發佈時間：18:00 2025-08-25
譚俊彥在新劇《麻雀樂團》中，飾演麻雀館揸弗人「久哥」；現實中，他一出世也摸到副好牌，有個大俠爸爸狄龍，演員媽媽陶敏明，20歲就輕易得到出道機會，對手是梅艷芳。
不過他年少無知，唔識好好把握機會。曾經想去台灣做歌手，但黑仔到遇上唱片公司被收購，要退居幕後，重頭開始。好彩他在內地再戰幕前時，終於自摸，邂逅了一生最愛、也是演員的太太任祉妍。
為了愛情，譚太放棄事業，一個女人仔，離開家鄉大連，嫁來香港。訪問這天，她低調陪同老公到場，直至說出一句：「佢喺屋企唔怕凍⋯⋯⋯」才露餡太太身份。
譚俊彥說：「我哋一齊咁耐，最感動係佢決定結婚時同我講：『呢度10幾件行李係我前半生，後半生就交俾你喇。』然後一句說話再冇講，嚟咗香港跟我。」
結婚10年，兩人育有一對子女，即使拍劇再忙，他也會唧出時間，趁放飯時飛車返屋企食飯，又會將全份糧上繳給太太管理。這種愛妻顧家好男人，
這個世代，近乎絕種。
「點樣將婚姻保鮮？我成日睇報道話happy wife, happy life，其實happy wife就stay alive，哈哈！所有嘢一凹一凸，雙方都要付出，要有共同目標行到最後。成世人流流長，可能有一刻好愛佢，好憎佢，唔想見到佢都好，最棹忌係冇感覺。」
兩公婆找到最舒服的相處方法，一直相愛，自然自摸食胡。
太太犧牲事業 嫁雞隨雞
一個和諧的家庭，需要雙方努力經營。10年前，太太毫無懸念犧牲事業嫁雞隨雞，譚俊彥也為了頭家，決定回流香港發展。
「嗰時太太陀女，我仲喺橫店，佢打嚟話我知有咗。後來阿女出世，我有陪太太入產房，但依然要喺橫店拍戲。兩邊走真係頂唔順，最後咪決定返香港囉。」
兩公婆甜蜜蜜，現年45歲的他，坦言以前不太懂得維繫，現在人大了，懂得做多一點點來冧妻。
「好似呢排阿女聽情歌，我喺後面攬住老婆唱，係唱得幾難聽㗎喇，阿女問：『你哋喺度做乜？』我話：『唔關你事。』」
他笑着笑着，自爆自小跟外婆居住，從她身上見識到傳統中國女性的持家有道，自己又唔識，解決方法就是索性將家中財政大權交給太太，「太太好縱我㗎！我忙工作就得。」
結婚10周年 戒指見證愛
今年兩人結婚10周年，去了日本奈良旅行。「見到有對情侶好開心咁喺一間戒指小店行出嚟，我咪同老婆講：『不如買多隻戒指，作為結婚10周年紀念吖。』」
他的心意，太太非常受落。她攤開左手，戴着的5隻戒指，有4隻由他送。
「我喺情人節、生日時，會唔會有儀式感？都有嘅，但世界圓㗎！好似今年生日，我忙緊傾嘢，搭正12點時，行過去望住老婆講『I love you』，佢『嗯』一聲，然後繼續低頭執相，隔了一陣先醒起咩事。老夫老妻，原來佢都會咁，我開心㗎！證明一齊過緊日子。
「我事業博得最勁嗰幾年，太太對我嘅支持無微不至，尤其係《十八年後的終極告白》好難演，成日覺得自己殺咗人，會無端端喊，佢每場戲都陪我。你諗吓，佢要照顧仔女，仲有我呢個大仔，邊有咁多時間？」
媽媽麻雀腳有張國榮、羅文、沈殿霞
背着星二代的身份，譚俊彥細細個已見盡不少猛人到家中打麻雀。
「媽咪嘅麻雀腳有哥哥（張國榮）、羅文、肥姐（沈殿霞）、林青霞等，佢哋各有風格，打得好快，我企喺後面都學到少少。好多人話見到殿堂級前輩會好驚，咁可能呢個係我優點，接觸得多，做戲比較淡定，發揮得好啲。」
他入行第一部戲，正是跟梅艷芳合作的《慌心假期》，難道壓力不大？
