發佈時間：08:55 2025-02-21
人總需要勇敢生存！多年前患了驚恐症的李珊珊，選擇神隱家中，足不出戶，絕跡江湖，所有朋友都不見面。箇中承受的病患折磨，她選擇一個人獨自面對，實在不足為外人道。
「嗰陣時我成日飆冷汗，經常會無緣無故咁嘔，唔係普通嘅嘔，係噴射式咁嘔，搞到周圍都污糟晒。有時即使見到一碗粥水都會想嘔，令我對乜嘢食物都冇晒興趣。」
在童年8、9歲時，李珊珊已習慣堅強地獨立生活，自己照顧自己，所以一個人隱居，她不會感到寂寞。
「其實我咁多年依然會活躍喺社交平台，一個人喺屋企，上吓網，睇吓電影，都可以自得其樂。」
李珊珊隱居「山窿」生活
李珊珊說，曾幾何時在娛樂圈的五光十色生活，一星期有幾晚都會夜夜笙歌，醉生夢死，後來她問自己，是不是想餘生都是這樣熱鬧地度過？於是她醒悟過來，謝絕所有朋友應酬，甚至連任何約會都拒絕，匿在自己的「山窿」裏面與世隔絕。「我自己覺得係時候要停喇！我應該轉換整個生活方式，所以先選擇自絕於這個社會。」
如此決絕地避世，最大原因，是她被情緒病困擾得不似人形，她坦承曾有一種瀕死邊緣的感覺。「嗰時係已經冇力量去跨過去。」李珊珊一度生不如死。
有否向上天質詢，點解要咁樣折磨自己？「嗰時我冇能力去諗呢啲嘢，只係諗，幾時可以出得院呢？我唔會去諗比較，我覺得要感恩多於埋怨，所以通常我係對個天講，希望你保佑或者祝福大家啦！」
住院領悟人生
試過在住院期間，她見到一個等候換心臟的病人，經常向醫護人員發脾氣，最終的結局是依然等不到一個續命的心臟。
「我當時有一個感覺，可唔可以用平常心去面對眼前嘅困境呢？即使用好激烈嘅反應，都唔會逆轉到事實，到頭來個結局咪都係一樣。」
換心病人令她得到啟發，選擇用另一個方式去面對結局，「何況我唔係結局喎，我仲有藥醫，我唔係唔等得喎，其實我知道我需要嘅係耐性。」
李珊珊開心地分享，現時她已經減少了八成的藥，「我係與病共存！不過我仍然要食藥，份量越減越少，呢個係好開心嘅事，所以都係一件很高興的事，我想鼓勵一下跟我有同一個情況嘅人，唔好心急，可以用我呢個方法共存。」
相關內容 : 林保怡失落《金雞獎》影帝 送花冧李珊珊 激罕親揭秘密關係
相關內容 : 自爆驚恐症發作2千次 馬浚偉點名鼓勵李珊珊：「你行到出嚟㗎！」
回應腦癌傳聞
曾幾何時，有傳言指李珊珊患上腦癌，所以急於退隱江湖養病。到底是真是假呢？還是讓她這個當事人大方去回應。
「面對腦部問題，呢個個傳聞是真是假，大家睇報紙或者娛樂新聞，其實都係嘻嘻哈哈啫，你信五成就可以，最緊要係我親自答覆：當然係冇咁危險嘅事！大家可以放心，唔使咁緊張。」
三年冇拍拖 罕談錢嘉樂
一個人的獨居生活，總會有空虛、寂寞和凍的時候，不過李珊珊坦言，這三年完全沒有拍拖。
「以前我係戀愛腦，一段戀情會接另一段，中間唔會有停頓。其實拍拖模式都係無限輪迴，你遇到邊類人，大概都知道起承轉合，點樣相處；或者大家會有乜嘢矛盾。當然過程係開心嘅，但你都知道，有開心就會有不開心。反而呢三年我就會想休息一下。」
在愛情路上，李珊珊和錢嘉樂曾經有過一段轟烈的愛情，可惜最後不能開花結果。曾經有段時間，在她口中，不會出現錢嘉樂這個名字。後來錢嘉樂在2012年娶了湯盈盈，育有2個女兒，好一幅天倫圖。
今天在提起錢嘉樂，李珊珊說得雲淡風輕。「我會送上一個祝福。佢生活得好，我會好開心，而且見到佢一家大小健康，我更加開心。如果真係要公開再講佢，我就覺得唔好再打擾別人，佢哋快樂，我就快樂！佢哋身體健康就好！」
今日李珊珊從隱居多年的山窿重回這個世界，她許下一個小小的承諾，就是「我會活好一生！」
相關內容 : 「金牌媒人」林盛斌開Live 李珊珊激罕現身 公開求偶：「總之要地球人！」
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
