發佈時間：15:25 2025-04-07
去日本，離不開食買玩。幫過甘比化妝，又是徐子淇御用化妝師的Gary Chung（鍾日華），平均2、3個月便會飛一轉東京。密密飛，既有遊東京的貼士，私藏的抵食餐廳名單更水蛇春咁長。他推介了幾間心水，通常千幾日圓（約$77）有一餐，俾多少少約$280，更可以在六本木5星級酒店坐低，慢慢歎個法國自助午餐。
「我一日最高紀錄食5餐，下午茶會食好多甜品，可能兩件蛋糕加一杯芭菲，仲有消夜，日本啲便利店好正，我會買好多嘢返酒店食。」平民價錢便可滿足到味蕾，肥多幾磅都抵。
一餐$100有找
Gary Chung最近幾次去東京，都是寓工作於娛樂，幫班名太客戶買化妝品，順道捐窿捐罅搵美食慰勞肚皮。他說：「去得旅行，幫襯嘅餐廳一定打卡為主，裝修要靚。我唔食豬、牛，又唔鍾意排隊，所以餐廳嘅選擇會少啲。」
他無私分享口袋裏珍藏的平靚正餐廳，當中首推位於銀座、食法國料理的Aux Bacchanales，「一到lunch time，有好多靚仔靚女嘅行政人員喺度食晏。最出名嘅蛋包飯餐大約1,500日圓（約$77），我一定會加多千幾日圓，叫多一份同樣係鎮店之寶嘅橙酒pancake，勁好味！銀座呢間分店好舒服，可以坐喺路邊睇風景，下次我想試原宿嗰間，因為環境更靚，感覺高級啲，但價錢一樣。」
$100有找的推介，還包括近新宿車站的鮨丸壽司，該店有師傅即場手握壽司套餐。而素食餐廳T's Tantan，一碗全素麵同樣令Gary Chung食到舔舔脷。
香港人鍾意食自助餐，Gary Chung認為五千幾日圓（約$280）的六本木君悅酒店自助午餐無得輸，「主要食海鮮為主嘅法國菜，全自助形式，唔似香港啲酒店咁分時段，可以慢慢食、食好耐。」
掃眉筆當手信
食要性價比高，shopping一樣要。Gary Chung化妝化到出神入化，每次去新宿，他都會去Okadaya入貨，掃好多日本造型師都讚不絕口的眉筆，「440日圓一支，即係大約廿幾蚊港紙，我會每個色買幾支，送埋俾朋友都好平，又會掃假眼睫毛。行上樓上，佢又有好多accessories賣，好似毛冷、假髮、cosplay道具等，有時我會做styling嘅嘢，所以都啱睇。」
樓高10層的秋葉原Radio會館，賣的全是動漫公仔、玩具，簡直是大細路的天堂。Gary Chung陪朋友去朝聖，大開眼界，直言被很多男人孭住的「痛袋」（掛滿動漫等角色周邊商品以示粉絲的袋）深深吸引。
除了秋葉原，他在代官山也留下不少足跡。「嗰度有間好靚嘅蔦屋書店，好適合文青去飲咖啡同睇書，又有我至愛嘅帽子店CA4LA，仲出名多明星居住。我撞過本木雅弘，識少少日文嘅我話係佢嘅香港粉絲，佢好開心咁同我selfie。
「如果去開六本木，我會去森美術館睇藝術展同買靚靚藝術家紀念品，最好安排喺去君悅酒店食自助餐嘅同一日，因為喺附近，順路呀！」
食米芝蓮二星
Gary Chung貼地搵食，但間中都會豪少少食米芝蓮餐廳打卡。他揀中的二星餐廳LA TABLE de Joël Robuchon位於惠比壽，「我食嘅午餐要35,000日圓（約$1,800），食物好精緻，用料好靚，不過要食成兩個幾鐘。」
酒店方面，他豪花1萬蚊租住文華東方酒店，雖然最終食唔到極難訂位的The Pizza Bar，但他check in時未執好房，酒店經理就請他食早餐。他笑說：「訂房時，我唔捨得俾8,000日圓（約$412）訂埋個早餐，佢個egg benedict好味到爆！」
他又推介新宿Groove酒店，入住的特別主題房要提早幾個月訂，盛惠$6,000一晚，「打完卡，我就好快出去玩，其實幾唔抵，都係夜晚瞓覺之嘛，哈哈！」
延伸內容：驅邪有法︱ 徐子淇「御用化妝師」Gary Chung 靠天然硫磺皂/艾油驅邪
延伸內容：化妝教學︱星級化妝師Gary Chung 教化最新泰式混血兒妝
延伸內容：東京快閃遊︱ 星級化妝師Gary 幫襯LV Cafe打卡 賣舊名牌衫補貼住酒店
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
即睇：倪樂琳曾因心口胎記感自卑 爆媽媽鍾意某男星
