發佈時間：21:28 2024-01-19
星級化妝師Gary Chung早前趁不用工作，便到日本東京快閃遊。以前鍾意去掃化妝品和買衫的他，因香港現在乜都有得買，所以今次可以舒舒服服去LV Cafe和人氣素食店打卡，再看展覽，最開心係帶住20幾件過季名牌衫去賣，居然可以補貼他住新開酒店Groove Hotel的三晚費用，他笑言計落仲有賺。
LV Cafe等2小時
Gary去過東京超過20次，他坦言：「我通常一年飛兩次去買化妝品同衫，因香港𠵱家幾乎所有大小日本品牌都買到，所以今次去主要食同玩。」他先去LV餐廳「Le Cafe V Cafe V」幫襯，他說：「全世界只有兩間，一間喺巴黎，一間喺銀座，所以一定要去試吓。」由於餐廳太受遊客歡迎，故不接受預約，只可以去排隊等位；取票後餐廳會記錄你的Email，待有位時Email通知你，但要20分鐘內回到，幸好他大約等了兩小時便有位。
人氣素食店難Book
因很多網紅都大讚Cafe的甜品和咖啡，所以他決定點千層酥、朱古力批和LV咖啡，他大讚：「啲酥皮又薄又脆，朱古力好香濃又唔太甜，加上拉花靚到唔捨得飲嘅咖啡同人人都要帶走做紀念品嘅LV公仔紙巾套，等兩個鐘都係值得嘅。」近年他愛食素，今次仲去咗好多潮人推介的Ain Soph，他續說：「我食嗰個季節拼盤，賣相精美又好味，最精彩係綠茶忌廉Mousse，不含蛋奶製造，但係比傳統忌廉仲香滑。」由於這間餐廳好難Book，所以他建議如果想去，最好早一個月上網預訂。
睇展覽兼買沉香
近年Gary因多接了有關藝術相關的工作，所以每次出Trip或旅遊，他必定安排時間去睇Art Show。今次撞啱他很喜歡的塗鴉藝術家始祖Keith Haring，在座落於六本木中心的森藝術館（Mori Art Museum）舉行展覽，他表示十分精彩。另外他還去了丸之內的Kitte商場買沉香，他說：「呢間『薰玉堂』有成四百幾年製香歷史，店內嘅『殿上伽羅』沉香係我買過最靚嘅沉香，約$420港幣有60支，趁Yen低我大量入貨。」
Trade衫好玩又環保
由於Gary有很多過季名牌衫，如果Casual啲他會捐去慈善機構，但大品牌的因不捨得捐就Keep住。去年往東京發現Ragtag可以回購名牌二手衫，不過一定要是歐美製造的新淨貨，日本版歐美品牌都唔收，他說：「我上次畀咗幾件佢報價，佢畀番大約原價15%我，仲話我啲衫係Good Stuff，所以他今次將屋企20幾件唔再着嘅名牌舊衫攞去賣，佢仲獎我約$500港幣的獎金，加埋夠晒我嘅酒店費！」他笑言Trade舊衫好玩又環保。
性價比高新酒店
至於酒店方面，Gary選擇去年在新宿歌舞伎町中心開幕的Groove Hotel，皆因一落街乜都有。而酒店房間比一般酒店的寬敞，今次他居住在30樓的雙人套房，面積約6百幾呎，包括客廳、榻榻米區、睡覺區和兩廁所、兩浴室，晚上若不逛街可留在酒店一路食宵夜一路睇夜景，非常之歎，他稱：「呢間套房大約$4,500港幣一晚，如去傳統酒店起碼要$10,000港幣一晚，我住三晚仲包埋早餐，性價比高，不過又係要預早幾個月先Book到。」
