發佈時間：20:42 2025-02-22
朱慧敏︱快速入睡︱解決失眠︱現懷有第二胎的朱慧敏，依然是「最索孕婦」的代表，手腳纖瘦零浮腫，原來以蔬菜為主的飲食有極大幫助。要兼顧工作及湊女的她，體力消耗大，但仍能精神奕奕，有賴平時爭取時間「快叉」充電，靠快速入眠法！朱慧敏親自聲音導航， 示範「Body Talk」快速入睡充電法，不用數綿羊，輕易入睡！
前港姐亞軍朱慧敏（Queenie）2021年和心臟科醫生陳良貴結婚，携手譜寫令人羨慕的幸福童話。三年抱倆，前年10月迎來首個愛情結晶品SheRa，現時一歲多的B女SheRa已準備當姐姐，因朱慧敏在去年平安夜宣布懷第二胎，預產期是今年3月。
吃少量魚及肉助BB建立味蕾
三年抱倆，朱慧敏速孕秘方，就是靠清淡飲食，以及注重暖宮。持素多年的她，懷兩胎時的飲食，都是以素食為主。面龐零浮腫、手腳纖瘦零走樣的朱慧敏，可謂是「最索孕婦」！朱慧敏接受東周網訪問，說今次懷第二胎，雖然以吃蔬菜為主，但也會吃少量魚類和肉類。
「我睇過一啲研究，原來BB喺媽媽個肚度6個月時，開始建立味蕾，所以我食返魚同肉，畀BB建立返味覺。其實我懷孕期間嘅飲食，無論種類同份量，都係同懷孕前差唔同，胃口都唔會特別大。營養師同醫生都話，好多媽媽產後較難keep到身材，因為佗B時增磅太多。雖然係要增磅，但最健康嘅係，增磅30磅以內就可以。而家我150幾磅，重咗25磅；上一次重咗30磅。所以大家食嘢時，只係比平時多少少量就OK，唔需要話一個人食兩個人嘅份量，否則要啲時間去收身。」朱慧敏說。
產前飲桑寄生茶
自言平時以吃蔬菜及喝菜湯為主的朱慧敏，說未有特別炮製補品來補身，強調均衡飲食，已足夠給胎兒最好的營養，而她也會聽從中醫建議，產前吃桑寄生茶等，以令BB的皮膚更佳。「冇特別煲啲咩嚟食，因為我一向均衡飲食，主要係食蔬菜，其實每人嘅體質都唔同，我個人體質係適合食蔬菜，反而覺得食菜之後，體力比以前好好多，更大力！中醫有建議我，喺臨生BB之前一、兩個月，飲腐竹雞蛋糖水或桑寄生蓮子蛋茶，令BB嘅皮膚更好。我間中都會飲吓，又或者食芝麻糊、杏仁糊等，重點係自己整係最好。」
朱慧敏說，無論是孕婦，又或所有男女，只要不吃調味料兩星期，已有明顯收身效果。「調味料有糖有鹽，好易肥。運動方面，以前我都會游水，而家我要湊住大女，都已經畀我好大運動量，佢成23磅，所以我日日都有好多gym，哈！」
相關閱讀：朱慧敏陀B八個月「肥胎不肥人」 「營」爆餐單大公開！
和身體對話
懷着第二胎的朱慧敏，日常行程緊密，要照顧小寶貝SheRa，又要跟不同專家開直播分享健康資訊，以及從事有關催眠治療的工作，故優質睡眠對她來說，是何等重要，她說平時都能爭取時間「快叉」，成功進行速效入眠。
吃藥十帖，不如好眠一夜。因工作及生活壓力致難以入睡，失眠或睡得不好，都是困擾大家已久的通病，身為執業臨床催眠治療師的朱慧敏，分享快速入眠法，不用數綿羊，也可輕易入睡。「我係讀催眠治療，學嗰套係『Body Talk』（與身體對話），首先，係要相信身體嘅自我修復能力好強，同埋要相信我哋講嘅說話係有能量同頻率。」
「當你講緊嘢時，把聲係經耳仔再傳去大腦。瞓唔着時，不斷話：『唉！死嘞！瞓唔着呀！好忟呀！搞乜鬼呀？』一直loop落去，個人就會好忟。好想瞓覺好想放鬆，最好嘅方法，就係慢慢放鬆，同身體對話。」
聲音導航快速入眠
在「Body talk」和身體對話的過程中，保持不急不燥的心情，語調輕柔，一呼一吸都是慢速。朱慧敏親自聲音導航，助你入眠！
「你同自己講：
我而家慢慢放鬆，深呼吸，慢慢呼氣。將身體舊有嘅能量，今日所有忙碌嘅事情，透過呼氣，慢慢呼出嚟。
感恩自己嘅身體，感恩自己今日做咗好多嘢，感謝我哋嘅身體，去幫助我哋成就咗好多嘢。係時候，畀自己放鬆休息吓。慢慢去吸氣，令全身放鬆，再慢慢呼氣。」
朱慧敏說：「如是者深呼吸放鬆多次，帶住一個平常心，就好自然地進入夢鄉。就算唔係即刻瞓到，但聽住我呢把聲去呼氣吸氣，相信大家一定感受到呢個片刻嘅內心寧靜同放鬆，不妨試吓！」
