發佈時間：12:00 2025-09-26
戀愛真人騷《女神配對計劃》，於上周日終於播映完畢，被指是戀愛腦的李芷晴（Step），最後竟然拒愛林焌堯（Jacob），搞到網民群起鬧爆她玩嘢，還嘲諷她：「一世單身！」不過，Step失了一個Jacob，還有一個曾經與她同房過夜的陳昇（Jaden）在守護她！
現年30歲的Jaden是4間西裝店的老闆，下年即將開第5間店；此外，他家住中半山，又有8位數字的積蓄，並沒有不良嗜好，絕對是「超級筍盤」。日前，Jaden接受本刊的獨家訪問，除了解開在求愛比賽中原本大好形勢的他，為何突然間放棄之謎，還獨家透露：「我同Step仲有私底下聯絡。」
場面感人
雖然戀愛真人騷《女神配對計劃》，於上周日已經播映完畢，但卻留下不少疑團，其中之一便是李芷晴（Step）的「求愛勇者」陳昇（Jaden），原本形勢大好，既贏得與女神同房過夜的福利，又冧掂她手拖手在帳幕走出來，但該集的尾聲Jaden竟然主動叫Step淘汰他，令觀眾百思不得其解。
回帶返到節目的現場，Step要在Jaden及陳衍丞（Kenneth）兩個之間踢走一個，向來有選擇困難症的她，猶豫不決；而為免女神陷於兩難，Jaden竟主動叫Step淘汰他。而當時，Jaden為免忍着淚水的Step爆喊，立即報以大方一笑：「好高興認識到你，成個過程係開心，我都好希望我哋之後可以做到朋友。」並再補多句：「加油呀，你係女神嚟㗎！」安撫她不要哭。
Jaden自我犧牲的一刻，鏡頭拍到梁敏巧等人齊齊哭成淚人，場面超感人！Jaden坦言：「我覺得嗰一個時刻，我嘅離開係適當嘅決定。其實，我覺得當時嘅Step對我冇咁大嘅意思，同埋我唔想佢選擇方面咁難做。完咗之後，我都聽到有好多唔同嘅聲音，有好多人覺得我咁樣自動退出係博出鏡，想留俾自己一條安全線，令到自己成為英雄。講真我真係唔係想咁樣，大家相處咗咁耐，我好清楚佢（Step）嘅性格。當其時，佢係好顧及大家嘅感受，唔想整走任何一個人，我自己走係最好嘅。」
此外，在拍攝的過程中，Jaden表示對Step加深了解，覺得她事業心重，並不需要穩定的愛情，她暫時未需要找一個真正的伴侶，所以他選擇離開。
狠心分手
拍過3次拖的Jaden，第一次是初戀，而第二次就拍了4年，至於第三次則敵不過7年之癢，他笑言：「拍咗7年真係好耐，大家一齊咗咁耐，因為太深入了解，所以分開，我哋互相太熟大家，到最尾睇唔到未來條路，大家都唔係想行同一個方向。」所以在拍攝前幾個月，Jaden就狠心分手！
Jaden直言參加《女神配對》的因由：「其實，我都鍾意拍拖嘅。我想搵一個黐人嘅女朋友，佢又可以同我一齊奮鬥事業，放工又可以黐埋一齊，我想要呢種女仔。」希望能在35歲後結婚的他，坦承現在年紀已不少，所以將來拍拖一定會花多一點時間在另一半身上，他表示：「以前都有女朋友試過叫我幫佢做一套西裝，我梗係客人行先啦，但係𠵱家嘅我唔會，我會花多啲心機喺對方身上。我真係想搵一個人結婚生小朋友。過多幾年，等我事業穩定，就可以結婚，不過呢啲都係睇緣份啦！」
千萬身家
節目開始時，現年30歲的Jaden透露，年薪有7位數字，現時是4間西裝店的老闆。另外，他亦曾做藝術品及炒賣名錶的生意；而讀市場學出身的他笑言，以他這個年紀買得起中半山的樓，養得起自己及父母，十分感恩：「𠵱家我揸住一、兩千萬，養得起自己照顧到屋企，都算係咁。」
讀書時，因身邊有許多人鍾意穿不同款式的西裝，耳濡目染的Jaden，亦四出找師傅幫自己，做西裝。畢業後，他發現自己很喜歡做剪裁，於是膽粗粗建立這盤生意，他憶說：「其實，開舖頭都係為咗滿足我自己，想做一啲出邊師傅做唔到嘅衫及西裝，所以一畢業就成立自己嘅公司，第一間2015年開始，呢幾年越做越大。」現時，Jaden在上海、泰國、台灣及香港各有店舖，明年更會在尖沙咀開設第5間。
私下聯略
《女神配對》最後一集中，Step喊爆拒絕Jocob的愛，結果連日來被網民負評，不僅嘲諷她：「一世單身！」又辱罵她：「臭X！」看到女神備受抨擊，Jaden馬上跳出來安慰：「多謝我哋嘅女神Step，帶俾我哋一個精彩難忘夏天。」而Step也回應他：「多謝你令到呢一個旅程更精彩！」Jaden又透露：「我同Step仲有私底下聯絡，將來嘅事冇人知。」看來這段姻緣的紅線仍然牽掛着。
延伸內容 : 女神配對計劃｜李芷晴拒愛Jacob揀單身 被斥「戲弄男方」 唔畀機會周嘉全被斥「太無情 」
《東周網》訪談系列節目《星桄伴我心》9月重磅嘉賓：
即睇：羅毓儀淚眼訴說4段情 冧數林俊其出「七連招」追求 甜蜜剖白：我想出年結婚！
立即追蹤《東周刊》全新WhatsApp頻道，緊貼全城熱話、突發猛料、獨家消息！
