發佈時間：07:57 2025-02-18
人生路上，並非24/7也是陽光普照、風光明媚，驟晴驟雨，路上風景才會更耐看。
即使是經常發放100%正能量的林盛斌（Bob），他走過的45年旅途，亦如你我般，充滿跌宕起伏。
「你覺得我好啫，其實我有好多高山低谷，有好多低潮、唔開心嘅時候，咁我點面對呢？我會透過我嘅Talk show，將佢包裝成為一啲所謂嘅笑話，去帶俾大家。」
化腐朽為神奇，是林盛斌的人生哲理，亦是其生財之道，令口才了得的他，於走上「父親」的路段時，可自給自足，也讓家人安心。
「我第一次嘅Talk show《Bob’s Up》，係講我由出世、成長，去到我出嚟做嘢面對嘅事，一啲類似係血淚史咁樣。到今次個人大個咗，已經係《The Bobfather》。
「呢10年期間，我屋企出現咗好多嘅轉變，個Family又多咗人，我自己面對好多家庭上面嘅事，事業上面嘅嘢都好多，咁你問我係咪好好笑，我喺我嘅角度，當然我會覺得呢件事係有啲好笑，或者係一啲令到你會帶嚟一啲歡樂嘅元素。」
搵食之外，他還有些許私心。
「今次呢個紅館Show又有啲唔同，第二個地方嘅話，可能我都未必叫啲仔女嚟，但係今次真係紅館，我係好想好想喺現場，除咗我太太之外，仲有我幾個小朋友，等佢哋睇下原來爸爸係做緊啲咩㗎呢？到底爸爸成日話到處去做Talk show，就係做呢樣嘢；原來爸爸係可以喺一個咁大嘅場館⋯⋯我希望啦，坐滿晒所有人。當佢哋見到爸爸喺個升降台升上嚟嘅時候，跟住有人歡呼、拍手掌，我想佢哋感受到原來爸爸都好似幾叻㗎喎。
「爸爸都係會有一個做老竇嘅一啲⋯⋯少少深遠，同埋少少虛榮，希望自己都可以感受到啲仔女都覺得自己好勁嘅時候。」
事業早已是百足咁多爪，但在外八面玲瓏的林盛斌，還是心繫天倫之樂。
「作為爸爸，開心或者感恩嘅，係我同啲女、仔嘅關係都好好，我哋每一晚，可以嘅話，都盡量一齊食飯，7點幾我就返屋企，大家一齊食飯、傾偈，我覺得呢個親子活動係最好嘅。無論係友情、愛情、事業，或者人生、無聊嘢、廢話，我哋都會講。」
不論晴天陰天雨天，如林盛斌般有值得同行得隊友，每天也是走在花路上。
紅館開騷一圓「主角夢」
林盛斌入行22年，由電台節目主持起家，逐步逐步到電視節目、劇集、電影，還有為宴會擔任司儀⋯⋯緊守崗位的同時，他還有一個「主角夢」。
「咁多年嚟，我喺電台、電視做主持、MC，但係其實做呢一啲嘅工作，某個程度上其實都係一啲陪襯、綠葉，可能係一個小配角咁樣，主角唔係我。
「我去做宴會司儀，婚禮嘅主角，一定係一對新人啦！周年晚會嘅，咁當然係個老闆，我係一個陪襯、輔助嘅角色。」
要進步，先要主動踏出改變的一步。
「我係嗰啲唔喜歡坐喺度等機會、等運到嘅人，要做主角，我係想要自己爭取，自己去做啲嘢出嚟，令到自己可以再向前行多幾步嘅人，咁多年嚟都係。
「由我入去電台做主持，到拍電視、電影等，或者做自己生意都係，所以如果能夠有一個Show，係我自己一個人，喺兩個幾鐘入面喺個台上面講講講講，咁就好啦！」
踏上棟篤笑舞台，林盛斌成功當上主角，而其下一個舞台，是更成功的象徵：紅磡體育館。
「我睇番之前喺紅館做Talk show嘅，黃子華、林海峰、許冠文、張達明、詹Sir（詹瑞文）呢啲嘅前輩，都有機會可以做自己嘅Talk show。我就喺10年前，做我第一次嘅Talk show，叫做《Bob's Up》，係喺新伊館。
「咁到3年幾前，嗰陣啱啱疫情開始咗1年多啲，我就覺得成個香港好唔開心，Lockdown大家冇得走，又唔知做乜咁樣，我諗不如做個Show出嚟，去俾多啲正能量、激勵，或者歡樂嘅感覺大家，就做咗第二次嘅talk show
叫做《The Bobfather》。」
圓了夢，林盛斌也絞盡腦汁，為入場的觀眾製造驚喜。
「今次紅館我都好希望邀請到一位嘉賓，邊個就當然唔講，希望大家到時見到會有個驚喜。因為有一啲位，係我覺得如果有呢個嘉賓出現嘅話，就會帶俾大家歡樂。
「3年幾前嗰次我就⋯⋯有一個我細細個好喜歡嘅偶像，就係王馨平Linda，我就邀請咗佢做特別嘉賓，唱咗一首我覺得好有正能量嘅歌曲，咁樣大家會覺得好驚喜、好正！」
Bob爸Bob媽是隱藏「炫子彈」
今天的林盛斌成功娛樂大家，他笑言，家中的柱躉式忠粉，即其父母，最為捧場。
「喺我自己嘅演藝路程入面，佢哋都經常係會睇住嘅，無論係電視嘅劇集、節目呀、我拍嘅戲，或者係我嘅社交平台出嘅Post，都係經常性會俾Like、留言、幫手轉發。
