巴黎奧運將於月底開鑼，繼一九○○年及一九二四年後，相隔百年三度成為奧運主辦城市。法國籌辦今年奧運，以減碳為大方向，同時希望大削開支，例如九成五賽場為現有或臨時場館，另曾計劃設無冷氣選手村（後不敵熱浪決定添置冷氣）、觀眾席採用膠櫈等，打造僅八十八億歐元預算嘅「平價奧運」，希望擺脫奧運超支宿命。

東京奧運期間，大批市民逼爆多個商場觀戰，帶動商場人流疫中回彈。

回顧歷屆奧運，東道國埋單往往要蝕錢。牛津大學有研究指，自一九七六年起，每屆夏季奧運會平均支出達八十億美元，平均超支近二倍，遠高於造橋、鋪路、建水壩等重大工程。一九七六年蒙特利爾奧運係當中嘅「超支王」，當年主場館Big O被戲稱為「Big Owe」，而O形開篷設計更未能於奧運前完成，要喺奧運後繼續工程，到一九八七年先勉強完工，但之後經歷不同事故要重做，到今日仲傾緊係咪要裝第三個頂抑或將場館拆卸。當日加拿大為場館孭債約十五億美元，耗時三十年先還得清。

雖然主辦奧運耗錢、耗人、耗時間，但背後嘅「乘數效應」仍吸引各大城市爭相競逐。以二○○八年北京奧運為例，被指為史上「最貴」奧運，估計整體開支逾三千億元人民幣，包括場館建設、基建、宣傳等，其中主場館鳥巢總造價約二十二點六億元人民幣。雖然資金投入高，但據北京市統計局報告，同年北京GDP突破萬億元人民幣，並帶挈當地旅遊、酒店、零售等周邊產業，促進當地就業人口急升；且開支中好大部分用於有長遠回報嘅基建上。另奧運結束後，鳥巢轉為商演場館，日租達三百萬元人民幣，成功孵出金蛋。

奧運經濟並非局限於主辦城市，記得上屆東京奧運期間，香港疫情措施尚未解封，但仍有大批市民逼爆多個商場觀戰，張家朗反勝一役更有唔少市民提早霸位睇直播，帶動商場人流疫中回彈。

港府今屆一如以往出資購買直播權，為港隊打氣之餘，亦為本地零售業造就商機。各大商場今年繼續使出渾身解數，其中信和集團（0083）斥逾千萬港元作奧運活動推廣，旗下四大商場將提供高清大電視直播，奧海城更三台同播，滿足不同觀眾對賽事嘅喜好，同時會邀請嘉賓作賽前分析。

為搶先吸客，信和自上月起已推出一系列運動相關活動，如聯同體院舉辦港隊選拔賽及體驗日，稍後將有著名運動員參與挑戰賽，包括賽跑、單車及划艇等，為奧運預熱。而為配合奧運賽道顏色，奧海城中庭更換上薰衣草紫色賽道，供市民打卡。集團預料人流及營業額將較上屆奧運分別增加兩成及一成半。

巴黎夏令時間同香港相差六個鐘，部分熱門衝牌項目將於香港時間深夜舉行，不過一大班人出嚟睇大銀幕直播好夠氣氛，業界亦可把握人流，自製「奧運夜市經濟」。