發佈時間：14:59 2025-02-21
蜜雪冰城(2097)今日至下星期三(26日)公開招股，計劃全球發售1705.99萬股，其中香港佔10%其餘則國際發售，另有超額配股權15%，每股發售價為202.5元，每手100股，入場費20454元，預計3月3日掛牌，美銀證券、高盛及瑞银為聯席保薦人。
5名基石投資者
蜜雪集團引入5名基石投資者：M&G Investments （英卓投資管理）、HongShan Growth、Persistence Growth Limited、HHLR Fund， L.P、Long-Z Fund I， LP，合共投資額為2億美元。
所得款項淨額約66%將用於提升端到端供應鏈的廣度和深度，如計劃通過建造新設施並改造和擴建現有設施以擴大在中國的產能，12%用於品牌和IP的建設和推廣，12%用於加強各個業務環節的數字化和智能化能力，10%作營運資金和其他一般企業用途。
股評人教路: 抽咗先 !
一手20000幾蚊，貴唔貴? 獨立股評人鄒家華（Ivan）認為，市況開始瘋狂下，「新股集資明顯針對就玩呢招，顯然盡吸大額投資者，即機構同埋基金客，令到股價上市後易升，蜜雪冰城如果上市後高開，因為價位因為係介乎200元至500元，每個最小變動價位，每個價位郁動就有0.2元。同埋小額投資者會就住入場費太高未必入場，股價要抽升難度更加為低。但係有辣有唔辣，因為入場費過高，冇咗太多大眾散戶投資者入場，做到新股凍資王機會就唔會高。」
過往亦有不少入場費過20000元的新股，例如2021年，時代天使(6699)，入場費約32000蚊，同年仲有先瑞達醫療(6669)，入場費24000左右；2020年亦有再鼎醫藥(9688)約32700元，百勝中國(9987)亦大約2萬，同埋2019年上市的翰森製藥 (3692)大概28800元左右。
「時代天使上市之第一日最高係升1.8倍，但上市後兩年幾股價跌咗接近90%。先瑞達醫療上市後一直沉，沉左7個月，市值之後先開始抽返。再鼎醫藥係有得升，升左10個月之後先跌，但跌到招股價冇左80%左右。翰森製藥都係上市後有得升，升左2年後，比招股價有約2.5倍升幅，之後都要跌穿招股價。」
至於今次蜜雪冰城，鄒家華認為投機角度係值得買，「抽左先，上市後即走。同之前布魯可一樣，邊間借得最多劵商用盡額度去抽，富途之前俾General客可以到108倍，咁邊間借得最多就抽邊度，有本錢讀者可考慮去頂頭鎚。」
