有老友同我講，香港樓市、股市不斷下跌，睇嚟香港好快沉淪，我話唔會，有三個板塊正在冒起，令香港唔衰得。老友立刻話金融、物流、創科，老友唔知道，這三個板塊已經過時，不過仍未消失其效力，如果做得好，甚至可以老將回勇，而我所講的是另外三個板塊。
最近李嘉誠先生講醫療，並且認為香港應該發展醫療行業。其實，在醫護行業裏，設備還是其次，最重要是一個「德」字，沒有醫德，就算有醫療設備都係假，內地著名醫院的醫療設備不會差過香港，但每年來港睇病、驗身的內地人不計其數。我問過不少來港睇病的內地人，香港睇醫生咁貴，點解要落嚟香港睇？內地老友話，貴唔緊要，最緊要是貨銀兩訖，不用欠醫生人情，而且私穩度高，醫生有醫德，不會公開病人病歷，這點內地暫時未能做到，香港政府亦知道這個優點，所以準備設立第三間醫學院。
第二個板塊就是教育，亞洲排前十一最佳大學，香港有四間；全世界IB成績最好的一百間中學，香港有二十間。在香港讀書的內地學生超過五萬人，連同家人大約有十五萬，千祈唔好睇小這十五萬人，因為全部都是消費者，可以拉高香港GDP。如果情況可以持續，香港有機會成為亞洲教育之都，不過有得亦有失，香港學生就要面對非常大競爭，甚至要出國留學，將香港學位留給內地學生。而這個情況是否能夠持續，就取決於師資水平，事實上香港師資水平是世界前列，不少教授與老師具學者風範，而風範並不能速成，要長時間浸淫，亦不是用錢可以買到。如果教育產業繼續發展，不但有利香港，更加有利中國。
第三個板塊就是優質人口增長，在疫情這幾年，英國向香港開放BNO移民政策，只要合乎BNO資格可以移居英國，五年後申請移民，估計走了三十多萬人，就算香港每日有一百五十個單程證配額，但仍然不能彌補離開的人數目。況且，當時樓市有辣招，內地人在香港買樓要付百分之三十印花稅，咁苛刻條件，點會吸引內地人移居香港。
好彩政府都聽取民意，將辣招取消，接納優才、專才、投資移民，以及學生來港居住，人口才回復增長，樓價亦止跌回穩。
老實說，一個城市人口如果不斷減少，可以說是沒有前途，但如果只靠吸納不同國家的移民，最後會俾人同化。香港所吸納的絕大部分是中國人，而且是最優質的，新移民只會優化香港，問題是新來港人士是否能夠被原有香港人接受，我認為問題不大，因為在過去一百年，香港都是靠吸納內地人來壯大自己。有了這三個新板塊，香港唔衰得。
