈戲逼人》盡得人氣和讚賞。網民留言，永遠是最能反映真實民情及評價，阮浩棕是無綫力捧的上位小生中，正評超高，近年難得一見。

綜合網上留言，幾乎是清一色力讚阮浩棕才貎兼備：靚仔、不造作、形象正氣、演技好具層次、親民度高，還有海量的鼓勵，替他打氣加油外，更有部份網民指近年始知他是已入行十年的「星三代」：香港電視史上首位女演員兼首代新聞之花「上等人」梁舜燕是他的嫲嫲，見證香港電視風雲的著名電視製作人阮惠源，是他的爸爸。

本為經濟系高材生的阮浩棕，放棄可在銀行界一飛衝天的機會，忠於熱愛，選擇投身演藝界，十年來為不想毀掉家族榮耀，投入的個人努力及心血，更要比其他人多；即使現在事業穩步上揚，觀眾的掌聲愈來愈響亮，但他最想聽到的，是爸爸的肯定及讚美，勝過千言萬語。

「我好想有一日，聽到爸爸真係讚賞，同我講：『You've done a good job.」阮浩棕說。

「我眼中嘅爸爸，係好耿直、做嘢認真、唔係好識氹人。以前同爸爸嘅關係，唔係好緊密，因為佢早年有好大段時間唔要到內地工作。我同爸爸嘅關係，係由理解，演變為了解同尊重。」阮浩棕說。

阮惠源是圈中無人不曉、資歷深厚的電視製作人，先後效力無綫、麗的及亞視，見證香港電視風雲，曾擔任編導、導演、監製及製作人，作品括《風塵三俠》、《浴血太平山》、《天靈》、《四大名捕重出江湖》、《生命有明天》等，早年他被力邀參與內地劇集製作，作品包括林峯主演的《大漢賢後衛子夫》等。

「我細個時，因為爸爸長期喺內地工作，一年最多有三個月喺香港，變相好少時間相處，由我細個直到開始懂事，爸爸都唔喺身邊，冇辦法，佢要賺錢養家，唔係唔理我哋，奈何因為見得好少，關係唔係特別好。就算我愛我爸爸，我知道佢都愛我，但係大家都唔識得去表達。」

「細個都有去內地探爸爸一、兩次，知道佢做監製，就算探班時見到國家級演員，都唔覺得爸爸有幾勁。直至入行後，好多前輩都會同我講爸爸嘅嘢，有次德哥（監製潘嘉德）話：『你阿爸係好勁嘅製作人！』先知原來爸爸咁勁。」

2017年，阮浩棕當時約滿無綫，選擇北上發展，擴闊眼界，演技增值，最大收獲，和爸爸的關係大躍進。憶當年爸爸孤單的背影，淚盈於睫，終於在眼淚中明白，爸爸拋下家人北上發展的不易，更是以孤單，來換取幸福及安穩給家人。

「我跟爸爸去內地工作，媽媽同爸爸講：『由細到大，你都冇睇過個仔嘅，依家交畀你還債，你睇住佢嘞！』最深感受，係我同爸爸一齊飛去北京，臨上機前嗰刻。爸爸拖住行李喺我前面行，我望住佢個背影，突然好感觸。我喺度諗，當刻我孑然一身，冇家庭壓力去北京做嘢，去到可以做乜、有乜機會，我乜都未知，有好多猶豫，好大壓力。但係我有爸爸喺前面，有佢照顧我。」

「但爸爸呢？佢之前咁多年，只係自己一個北上工作，要擺低老婆同兩個仔，一個人去捱，佢都會面對好多問題，唔知會唔會成功，但係一定要養家，嗰份壓力真係好大。其實佢真係好錫我哋，如果有得選擇，佢未必會去，犧牲咗見證子女嘅長大。嗰刻爸爸嘅背影，我影低咗，呢個畫面，我想永遠都記得。」

「好多人話爸爸係仔女嘅英雄，直至我睇住佢背影嗰刻，我感受到爸爸真係英雄，如果唔係爸爸嘅付出同犧牲，我點樣長大？聽過好多人北上嘅故事，婚姻未必維繫到，但係我爸爸媽媽維繫到，就係靠一個要收錢嘅長途電話，當時唔係好似依家咁方便，可以隨時聯絡，爸爸係我榜樣！」

爸爸是資深製作人，其評價當然專業及實用，阮浩棕說初入行時，未有全盤接受外，爸爸有次無心的狠批：「戲屎！」，令他陷入崩潰，心如刀割，直至今日說起，也是隱隱作痛，不禁爆淚。

