發佈時間：20:42 2024-06-21
曾代表香港參加三項鐵人賽的「亞洲猛男」崔錦棠，近年憑《愛‧回家之開心速遞》中的「接龍劉德華Andy」一角而人氣急升。在劇中常以「接龍花生友」姿態出現，令《愛》劇生色不少的崔錦棠，在現實生活中是一名虔誠的基督徒，日前首次busking街頭表演，實行以「Andy好聲音」來宣揚福音。
加入「藝人之家」多年的崔錦棠，日前和「東張女神」「貓仔」黎寬怡、淡出幕出多年的翟佩雲等，聯同永恒音樂事工（Eternity Music Ministry）及播道會同福九龍東堂的代表，在觀塘自由空間進行街頭佈道。在超過30度的氣溫下，崔錦棠大汗叠細汗的高唱《上帝聽禱告》等曲，完全未有因炎熱的天氣而怠慢。
崔錦棠接受東周網訪問，笑言在今次Busking前數天，刻意少說話及食八仙果來養聲，就連綵排都是保持有限次數。他說：「因為之前生日，唱咗好多日K，搞到把聲『拆』晒，因為首歌啲高音位都幾高，我曾經被懷疑係咪唱到。同埋我以前係聽開張崇德張崇基嘅版本，原來係同原裝歌詞有出入，所以要再練過。喺Busking當日，因為音響方面有問題，但都有琴手現場彈。」
崔錦棠說演唱當天，都被不少途人認出並停下欣賞，他更大讚「貓仔」黎寬怡非常主動，全程鍥而不捨地向途人派發福音傳單，完全不怕「食檸檬」。
自言自小是基督徒的崔錦棠，說大約在七、八年前，因拍劇關係而認識陳康健，並在對方介紹下返「藝人之家」。「返咗第一次之後，我冇再返，因為怕人哋以為我返『藝人之家』係想埋堆。」崔錦棠說。
未幾「埋堆」這想法有所改變，隨着之後的疫情大爆發，面對事業及前途的不安全感，令崔錦棠開始覺得「藝人之家」是其找到安慰的「靠山」。
「由以前喺有線講波，到轉型去無綫拍劇，條路係充滿未知同唔易行。有人同我講，雖然第一套劇《實習天使》係有角色名，但之後唔代表一定有角色，隨時做路人甲乙丙。我拍咗幾部之後，開始冇乜角色，加上疫情，我又唔係簽咗包騷，又要養兩個小朋友，收入少，真係好徬徨，個人好脆弱，前路茫茫。」
「當時係陳康健帶我返『藝人之家』，疫情期間靠視像，參與得多，開始覺得喺逆境中搵到靠山。我相信，上帝畀得我嘅，我都可以承受，即係一日未死，我都可以向前行。呢幾年一路前行，我好感恩，例如有『接龍劉德華』呢個角色，多咗人認識我，我又做返教練教長跑、多咗學生。好多嘢我冇諗過，都係神畀我。」
崔錦棠說希望以身體作見證，日後可以做多點侍奉。「今次以唱歌嚟傳福音，因為我平時係靠聽聖經，唔係睇，唔會好似其他人咁，可以朗朗上口咁講到金句或福音。人人能力唔同，我選擇用唱歌嚟表達。」
身為前香港三項鐵人代表隊成員的崔錦棠，忙於拍劇及當教練教學生外，同時要抽時間操練，因要準備今年九月於台灣舉行的《常青田徑國際錦標賽》中400米跨欄賽外，明年也會參加多個大賽。從運動中悟出豁達，更是切實地以身體作見證。
