發佈時間：18:18 2025-08-18
剛渡過47歲生日的楊思琦，育有一子一女，分別來自兩個爸爸。當年成為2001年的七料香港小姐冠軍，順理成章加入娛樂圈。翌年接拍電視劇《血薦軒轅》，邂逅李家鼎的兒子李泳豪，二人熱戀後，開展同居生活，一度達談婚論嫁階段，不過外界一直指女尊男卑，不予看好。到了2011年6月，楊思琦突然單方面宣佈跟李泳豪分手，結束九年情侶關係。翌年2012年3月8日，楊思琦在個人社交平台，發佈已誕下一名女兒的消息，但未有透露女兒爸爸的身份。不過外界一直盛傳女兒的爸爸是內地跳水運動員吳帥，但在懷孕期間，楊思琦跟吳帥分手，她毅然選擇把女兒生下來，寧願當單親媽媽也不墮胎，女兒索性跟她姓楊。
有冇諗過跟吳帥復合？
「當時媽媽同我講：『你又唔係冇能力養大BB，放心生啦！我會幫你手照顧。』得到媽媽背後咁大力支持，我就放下心頭大石，令我無後顧之憂。當時都有好多網民叫我唔好生BB出來，但我又唔識嗰啲網民，點解要聽佢哋講喎！」
（是什麼原因令你堅持要生下女兒？）「因為我鍾意小朋友，於是好順其自然就生咗出來。當時係順產，好痛，但當我抱住BB的時候，冇諗過BB係擘大對眼望實我，令到我好感動。」
有冇諗過跟吳帥復合，令女兒可以有一個完整家庭？
「都冇乜可能復合，始終兩個未必相處得到，未必咁夾。（會否覺得對女兒愧疚？）都冇辦法，可能命中注定，我要等待其他人的愛，不過之後已經遇到啦，現在我老公對個女都好照顧，個女亦都叫佢做爸爸。」
遇到生命中的真愛
幾年前楊思琦遇到生命中的真愛，選擇拉埋天窗，老公是圈中人嗎？
「佢係中國人，住喺香港，並唔係混血兒，（做乜嘢職業？ ）佢係做返自己範疇的專業人士。以前好多朋友都會安排一啲約會，等我識吓男仔，結果有一次飯局，我朋友安排咗我老公出嚟，之後慢慢熟絡咗，跟住就開始拍拖。」
當年她拋棄李泳豪，情傾吳帥，被網民插她貪慕虛榮。
「點止啊，仲有話我係大話精啦、貪錢怪啦、戀愛腦啦，其實我一直都冇強大後台背景，我只係屋邨港姐出身，我一直都習慣咗靠自己努力打拼去生活。如果我係貪慕虛榮，一當選香港小姐就嫁個有錢人啦，使捱得咁辛苦咩？」
內地發展創收入新機遇
過去10年，楊思琦都是主力在內地發展，代言廣告、商演、拍微短劇、拍電視劇、直播帶貨等等，賺到盤滿缽滿。
「事實上令我創造了收入的新機遇，我並唔係大家眼中咁地底泥咁辛酸。」
平日做直播帶貨，她不時給唱歌，由開頭唱一兩首，試過最高峰一晚唱30首歌，難怪今次整個訪問，楊思琦的聲線都帶沙啞。
澄清網民花錢聊天傳聞
有一次帶貨直播到凌晨三點，楊思琦一時感觸落淚，網友便指她搵食真艱難。更甚是直播環節中，有一個項目是網民可以花$1200跟她網聊5分鐘。
「講到我好似好cheap咁，身為港姐做乜嘢啊！其實如果真係收錢傾偈，我就唔使做啦！我要澄清，我一次要付費連線傾偈都冇做過！」
一直瞓身賺錢養家，一星期裏面，可能只能留在香港跟一對子女見面兩三天，楊思琦說，她最想親耳聽到子女跟她說我愛你。
在訪問尾聲，《東周刊》請來楊思琦的13歲女兒出場，跟她合唱《真的愛你》，也破天荒剖白這段母女情。
