錯過一些人，一些事，一些情，遺憾，不是告訴我們有多錯有多不好；遺憾是提醒我們可以做得更加好，且行且珍惜。

陶大宇，在還是懵懵懂懂、少年不識愁滋味之時，得到人生最大的遺憾，陶爸爸踏上天國的階梯，因癌症溘然而逝，父子情緣，僅18年。

陶爸爸未能陪伴與見證陶大宇一飛衝天成大器，縱使贏得數不清的讚美與掌聲，始終還是陶爸爸的掌聲，對陶大宇來說，才是最動人。

猶幸，在上天巧妙的安排下，陶爸爸在告別塵世前，聽到陶大宇說了一番最動人的話，讓陶爸爸在痛苦及擔憂中，安然釋懷，了無牽掛的走到人生的終章。

父親節前夕，陶大宇以僅存的一張父子合照，訴說父子間充滿淚與笑的難忘點滴。

「係遺憾，點解唔可以畀老竇喺電視機睇到我？見到個仔喺幕前做戲，相信佢會幾開心！點解冇機會同老竇去旅行、畀佢享受吓？」陶大宇說。

陶爸爸，名為陶大偉，語文水平超高，精通中英雙語，昔日是負責《讀者文摘》翻譯中文版的文案工作。1982年的暑假，正在做暑期工的陶大宇只是18歲，打算報讀無綫藝員訓練班時，陶爸爸確診患癌。有一天，陶大宇心血來潮，送信給留醫中的陶爸爸，怎料是生離死別的場面，送陶爸爸最後一程。

「我覺得個天好得意，唔知係咪刻意安排，令到我可以見到老竇最後一面。當時我係做暑期工，有一日食完飯『吞POP』，突然醒起，老竇話我得閒就去尖沙咀開佢個私人信箱，如果有信就拎去醫院畀佢，其實當時佢嘅情況已經好差。當日我見到有信，就拎去醫院。」

「好似拍戲咁，一去到醫院，一推開門，就見到媽媽捉住老竇隻手喊，老竇唞氣好辛苦，好急促，我係睇住佢慢慢咁走。喺佢臨走前，我喺佢耳邊講：『老竇，你放心走，我一定會用盡我能力去照顧媽媽。』我覺得好似上天安排咗一個責任同任務畀我，咁多兄弟姐妹，只係得我一個，見到老竇最後一面，好似一場宿命。」

陶大宇握着陶爸爸的手，目送他走過人生的終章，此情此景，至今歷歷在目。上天還給他一個試煉，就是同一天內，早上陶爸爸出殯，下午陶大宇一身素服接受訓練班面試。父親離逝三個月後，姐姐因不堪抑鬱症的折磨而輕生，對於當時只有18歲的陶大宇，百般滋味。

「送老竇最後一程要上山，上完山，下午就要去浸會（現為香港浸會大學）考藝訓班。去考時，我仲係一身白衫白褲白鞋，當時細個戇居居，唔識得去換番套衫先至去。我好記得，工作人員叫我企喺個T字位，我行到去，拎住個劇本亂咁噏，因為當時都冇心機。三個月後輪到我家姐，當年冇抑鬱症嗰類嘅資訊，冇得到好好嘅治療，唔係話身邊人唔錫佢，而係唔知道點去處理。」

陶大宇投考藝訓班，本來一心想子女們安穩地打寫字樓工的陶爸爸，卻沒有極力反對，還代筆填寫報名表，也許當時他得知患癌，不知剩下幾許時日，希望在最後的時光，替兒子爭取機會，字字盡寄盼望與情義。

「老竇係好有學識嘅讀書人，佢手字係好靚，所謂『見字如見人』，以前去見工，係先睇你寫嘅求職信，如果手字污浬馬查，老闆睇到都唔想請啦！我手字唔靚，係老竇幫我填訓練班表格。老竇知我讀唔到書，勉強冇幸福，同埋佢知道有癌症後，都冇乜心機去理我哋。當時我乜都唔識，諗嘢好單純，資訊又唔發達，聽到老竇有病，只會覺得：『有病就去醫囉！』唔同依家，聽到傷風咳都會驚會去注意。只係估唔到，由老竇發現有癌症，直到離開呢個世界，全程只係大約五個多月。」

