發佈時間：10:00 2025-04-15
七仙羽呼籲大家行善積德，她亦以身作則，岀錢出力打救一名「人棄歌手」！今年40歲的張致恒（Steven），與老婆區燕雯（雯雯）育有4子及飼養兩隻狗，5年半的婚姻，雯雯幾乎每個月都公開數臭老公兼呻窮，嗌離婚嗌到被封「離婚KOL」；而入不敷支的Steven，就幾乎每個月都搵人打救。
眼泛淚光
向來慈悲的七仙羽，抱住「師傅愛你」的精神，於是出手相助，除為Steven繳交近萬的電費外，還購入大量奶粉及尿片，埋單4萬多元。臨離開藥房前，Steven更加碼要埋胃藥及洗潔精，並由師傅call車送他和物資返回元朗住所。為答謝師傅，Steven決定到師傅位於深水埗的佛堂做清潔，既抹地又洗廁所，兼打掃走廊，做到周身汗。在旁的師傅見Steven做到汗流浹背，立刻上前幫他抹汗，令他感動得眼泛淚光，更說師傅如同「七家姐」。此外，當師傅發現Steven的波鞋穿窿破爛後，又給他1千元買新鞋，十分慷慨！
對於Steven身陷低谷，七仙羽認為係「萬惡淫為首」，因此帶他到樓下一樓一鳳的門口，跳唱「戒淫邪歌舞」。期間，Steven按七師傅的指示，用雙手遮住下體，擺動身體高唱：「我，我要，我要你，戒淫⋯⋯」接着，Steven又平反自己冇性上癮，只係當日記者建議他睇醫生，因他和應而被標籤。不過，他就承認自己係鹹濕，當日一腳踏5船只係博愛加任性放縱，見一個愛一個，唔係玩弄感情。
心臟有病
講到家人，貧賤夫妻百事哀，每月有20日被鬧，老婆又經常在社交網放負發洩情緒，Steven笑言唔嗌唔知身體好！又話雯雯因為好絕望曾搵埋律師想離婚，最後唔捨得4子；而他就覺得家庭要齊齊整整，冇諗過離婚。他又透露，雯雯的心臟有問題，所以他凡事忍讓，亦因為一個人難以照顧4個孩子，所以一定要請工人姐姐幫忙，導致家庭開支百上加斤！
最令Steven擔心的是4個兒子，覺得新聞會影響他們的成長，幸好暫時冇被學校及家長排擠。不過，4歲多的第二仔就證實有過度活躍及自閉症，至今只係識得幾粒字，本應要趁治療黃金期前，入讀「特別班」，但每個月學費6千多元，幸獲好心人贊助了幾個月，之後便冇能力繼續，現時排隊入讀政府的特殊學校。Steven憶述二仔試過在街上失控叫囂，被途人痛斥他唔識教仔，他惟有啞子食黃連。不過，大仔見到爸爸被媽媽鬧時，就會過來攬住𠱁爸爸，令Steven大感欣慰！
Steven坦承曾自我檢討，希望戒借錢，未來搵番清楚自己人生嘅方向，希望做好自己，減少對兒子嘅影響。做咗22年娛圈，他直說都想重返幕前，希望大家俾多一次機會，又話一日未蓋棺，都唔覺自己係失敗，因為有高低起跌才算係人生，平穩會好悶，至今，Steven心中還有一份憧憬，自信靠努力，便可以令4個兒子變成富二代！
〈我要戒淫邪〉歌詞
我，我要，我要你，戒淫邪
萬惡淫為首，我要有個美好的未來
我要發達、老婆愛我、孩子愛我、
觀眾愛我、你也愛我
南無 阿彌多婆夜
哆他伽多夜 哆地夜他
阿彌利都婆毗 阿彌利哆 悉耽婆毗
阿彌唎哆 毗迦蘭帝
阿彌唎哆 毗迦蘭多
伽彌膩 伽伽那
枳多迦利 娑婆訶
我，我要，我要你，戒淫邪
延伸內容：張致恒抹唔甩地盤膚色 黑得有道理
延伸內容：揭張致恒 街頭拉電纜日賺1千蚊
延伸內容：張致恒40歲生日 雯雯照放負：死唔可怕，最緊要大家齊整
延伸內容：七仙羽被鬧神棍 爆喊剖白被欺凌 : 個個都笑我騎呢！
《東周網》訪談系列節目《星桄伴我心》4月重磅嘉賓：
即睇：倪樂琳曾因心口胎記感自卑 爆媽媽鍾意某男星
即睇：黃秋生剖白人生幾段情 愧對亡母，對花槽祭父，大仔生死劫，細仔嗲功攞錢