「我諗梅姐係第一個，亦係唯一一個令我去到現場會震嘅人，喺佢身上完全感受到阿姐嘅氣場。佢嗰時病到連起身都有問題，但唔同人講。記得佢有場戲要喺摩洛哥跑，大佬，末期（癌症）呀！佢助手攞住張凳，一cut機就要坐低。我問梅姐係咪要休息，佢話轉頭要去Atlantic City登台，佢真係想燒盡最後一滴蠟燭，貢獻俾舞台，呢啲咪天后囉。
「仲有汪明荃，𠵱家有幾多人拜神時已經企喺度，綵排又會第一個到？佢係第一個，未化妝就着高跟鞋上台綵排跳舞。我敢講佢比隔籬廿歲嗰啲跳得更好，更有魄力，呢啲咪叫阿姐囉。」
入行25年，譚俊彥試過失意買醉，也遇過不少前輩指點，好似姜大衛（John哥）、陳豪（阿Mo）、郭晉安和張艾嘉等。
「阿Mo係好好嘅榜樣，我早排攞TVB 傑出員工獎，都係以佢為目標。佢好nice，我哋放飯時會揸車返屋企見仔女。John哥就絕對係一個好對手，我哋演過父子、恩師，今次拍《麻雀樂團》又另一樣，默契好好，會傾點樣演繹角色。」
憑《換命真相》贏得視帝
譚俊彥2021年憑《換命真相》贏得視帝，早已獨當一面，以為沒有人再叫他做「狄龍個仔」？他笑一笑：「到𠵱家都有人咁叫我，呢行好講第一印象，叫得開心就繼續叫啦。俾觀眾有一個記憶點，贏咗。」
他讀廣告設計出身，卻當上演員。爸爸知道做這行辛苦，出於愛錫，到現在都反對他入行。但往往口不對心，每逢他有劇上，都會在演技上給予意見。
爸爸縱橫演藝界56年，在譚俊彥的記憶中，他是一個好認真的人。「佢唔鍾意NG，以前驚忘記對白，會用錄音帶錄好，不斷播，不斷背。如果𠵱家有戲搵佢出山拍攝，我絕對鼓勵，有啱嘅仲會介紹佢添。」
對唔住爸爸狄龍
父子情深，一切盡在不言中。例如狄龍上月前往馬來西亞領取終身成就獎，鬼馬的譚俊彥就突然現身，送上驚喜。
「我呃佢呀！嗰日我上台攬住佢，諗住錫佢，佢就好大俠作風，耍手推卻，示意：『差唔多喇，夠喇。』佢係得意嘅，要面嘅。我最開心係之後影全家福，好靚，平時好難捉到佢化妝整頭，阿媽又笑得咁開心，嗰一刻嘅喜悅好難捕捉到。」
他自覺傳承了爸爸重情義的性格，更主動澄清坊間盛傳爸爸缺席恩師張徹的喪禮，令他和姜大衛不和的傳聞。「當日爸爸喺國內工作，佢託我做譚家代表扶靈，由頭到尾我都在場，我個名都係張徹改㗎。」
能夠成為父子，是緣份。「我由細到大，最對唔住爸爸嘅係冇跟佢學武術，覺得打到隻手好痛。但命運往往係咁，到我拍《拳王》時就要打。𠵱家阿仔好鍾意空手道，打俾佢睇，彌補我個位。」
捨不得洗掉的紋身
子女是父母的心肝椗，譚俊彥有一個10歲囡囡Renee、一個8歲囝囝Rex。他清楚記得，當日由人夫變人父，抱起初生大女那一刻的感覺。
「以前成日諗要買乜嘢俾自己，原來有咗小朋友後，佢痛，你仲痛；佢喊，你都會跟住。世界會話俾你知，你再唔係最重要嗰個，我反而開心咗。」
他捲起衫袖，展示一家人早前去新加坡旅行，囡囡為他貼上的心形紋身貼紙，還有手機殼的入場識別貼紙、銀包內珍藏的子女畫作，sweet到爆。
「嗰日行雪糕博物館，阿女幫我貼㗎！沖涼都唔捨得洗，已經一個星期喇。另一個係佢第一次寫嘅『I love you』，我成日出埠，得閒就會攞出嚟睇，銀包仲有老婆嘅證件相。」
他直認爸爸狄龍後生時靚仔過韓星，囝囝亦有靚仔DNA。
「我最冇顏值，冇所謂！好開心阿仔靚仔過我，似阿媽。爸爸做演員養大我，我就做演員養大仔女，如果將來佢哋入行，support到生活，我會恭喜佢哋。」
星三代不日誕生，這副靚牌，看來會冧莊下去。
