發佈時間：18:00 2025-05-02
68歲，好多人都會收火，但魯振順早前竟敢向無綫主席許濤控訴人工低，遭《中年好聲音》搶job，博炒嗎？
「冇得擔憂㗎！我又唔等錢開飯，你當我恃老賣老，食得幾多吖！」
有兩層樓揸手，又有大堆登台工作，他當然有牙力暢所欲言，何況早年經歷過初戀女友拒婚、事業失意、欠債、割脈自殺斷9條手筋，敢言進諫又算得上甚麼？
回望過去，魯振順最遺憾是送了媽媽入老人院，一心以為亡母派現任女友Julie來照顧自己，「點知發現性格只能夠做伴！」結不成婚，雙方感情昇華似家人，一切隨緣。
被追還20個騷
魯振順在1978年投考無綫藝訓班，堪稱「綠葉王」，96年飾演東方不敗，令人記憶猶新。訪問這天，他依然有火，解釋當日向許主席訴苦有因。原來他在今年6月完約，但3月初就收到藝員調配組的電話，「佢哋話我上年under 20個騷，要我簽合約還，冇底薪、冇月薪，咁我就覺得奇怪，完約前呢段時間，如果有劇開，安排我做咪得囉 ，但好似唔關佢哋事咁。
「加上之前王維基撬人開台嗰年，我居然有9個月冇工開，走去問點解，佢哋話：『乜你唔係過檔咩？』之後見珍姐（曾勵珍）、樂小姐（樂易玲），先開始有番工作，追番晒啲騷。」
既然是調配工作出錯，要他簽訂眼中的不平等合約，他當然嬲，「你冇人工俾我，我食西北風呀？麻煩高層易地而處，仲有，你哋好似加人工，如果你哋減啲，嗰筆錢可以救到前線幾十人，我唔係斷你財路、殺你父母，只希望大家共渡時艱。所有藝員就似《哪吒2》入面綁住條鐵鏈嘅妖魔鬼怪，喺煉獄度生活呀！」
無綫近年比較着重《中年好聲音》的參賽者，魯振順認為策略正確，多了平台讓人圓夢，「多咗一批廉價勞工之嘛，咁咪頂爛市囉！𠵱家咁嘅環境，如果喺TVB過得到自己，咪繼續做，唔得咪走。TVB唔將山頭文化呢個毒瘡，甚至諗還騷呢個人嘅想法撇除，就係咁㗎喇。」
TVB總經理曾志偉當日回應風波，指「冇一個藝人可以做到老」。本月中他舉行生日齋宴，魯振順都有份做慈善拍賣官，二人於事件後首度同場，「曾生有同我打招呼，一早應承咗，唔可以咁小家唔去。」
相關內容 : 魯振順控訴減騷影響生活 曾志偉 : 冇人可以做到老 !
割脈斷9條手筋
避過高層「照肺」，但80年代，魯振順卻避不過人生低谷。有8級鋼琴造詣的他，跟過秦燕老師學唱歌，又攞埋19區業餘歌唱大賽亞軍。1983年，他以新人身份接拍電影《天皇巨星》，更出埋同名大碟，點知票房仆直，更因借名作商業登記而孭上200萬債。兩年後，他跟拍拖7年的女友婚事撻Q，加上拍劇拍到谷鬼氣。
「有套劇得6集，拍咗成大半年！拍完諗住逃出生天，去尖東食飯唱卡拉OK啦，點知突然午夜12點call機響，PA話想補番個鏡頭，聽朝6點鐘通告，我咪答：『唔使拍，死咗喇！』當時我飲咗酒，失去自控能力，咪敲碎消防玻璃割脈，啲血猛標出嚟囉。送去醫院，斷咗9條手筋，家姐喊，阿爸搖頭，我叫佢哋唔好話俾阿媽聽。直至大細佬結婚當日，阿媽先知，佢表情好痛心，你話我幾不孝。」
魯振順熱愛唱歌，當年參加了「華星天才歌星訓練班」，但未有繼續做歌星，原來是因為跟藝訓班的合約，只能二揀一。衡量過後，他覺得藝員合約有底薪，較有保障。話雖如此，他對唱歌熱誠從未減退，是《歡樂滿東華》凌晨環節「卡拉之星」的台柱，長年佔據籌得善款最多藝員三甲。
「托賴啦，多謝俾咗一個平台我哋冇機會唱歌嘅人，可以做善事，又可表現自己。試過有贊助我嘅朋友走數，但嗰時金融海嘯，佢都有困難，咁我唯有填數，出錢又出力，唔緊要啦，唔好斤斤計較。」
媽媽拖住小手到學校逐一叩門
魯振順記得小學時，無心向學，媽媽跟他說：「唔讀書，將來做乞兒。」於是大手拖小手，到學校逐一叩門，令他好感動。遺憾是他長大後，違反了媽媽意願，礙於工作，忍痛將她送入老人院，又未能見她最後一面。
他歎了口氣，哽咽地說：「嗰時貪慕虛榮，以為做呢行好易搵食，誰不知原來咁複雜。我好希望買大屋同爸媽一齊住，但冇能力做到，非常遺憾。送媽媽去老人院唔係我嘅意願，因為我啲兄弟姊妹係有本事去照顧，但佢哋有自己問題，冇理由夾硬。」
2017年，魯媽媽在中秋節哽親引致肺炎入院，之後身體越來越弱，然後離世。識算命的魯振順說：「媽媽講過佢走咗，個家就冇，果然應驗。我都羨慕人哋兄弟姊妹可以聚埋一齊，唔得，都冇辦法。六親緣薄，係我條命囉！」
誤以為女友是媽媽替身
媽媽走後兩年，身為天津人的他與41年前認識的「華星天才歌星訓練班」同學Julie重逢，「佢突然打俾我，佢話係我阿媽派佢嚟照顧我，我傻更更又信喎。跟住有一日，我好想食阿媽包嘅餃子，佢就包俾我食，我喺車度食第一啖就喊，真係包到阿媽嘅味道。」
水餃定情 ，兩人於2021年準備結婚，點知因疫情阻一阻而告吹，後來同居後慢慢發現三觀不合。「𠵱家叫佢Julie媽，因為佢囉嗦、霸道，乜都要知，又有控制慾。有次去食嘢，服務員想合照，佢就俾說話人聽，我唔鍾意佢呢啲。我哋不嬲分房瞓㗎！我鼻鼾聲大，佢又磨牙有鼻敏感，我如果突然放屁影響佢，又或者個幾鐘起身屙一次尿，郁醒佢就唔好啦。」
他坦言已習慣一個人睡， 現在有個伴同住，互相照應，已心滿意足。
相關內容 : 女友「阿媽」上身 魯振順被篤住狂鬧
