發佈時間：09:00 2025-05-25
「方丈」劉以達除了愛玩音樂，原來亦是一位模型發燒友。擁有大量珍藏的他，早前在筲箕灣玩具店TOYZONE，舉行了一場模型售賣會，先展出逾五十件由他親手砌的珍藏動漫模型，再以$100起跳的超值價，供現場粉絲認講。
當日他和太太冼美珍更親自到場打點，又跟買了模型的粉絲合照簽名「加持」，期間更化身他在電影《食神》飾演的「方丈夢遺大師」說：「我今日隨風而來，隨風而去，搞咗呢個賣模型活動，希望大家都揀到心頭好。」
短短三小時，現場所有模型幾乎全數賣出，他稱這天只出售了小部份珍藏，「因為疫情後，模型越砌越多，擺到成屋都係，今次賣走一啲，清番啲位出嚟，幫間屋瘦身減吓肥！」
簽大名加持
身穿粉紅色西裝的劉以達，這天和太太冼美珍早早到場，將模型逐一陳列好後，再貼上價錢牌。出售的珍藏當中，計有機動戰士高達、星球大戰戰機、烙印戰士和拉打幪面超人等自家砌動漫角色模型。開賣前，更用其中一隻裝上燈效的高達巴巴托司舉行亮燈，令售賣會增添儀式感。
當模型正式開售，粉絲一擁而上，手快揀到心頭好的，馬上排隊付款，劉以達逐一為模型簽名，期間又跟粉絲交流砌模型心得：「我砌模型好快㗎，咩都係自己學，所以我係比較孤單啲囉，玩模型又係，玩音樂又係，玩乜都係……係玩女人唔係囉！」方丈式的風趣話句，逗得粉絲和正在收錢的太太都哈哈大笑。
其後，他接受本刊訪問時說：「我砌咗幾十年模型，由最初馬馬虎虎，到之後慢慢研究，呢幾年就上網喺YouTube睇片自學，噴油、滲線、改裝、加燈，跟住就越砌越多。尤其係疫情期間，空閒時間比較多，那時幾日至一星期可以砌起一隻，藏量急增。今年初發覺屋企開始冇乜位，有啲擺出嚟又睇厭咗，於是就搵咗玩具店老闆Raymond幫手，搞咗呢場售賣會，價錢都定得十分相宜，希望幫啲模型搵到新主人。」
玩具店尋寶
劉以達砌模型的天份和興趣是自小培養，「4、5歲細細個時，我已好鍾意睇科幻片，無論是人扮的特撮劇集如幪面超人、鹹蛋超人，還是卡通片如BATMAN、超人等，都好沉迷去追，但嗰時屋企住彩虹邨，父母冇咁多閒錢買模型俾我玩，所以好多時我都係用泥膠或者鐵片自己整。到組成『達明一派』入咗樂壇，就開始買啲手辦模型嚟玩。不過後來專注音樂，冇再玩模型，直至20年前見到高達和烙印戰士啲模型越出越靚，於是再開始玩番。」
早年他一有空檔就去旺角、深水埗行模型舖，「旺角洗衣街、廣華街好多模型舖，仲有福利玩具店，我得閒就去。我入到去通常自己揀自己睇，唔會好應酬打招呼，揀啱就買，買完就返屋企砌。」到近年他就開始轉戰網購，「𠵱家好方便，坐喺屋企碌吓手機就買到，我玩得好雜㗎，除咗高達、星戰呢啲大路嘢，其他只要覺得外型靚、英偉嘅動漫人物模型，我都會買。」
砌模型減壓
今次劉以達出售的珍藏，只是他自家砌模型的三份一，他說：「屋企仲有好多呀，我特登造咗個模型櫃展示，有啲砌得唔滿意嘅，就放番入盒收埋佢，塵都費事抹。」
問他收藏佔據家中大量空間，有沒有被太太詐型，他笑說：「咁又冇喎，因為佢都玩埋一份，佢鍾意《飄零燕》，Hello Kitty等卡通公仔，同埋一啲vintage嘢。佢個人唔大使㗎，不過睇中一件嘢，可以頂我幾件。」但他亦不忘大讚太太，「老婆好好㗎，好多時仲幫我喺外國啲網站搵貨，一啲絕版、限量嘅都係佢幫我bid返嚟。」拍照期間更錫了老婆一啖，相當sweet！
雖然這天賣走了部份珍藏，為屋企瘦身，但劉以達笑言自己仍然享受不斷買和不斷砌，他說：「我個人思想比較複雜，有嘢做，冇嘢做都好多嘢諗，但砌模型令我可以好專注，又可以幫我減壓，同埋令我個人都變得更樂觀。」
《東周網》訪談系列節目《星桄伴我心》5月重磅嘉賓：
即睇：魯振順八級鋼琴，出過唱片，手揸兩層樓 曾割脈斷9條手筋：「我對唔住媽媽！」
即睇：陳國邦被評為「懷才不遇之星」：係咪真係去擦鞋就得？爆杜琪峰出一招教戲 再爆同周秀娜接吻感受 更爆羅敏莊曾離家出走
即睇：盧冠廷驚爆李香琴嫁盧爸做後母 再爆同李小龍秘密關係 大爆BB話御妻術：直情浪漫到嘔電
