發佈時間：18:44 2025-02-22
為何要在巴士上剪指甲？有女網民日前在facebook專頁「真‧屯門友」發帖，講述自己搭乘九巴58X時的一段惱人經歷，指當時看到一名缺德男乘客在車上剪指甲，忍無可忍下出言阻止，結果對方囂張地說﹕「關你咩事」、「你吹得我脹呀」，其同行的妻子更加入罵戰護夫，揚言「放上網好呀我都想紅呀」。不少網民指責這對惡夫婦的行為，還有人分享了自己的核突經歷！
據樓主指，事發於2月1日中午12時左右，當時她正在一輛前往旺角方向的58X線巴士上，看到一名男乘客旁若無人地剪指甲，遂出言阻止，希望「佢講畀返啲公德心」，未料對方竟無賴地反駁﹕「關你咩事，我係鍾意喺巴士度剪指甲，點呀！……你吹得我脹呀！」
樓主稱，男乘客的妻子此時亦加入罵戰，反斥她「嘈住成部車」，還毋懼公審，囂張地說「放上網好呀我都想紅呀」！樓主於是便發帖成全這對他們﹕「佢兩公婆想紅 大家幫幫佢吖。」還上載了兩張惡乘客的照片，與網民分享。
有網民看到帖子後表示，「巴士上剪指甲，如果一兩下係可以接受，剪晒10指真係頂唔順」、「剪倒刺就接受嘅」。樓主隨即回應稱，「佢拍咗10下我先出聲」。
網民奇怪：點解要出街剪
不少網民加挺樓主，並指責在巴士上剪指甲的行為﹕「支持Share（分享）開去，真係好討厭！」有人則表示疑惑，「真係唔明點解要喺巴士度剪指甲」、「我都好憎人喺巴士剪指甲，巴士上剪得靚啲嗎」、「都好多人鍾意喺輕鐵剪指甲，周圍飛」、「其實點解唔可以係屋企剪，係要出街剪，佢哋個思維係咩呢」。
有網民就分析指「唔想整污糟自己屋企」、「百無聊賴，剪完又唔使自己掃，幾好」、「唔想喺屋企彈到指甲周圍飛，咪會喺公共地方剪指甲囉，呢啲咪自私囉」。
還有網民細數剪指甲以外的「巴士上的討厭行為」﹕「同彈鼻屎冇分別」、「最憎啲人喺車上邊食嘢，超大聲睇電話，剪指甲，梳頭，除鞋，挖鼻屎」、「仲有，開大大聲睇片、小紅書」、「仲有喺度撥嚟撥去啲長頭髮」。
網民分享核突經歷
有人就分享了自己遭遇到的核突經歷﹕「見過最核突，唔記得60Ｍ／Ｘ（巴士線），關愛座阿伯用工具挖完耳屎，hi落櫈呢個位，6、7次左右」、「有一次見到個大媽又係喺度剪指甲我無出聲，心諗你彈Ｘ到我我實Ｘ爆你，我一路睥住佢，六合彩又唔見我中，Ｘ佢個Ｘ睇住佢塊甲真係飛咗落我大髀到，即刻開佢拖Ｘ爆佢」。
有網民上載了九巴的「乘客須知」，當中第19點列明﹕「應為其他乘客設想，不應在車內作出令其他乘客感到煩擾的行為（例如高聲談話、剪指甲、大聲播放流動設備音響、用腳頂著前面椅背或將腳踏在座椅上等）。」