在陶大宇心目中，陶爸爸既是一位受人尊敬的學者，也是很有威嚴但開明的父親：讀書有時，玩樂有時，教育佻皮愛動的陶大宇，時放時收，更是笑料百出，完全可以列入「激死老竇」系列。陶大宇至今難忘和父親的「星期Two對話」，每次提起，不禁哈哈大笑。

「老竇好犀利，喺我心目中係一個學者，知識水平好高，好有威嚴，但佢唔會打你，佢嘅氣場，令我哋肅然起敬。老竇打幾份工好忙，好少同我哋傾偈，只係陪吓做功課，一齊睇吓電視。一見我哋睇電視聽溫拿樂隊唱歌，佢就會鬧話要轉台！佢唔係憎溫拿，而係佢覺得做咩要睇中文台？睇明珠台學英文啦！佢話：『我唔係唔畀你哋睇電視，睇英文台啦！』」

「記得當時讀完中一、中二，我連星期一至星期日嘅英文都唔識！你話老竇㷫唔㷫吖？供書教學，咁都唔識，畀你都㷫啦！點解穿煲老竇會知？因為平時老竇叫我攞幾本《讀者文摘》畀同學睇，有次我話想攞『星期Two』嗰期，老竇聽到火都嚟：『Tuesday就Tuesday啦！乜嘢星期Two啫？』跟住反問星期三嘅英文係乜？我答星期Three囉！㷫到我老竇當我係電腦咁重頭boot一次，成日mon住我問我英文。」

「當時我只係識玩，覺得僅僅合格，升到班就得。老竇又唔至於唔畀玩，佢見我成日出去打籃球，都只係話做好功課先至玩。當時生活困難，老竇一個人養成頭家，生活壓力好大，除咗做《讀者文摘》，仲要做兼職，又要睇住我同阿哥，如果得我一粒仔，我仲可以『星期Two』？諗起都幾好笑，真係激死我老竇！」

雖然陶爸爸要為口奔馳，但總會爭取和子女們共享天倫的時光，打字機的聲音，是陶大宇至今難忘：「同老竇相處嘅畫面，就算我依家攞埋綠悠卡，都一樣記得。」

「老竇最多係假日帶我哋去飲茶，因為佢星期一至五唔得閒，最記得係每晚老竇打字嘅聲音，瞓住覺聽住打字機『嗒嘞嗒嘞』嘅聲，我係咁樣聽大。有時凌晨我去洗手間，老竇咁啱打剩最後一個英文字，就叫我過嚟打埋最後一個字母，『嗒』一聲打完，佢就好開心咁笑。呢一刻，我仲記得。」

「有時老竇都會同我玩，例如去街飲茶，明明拖住我，但突然間唔見咗人，原來老竇同阿媽匿埋柱後嚟嚇我，等我喊到最勁嘅時，就撲返出嚟。」

「好記得有一次，係我求咗好耐，老竇先至肯買套玩具火車畀我。我同阿哥又拆又砌，點知架火車失靈，唔識得『嗚嗚』聲響，老竇整極都整唔到，赤腳踩爛。佢嬲在點解玩到咁，個家已經唔夠錢使，仲拎錢出嚟買火車畀你哋，玩一日都冇，就搞軭晒！」

潔身自愛，回饋社會，是陶爸爸對子女最大的期盼。一些生活上的小習慣，甚至做人的態度，陶爸爸的忠告與身教，也影響陶大宇至今。

「老竇成日話，唔好學壞，唔好吸毒，要讀好啲書，有好多嘢都唔需要刻意去教，例如責任感。雖然我讀唔到書成日掛住玩，但由幼稚園到中學，我從來未試過走堂，我寧願上堂瞓，都唔會走堂。」

「老竇話做人要有手尾，例如攞剪甲鉗用，老竇會問：『點解你識去某個位攞剪甲鉗？就係因為要有手尾。』影響到我依家，幾攰都好，都要將啲嘢放返去原位。」

「喺老竇身上，係有啲啟蒙。佢買咗對皮鞋，唔捨得即刻着，話去飲或過年先着，結果對鞋，係到佢走時，都冇着過，最後係燒埋畀佢。所以我覺得，一日你唔去食，唔去用，嗰樣嘢始終唔係屬於你。」