「我諗佢哋都會覺得，佢其中一個仔，我哋係兩兄弟啦，我有一個細佬，佢都好叻嘅。作為父母，有兩個仔，一個係Bob，一個係我細佬咁樣，我諗佢哋都會感覺到驕傲嘅。」
他更從其他人的口中，得知Bob爸Bob媽是隱藏的「炫子彈」。
「早排有個周年晚會，我喺完咗show之後，就過去多謝個老闆請我去做嘢，老闆個媽咪係一位太太嚟嘅，呢位女士同我講話，早排去旅行，同我阿爸阿媽同一個團，話佢哋成日都講我。我老竇周圍叫人哋估佢個仔係邊個，跟住就同人開估係我。
「佢就見到我阿爸阿媽講起我嘅時候，都係好自豪、好開心，我諗佢哋會覺得都幾Proud of有個仔係Bob嘅。」
兒子事業有成，固然抵炫；成功男士如林盛斌，不時在社交平台晒跟美女的合照，其枕邊人Bob嫂黃乙頤，信心又有否動搖？
「首先，嗰啲我就得個講字，如果真係要做嘅已經做咗，唔會寫出嚟啦！我老婆完全明白呢啲係講笑，同埋有啲嘢係有界線，咁多年嚟佢對我信任度都好高嘅，我又唔會特別問佢去咗邊度，但又會自然交代到俾佢知，唔會去到無尾飛堶嘅。
「佢都有自己嘅朋友圈，我諗大家都會有自己嘅Me time。呢幾年我培養到一個嗜好，就係我好鍾意去Sauna，我屋企就冇嘅，但屋企附近有個鄉村俱樂部嗰啲有。每一晚如果我唔需要做嘢，我就會搞掂晒啲小朋友，差唔瞓嘅時候就去Sauna，靜落嚟，喺嗰個空間15分鐘，跟住之後全身出晒汗，會Feel到自己好似嗰啲毒素、嗰啲唔開心嘅嘢、唔好嘅嘢都噴晒出嚟，沖個涼跟住成個人就會好似重生咁樣。」
延伸內容: 足本睇！阿Bob林盛斌掃四仔揼邪骨下火實錄！網民激讚：真漢子！
延伸內容: 林盛斌Bob重提最大一次公關災難 被《東周刊》拍到買「鹹碟」
跟太太相伴20載 對老婆有讚冇彈
拍拖加結婚，林盛斌跟太太相伴20載，他對另一半有讚冇彈，並非只關於「求生欲」。
「佢作為一個太太，作為一個媽媽，我都覺得係非常之高分數㗎啦！唔夠膽講話完美，但一定係好好㗎嘞！佢要照顧屋企、照顧我、照顧細佬⋯⋯又要照顧佢自己一啲佢想做嘅事業，各方面都叫做處理得咁高分嘅時候，我都覺得係好唔錯嘞。
「咁多年嚟，佢梗係睇住我嘅高山低谷，過去呢20年，由佢同我一齊，跟住一步一步，見到我每年有啲嘅進步，又有啲嘢好咗，逐年逐年咁樣去進展，佢都俾咗好多鼓勵我。」
鼓勵以外，太太還是林盛斌能卸下心防的避風港。
「譬如我有時都會有唔開心，人嚟㗎嘛，都會有情緒、有心事，佢都係其中一個開解我，一個好重要嘅人囉。返到屋企好攰，尤其係啱啱過呢兩個禮拜，個腦要轉，個心又要轉，返到屋企攤咗喺度，同佢傾咗一陣偈，跟住佢又拍吓我，話：『唔緊要，你放吓負啦！放吓好嘅。』。
「我冇特別話咩大吵大鬧，但真係好辛苦、好勞累。如果隔籬呢個女人，喺呢一刻仲要係叫我唔好嘈、話我好煩呀，喺度踩我兩嘢嘅，我個情緒會係點呢？心情會係點呢？
「但係佢知道我都努力搏命，喺呢個時候都要呻吓，佢都喺你側邊陪伴、打氣，咁我都真係算係咁。」
有說男兒有淚不輕彈，在太太面前，他偶爾也成了「男人哭吧不是罪」。
「一兩次？兩三次？一個人總有軟弱嘅時候，都要有人去依靠吓，搵得嘅就一定係我最親、最信任，同埋係咁多年嚟陪伴得你最多嘅一個人，咁呢個人，就係我老婆。即係過去10幾20年，喺佢面前我都係可以好赤裸，喺我可能無助嘅時候，佢就係我嘅求救對象。」
育3女1子 多前世情人
二人育有3女1子，大女霏霏已16歲，婷婷玉立的少女，最近更成了網友熱話。
「佢啲衣着我真係管唔到，我會話佢要『休』番條領高啲，唔好咁性感啦！又唔係要吸引咩人，呢啲都係佢自己嘅自由，都管唔到佢咁多。𠵱家佢16歲，有自己嘅感情生活、自己朋友圈嘅生活，有時會去夜街。我都會諗番自己14、15歲都已經唔返屋企，可能去到好晏。
「到自己做爸爸嘅時候，都要承受因果。佢好好，咩事都同我說講、同媽咪講。佢會話我知，最近睇中咗一個男同學，𠵱家拍拖、俾相我睇，我都話好，得閒就帶個男仔返嚟吃飯，俾我見吓。」
身為開明的爸爸，林盛斌的要求，可謂極其基本。
「佢得10幾歲，唔需要同佢講要點認真、要結婚，佢有自己嘅諗法，如果佢可以維持到可能拍拖10年8年，到20幾歲，然後兩個要結婚，我完全阻止唔到㗎。但係我最主要希望佢開心、安全，呢個最重要。」
延伸內容 : 星二代美少女變身 青春歲月各自精彩 Bob大女 翻版余思霆
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
