發佈時間：18:13 2026-06-18
因為《飛常日誌》播出後，不單止擁有高收視，還有好口碑，所以載譽歸來推出《飛常日誌II》，並繼續由馬國明、高海寧、劉穎鏇、洪永城、朱敏瀚等原班人馬孭飛，再增添生力軍周嘉洛。
大部分演員在《飛常II》中均獲得升職，除在新崗位上面對不少挑戰外，私下亦有許多新體會。當中，馬國明就分享，徒弟周嘉洛相當難搞，但雙方卻擦出火花。而高海寧就直認，受到角色的愛情觀影響，變成鍾意細水長流的愛情，更憧憬在機場結婚。至於，洪永城和朱敏瀚亦因這套劇，而接多了代言人和廣告的工作，獲益不少。
高海寧：革新愛情觀
新劇中，高海寧（高Ling）繼續擔任機場客運經理，但會調到上海訓練新人，故跟飾演機場保安主任（行動）的洪永城，被逼分隔兩地，但小別勝新婚，兩人的感情卻不退反進。當中一場，她歸來跟洪永城重逢的戲，連自己都深深感動：「拍咗4個take，我都係眼濕濕。」
高Ling坦言︰「今次係一段成年人嘅戀情，唔會心跳加速，而是有一種心安嘅感覺，對方將你照顧得無微不至，令我學識欣賞呢種男生。而演法都好自然，唔需要用力演，我喜歡呢段感情，淡淡哋，默默陪伴⋯⋯以往會覺得愛情係轟轟烈烈，原來呢種細火慢煮，細水長流嘅，反而更溫暖實在。」
馬國明（馬明）也笑言，若果開拍《飛常III》，高Ling和洪永城應該在機場舉行結婚。高Ling則分享說，在停機坪看日出日落的景色最美，又不諱言︰「喺停機坪影婚紗相，結婚都可以。」馬明隨即附和︰「幾浪漫。」可惜，高Ling現時仍然未找到真命天子。不說不知，她讀書時，原來也曾寄信去應徵空姐，但最終卻去了選美，這個角色總算圓了她在機場工作的夢想。
洪永城：冧莊代言人
擔當機場保安主任（行動）的洪永城，在機場拍攝第一輯時，因入形入格，而經常被旅客誤會為真的機場保安，並向他查詢及問路。他打趣說：「有一次喺接機大樓遇到一個馬來西亞旅客，佢應該知道我哋拍劇，但佢喊住攬完家人，又問我可唔可以攬佢？我都覺得好溫暖，有時令我覺得，自己好似喺機場做咗好多年咁。」
自稱角色「入血」的洪永城，還獲得機場保安公司邀請，拍攝招募短片並擔任宣傳大使 。隨着第二輯開鑼，他即冧莊代言人，令同場的馬明和高Ling慨歎經常在巴士見到他的廣告，並深感：「羨慕、妒忌、恨！」而搵到錢的洪永城，在等埋位期間，會用「血拼」來消磨時間。馬明和高Ling都目睹過洪永城經常跟店員打牙骹，他解釋︰「我哋有機管局發出嘅員工證，可以喺禁區用員工價買嘢。我同店員傾偈係有原因，一來大家成日見面，二來我之前都有買開嗰啲品牌㗎。」高Ling更踢爆他最愛買東西送給老婆。
馬國明與周嘉洛：師徒擦火花
第一輯飾演中央控制中心值班經理的馬明，今輯連升3級，晉身為客運大樓及旅客體驗總經理。他透露，曾跟這個角色的原形接觸過，他大讚真實人物能力超高：「呢個職位好高級，佢要好有經驗，每個部門都有接觸，好大責任。」
雖然今輯的身份「升呢」，但馬明的感情線卻欠奉，因為劇中的前妻蔡思貝已經離巢，以及下屬郭柏妍轉跑道，去了就讀「見習機師培訓課程」。不過，他就多了一個IQ130的天才徒弟周嘉洛。馬明笑指，這個新徒弟非常難搞：「佢忍唔到笑，有時拍拍吓，引埋其他人笑。不過，並冇多咗NG，反而帶動咗氣氛，變得輕鬆。佢都加咗好多想法，有時大到監製都要撳住佢。有年輕嘅新演員衝擊，呢啲後生動力，真係擦出火花。」
周嘉洛則表示，在劇中對馬明甚為尊重：「冇招積對馬明，佢知我轉數快，好重視我。其實，今次同以往嘅角色都相似，冇乜突破，但氛圍就好唔同，因為機場係實景，由於可以參觀內部，好似去咗哈利波特嘅霍格華茲咁，好難忘！」對於不少人自小就有航空夢，但他卻強調自己從一而終︰「細細個就想做演員，做航空界係唔錯，但拍完都過咗癮。我都曾經有想做小學教師，但最終冇荼毒下一代，反而毁害咗演藝業。」咁鬼馬，難怪馬明話佢難搞！
劉穎鏇：挑戰四種語
身形高挑的劉穎鏇，昔日的空姐打扮，深得觀眾的喜愛，更被封為「劇集史上扮演空姐最靚的演員」。可是，她今輯卻轉職為行政人員，擔任駐機場主管，不用穿制服，但仍可大晒長腿。由於是駐機場主管，拍攝期間，她就率先體驗了當時仍在興建的二號客運大樓；「見到T2好靚，同T1一模一樣。我一到機場，就好想飛，好開心！」因為職位轉變，劉穎璇也面對不同挑戰，除了要認識更多航空術語之外，更要一次過大晒4種語言︰「當時嘅情景，有唔同嘅旅客，我要講日文、普通話、英文同廣東話，一場戲直落。當中，日文最困難，我要請朋友錄音；跟着，我聽錄音不斷背，就連同事都聽到入晒腦。」而感情方面，她分別會跟周嘉洛和朱敏瀚有互動，但為了保持神秘，她拒絕劇透。
朱敏瀚：想轉做機師
飾演Captain K的朱敏瀚（朱仔），今輯少了揸飛機，反而去了航空學院教書。不過，他依然會以一身機師look示人，繼續型爆登場。朱仔指出，小時候看過《衝上雲霄》後，便對「Sam哥」吳鎮宇的機師造型着迷，所以長大後可以扮演機師，他對於角色非常重視，由內至外都一絲不苟，還向真機師老友麥大力取經。
朱仔直說：「衷心多謝麥大力，佢教咗我好多專業術語，上機要做啲咩，咁真實好多，我都有請佢食飯答謝。」他指這輯劇情更緊湊，並預告大結局拍足兩日：「劇情講機場裏面嘅地鐵隧道發生問題，係一個大場面，並且要出動消防員，我更要徒腳行去救人，仲要抱住游嘉欣，抱足兩晚。當時我斷咗左腳韌帶，都算負傷上陣。」
拼搏演活這個角色，朱仔就獲得豐厚的回報，成為航空學院的廣告代言人。去年，學院首批見習機師在美國舉行畢業禮，他除獲邀到場見證外，還在參觀期間，有機會坐上當地的小型飛機作體驗，以及得到教練的指導。他坦言都有衝動轉行揸飛機，「因為拍攝時，揸住個模擬器都好過癮，叫做實現飛行夢想。如果唔做娛樂圈，都想喺度工作；不過，學費好貴，有贊助，就即刻報讀。」