「初入行時，訓練班嘅成績唔錯，又覺得自己嘅表現ok，但爸爸會以幕後嘅角度去睇，會批評我演技例如唔使咁用力，當時我會覺得：『咩呀？你又唔係做演員，你做幕後之嘛，你邊度識啫！』。之後開始明白佢嘅說話，係我以前嘅層次未去到佢嘅位，所以完全聽唔明，如果我初時識得聽，可能條路會順暢好多。」

「早幾個月，媽媽同人講電話時，我喺隔離講咗句佢唔係好啱聽嘅說話，佢收線之後話我，我有少少駁嘴，爸爸護妻深切衝過嚟，鬧得我好緊要，期間佢衝口而出話我嘅戲屎，我忍唔住返房喊！雖然知佢無心，但係好痛。我唔係怪爸爸，嗰刻係我衰，鬧我係應該，只係我冇諗過，佢咁講，我係會咁傷。」

「爸爸係個好成功嘅製作人，佢對我嘅評價好重要，甚至我想得到佢嘅讚賞，係迫使我進步好大嘅動力。但佢呢句說話，我承受唔到，嗰刻我先知道爸爸喺我心入面嘅地位有幾高，我真係好想佢衷心讚我一句。好似舊年有幾部作品出街，我成日望住爸爸睇我作品時嘅表情，佢話：『開始有啲嘢睇嘞！』或『ok啦！』我係好想有一日，佢真係讚賞咁話：『You've done a good job.』」

「我爸爸係好直接嘅人，鬧完就冇嘢，唔識氹人，例如嗰張背影相，我喺社交平台分享，留言話『爸爸有你真好，爸爸好偉大』。我畀佢睇，我期待嘅反應，係佢會拍一拍我話：『你知就得啦！』，但佢嘅反應係：『 我係咪要感動到喊？』，激死，哈哈！」

「我係幾傳統，覺得家人係好緊要，因為一家三代都係呢行發展，嫲嫲係五十、六十年代開始最犀利嘅藝人，我爸爸嘅作品都有高光時刻，我係好有責任要有好嘅作品畀大家睇到。」

「嫲嫲以前成日讚我，我唔識得氹佢開心咁話：『係呀，我係你個孫梗係做得好』，依家嫲嫲唔喺度，我再聽唔到佢讚我嘞。嫲嫲嘅身份地位，我唔可以丟佢假，更加要做得好。」

阮浩棕雖說和父親的性格一樣，不懂主動氹人開心，但他有時會主動來個「父子的浪漫」，例如攬着父親突襲強吻，而爸爸送給他的人生首枚手錶，珍藏至今，因永遠記得那股滿足及快樂。
其實阮爸爸的心也很軟，愛在心裏，只是不說出來，阮浩棕分享的數張童年照，原來是阮爸爸早年孤身北上時一直隨身帶着，給他無數的安慰和動力。阮浩棕更說從來未被爸爸體罰，是跟他曾病危至命懸一線有關。

「爸爸從來冇打過我一下，之前以為佢見得我少，冇機會打我，就算我用支熒光筆劃花屋企啲傢俬都冇事。直到我廿幾歲時，爸爸先至同我講，話我出世時九成夭折，因為有嚴重肺炎，當時爸爸望住瞓喺氧氣箱嘅我，許下誓言：『你乖，快啲好番！我應承你，呢世都唔會打你。』」

「早幾年爸爸有突發心臟病，我開始覺得爸爸真係老嘞！佢心口痛入急症室，雖然初時入到醫院佢仲識講笑，但之後我聽到醫院廣播，話有緊急病人，原來係指塞咗九成血管嘅爸爸，我喺手術室出面，等爸爸完成手術嘅時候，係非常恐懼。」

爸爸不要老。近年和阮爸爸漸行漸近的阮浩棕，希望爸爸永遠健康快樂，最享受是看着升呢當爺爺的爸爸，抱着哥哥的兒子時，甜如蜜的笑容，你快樂，所以我快樂。阮浩棕日夕回味那份純粹樸淨的快樂，也是因為阮爸爸。

「我人生第一隻錶，係我讀小學時，爸爸帶我去買，當時真係好開心，每日帶住返學覺得好威水。每當見到呢隻錶，就好想有日我事業有成，可以買一隻靚錶送畀佢，就好似我當日戴住呢隻錶一樣咁開心。」

手錶珍藏至今，阮浩棕珍而重之，因手錶記載不朽的意義；有一句話，阮浩棕也是藏於心底至今，情深說話未曾講，今日是父親節，藉着這天說愛你。阮浩棕說：「老竇，I love you！I hope I make you proud.」

阮浩棕矢志有一天阮爸爸以他為傲，或許阮浩棕不知道的是，其實他過下十年憑自己，刻苦耐勞下，闖出自己的路，阮爸爸一一看在眼裏，為他心疼，為他高興，也早早以他為傲感自豪。