陶爸爸對子女嚴厲，但對陶媽媽盡是體貼，不言不語也可以溫柔。自結婚以來，陶媽媽只是專心照顧子女，不用工作，錢包永遠滿滿，陶爸爸總會自動補給。夫妻緣盡，照顧陶媽媽的責任，落在陶大宇及哥哥身上。

現年94歲的陶媽媽從未做過獨居老人，一直是和兒子同一屋簷下。要照顧老友記，是一門學問，要有相當的理解和寬容，陶大宇直言，從未想過安排媽媽入住護老院，尤其媽媽一天比一天的老，他只想好好珍惜相處的時光，盡最大的努力，給媽媽享受快樂無憂的晚年。

「我好感謝哥哥，我初入行時，係住哥哥屋企，月薪都係得2千幾，後來我有咗成績，搵到錢有能力，就由我接棒照顧媽媽，唔係哥哥放棄，而係點都應該輪到我！同媽媽一齊住咁多年，已經成為習慣。媽媽後生時可以去打麻雀、去旅行、去飲茶，依家佢啲朋友走晒，自己又打唔到麻雀，去唔到旅行，佢都辛苦。」

「我最感恩，係媽媽依家行得食得瞓得，雖然眼又矇耳又聾，畢竟都九十幾歲，你仲想要佢點？佢變咗細路女咁，有時狀態好就笑吓，唔好就會忟。有時同佢一齊睇電視，問佢今晚食菜芯定椰菜，佢睇住電視冇反應，聽唔到你講乜。我唔會勉強，但會好唔開心，好唔安樂，因為嗰吓真係話我聽：『阿媽真係老。』」

「照顧媽媽嘅同時，我都係不斷學習。依家我會由得佢發脾氣或拒絕我，我想佢舒服。唔想食，好，唔好食，唔鍾意做，就唔好做。媽媽成日都話多謝我哋，否則一早走咗，佢又會話：『我夠㗎嘞！成日麻煩到你哋！我都唔知點解自己咁長命嘅？』初時聽到我會忟，你講乜嘢呀？依家我由佢講，佢講完自己舒服就得。佢喜歡食隔夜餸，我唔喺屋企，佢會將條蒸魚分三餐食，老人家就係咁。趁佢唔知時扔晒隔夜餸，因為畀佢見到你扔，佢又唔開心。」

「身邊好多朋友都叫我送媽媽去護老院，話有卡啦OK唱、又有人氣、食飯又定時、又有人睇住，但係我知我媽性格，佢唔鍾意，呢幾十年嚟習慣咗一個人，反而叫佢去學嘢仲皺晒眉頭，要喺咁有人氣嘅環境生活，仲唔習慣，加上我自細都同佢一齊住，就算同一間屋，都會畀空間，你有你，我有我，起碼我都可以睇到佢，佢都會開心。」

「我相信有啲年青人對老人家冇乜耐性，但我覺得點都要儘量包容，老土講句，就算將來燒飛機大炮都冇用，生前孝順先至有用。咁辛苦生你出嚟，最後日子反而唔理佢？」

樹欲靜而風不息，子欲養而親不在。是時間錯了，即使陶大宇想好好的向陶爸爸報答盡孝，苦無機會，也就是這個遺憾，令他對媽媽更悉心照顧，延續陶爸爸的愛，守着跟陶爸爸的承諾，填補遺憾。如果真的有平行時空，有一天再見陶爸爸，陶大宇會跟他說什麼？

「可以再見嘅話，我會畀老竇多啲享受，因為佢真係辛苦咗幾十年，佢喺我心目中，係從來未享受過。如果見到老竇，我會同佢講：咁耐冇見，希望認得我啦！希望見到成長嘅我，畀返一啲安慰你！你個仔都唔曳㗎！雖然讀唔到書，但係以做仔嘅角色，係做足咗㗎嘞！我冇令你失禮！」