我睇到一篇文章，話日本有錢人有四個特徵，包括保持運動習慣，不盲目追求流行，重視人際關係，不吝嗇為別人花錢。最後發覺文章指出有百分之四十二日本有錢人喜歡穿Uniqlo，原來是廣告一則。

當我仲好細時候，阿媽同我講，如果要做一個有錢人，必定要養成四個壞習慣，其實，這四個習慣是非常好，不過世事就是如此，好習慣是養唔成，壞習慣才可以養成，所以，一定要以壞習慣心態對待，才可以養成這四個習慣。

首先是非常準時，有早冇遲，經過多年之後，我識得的有錢朋友，每一位都非常準時，唔單止約會，做生意也是一樣，交貨準時，付款準時，對銀行還款亦非常準時。很多人以為準時很蠢，自己準時，其他人未到，豈不是很蝕底，遲些少交租，業主都唔會嘈，咁樣就賺了利息，少數怕長計。準時在某些人來說是一個壞習慣，但是他們唔知道，準時是信譽之本，人無信不立。

有一日，我見到一個經常請我食鮑參翅肚的有錢佬一個人在茶餐廳食五十元的午餐，佢問我是否很奇怪，我話絕不出奇，有錢人另一個壞習慣，就是孤寒自己，闊佬別人，一個人食碗雲吞麵，食個茶餐又是一餐，但請客一定菜式豐富，唔會令客人覺得被冷待，如果自己食飯時鮑參翅肚，但請客就孤孤寒寒，那些人唔會是有錢人。所以，名牌食肆見到有錢佬獨自食飯，是不會介紹貴價菜式；反之，如果伙記介紹鮑參翅肚，其實是睇唔起那個人。

有人話，有錢佬大多數着名牌、開名車、戴名錶，驚死冇人知他們是有錢人，其實，那些人是誤會了，貴買平用是有錢佬另一個壞習慣，做到有錢佬一定識計數，如果買了名錶唔戴，有名車唔開，最後計數是最貴，越用得多，那件名牌物品越平，唔係演嘢咁簡單。所以，大家見到那些名媛攞住個名牌包包去買餸，去湊女放學，千祈唔好大驚小怪，話她們演嘢，她們貴買平用而已。

有錢佬第四個壞習慣是保護性質，就是不貪小便宜，因為很多時在小便宜之後，對方是有要求。例如有人送了一份禮物畀有錢佬，隨之而來就是問有錢佬是否喜歡那件禮物，繼而問有錢佬可不可以介紹他們的子女入名校、入馬會，咁就很麻煩。所以，有錢佬是不會拆那件禮物，當送禮的人來訪，見到他送的禮物仍未拆，就知道有錢佬是不會答應他的要求。如果貪小便宜拆了那些禮物，例如一隻名錶，仲話非常喜歡，咁樣就很難推卻對方要求。