香港除咗樓價高、租金貴、裝修費亦不菲。早前有網民於社交平台發文分享，抽中長沙灣三房一廳五百呎公屋，為慳裝修成本同避免裝修公司偷工減料，屋主自己操刀為單位裝修，全屋傢俬均由淘寶購入，大部分屬實木傢俬，連運輸費僅約兩萬五元（港元，下同），由設計、出圖、到安裝「一腳踢」，工程只花六天完成。
阿里巴巴旗下淘寶香港站夥拍本地家居維修平台Papabo，開業首兩日店舖人山人海，非常旺場。
近年唔少港人會喺淘寶訂家具，勝在價錢平、款式多，而且賣家通常都會提供組裝教學，部分淘寶店更會同香港師傅合作，可派人上門免費度尺。不過網購始終有貨不對辦嘅風險，阿里巴巴（09988）旗下淘寶香港站夥拍本地家居維修平台Papabo，在港開設首間家具實體店，進駐尖沙咀中港城。開業首兩日店舖人山人海，門外有幾百人排隊入場，非常旺場。
其實早喺上年十月，淘寶天貓港澳事業部負責人陳子堅（CK）已向我預告實體店計劃，適逢上周開張，我當然去一探究竟。店舖佔地逾兩萬五千呎，成為商場最大租戶之一，過萬件家品標榜高性價比、高品質。全店共分為七大沉浸體驗專區，包括兩大淘寶家具品牌吱音及樹吱家居專區、客廳和餐桌餐椅區、定制專區、嬰兒兒童寵物用品及卧室區、戶外傢俬區、辦公室方案及電競區，以及建材專區，可謂一應俱全。
近年本地健身風氣盛行，但香港家居空間普遍有限，通常都要去會所或連鎖健身中心做運動。我見店內陳列咗一個做gym神櫃，由衣櫃與健身櫃組合而成，只佔一平方米空間，能滿足用戶在家「操肌」所需，夠晒慳位方便。另外我留意到廚櫃區擺放咗一套AI度身訂造系統，方便不同身高客戶訂製個人化家具；另可輸入心儀顏色，顯示廚櫃模擬效果圖。我亦見店內列出「十大必買產品」，如梳化、餐桌、茶几及梳妝桌等，售價全部五千元有找，且線上下零差價。
集團採用嶄新OMO（Online-Merge-Offline）營運模式，若喺實體店睇啱心水貨，可掃描商品上嘅二維碼獲取產品資訊同相關折扣，然後直接喺淘寶網選購。至於送貨方面，店內貨品全部提供直運，當中九成商品運費低過六百元，近半更喺一百元之內。
香港零售業競爭白熱化，同時網購成風，實體店同電商融合已屬大勢所趨。電商建站平台Shopline數據顯示，超過五成電商已開實體店，兩成正計劃全面轉向O2O，其中家居行業尤其適合呢種營運模式，消費者可先「睇辦」、後網購，提高顧客信心。
「有人辭官歸故里，有人漏夜趕科場。」香港零售業正值寒冬，淘寶反而淡市進軍香港，作為「出海」第一站，線上、線下互補融合。環境在變，商家點能夠不求變？
