疫後旅遊業持續暢旺，世界旅行和旅遊理事會（WTTC）預計，今年旅遊業對全球生產總值貢獻按年增長一成二，達約十一萬億美元，佔全球生產總值一成，刷新紀錄，主要受酒店、郵輪同航班預訂帶動。港人出名鍾情旅行，香港國際旅遊展今年六月調查發現，逾九成七受訪者今年下半年會出境旅遊最少一次或以上；近六成人願意增加使費。

永安旅遊行政總裁梁港蘭（左）。

早前同永安旅遊行政總裁梁港蘭（Lanny）傾下疫後旅業發展。作為公司掌舵人，Lanny自大學畢業後就到永安應徵做領隊，過去四十年由實習生、門市櫃枱、領隊、分行主管、營運推廣做到行政總裁，歷盡金融風暴、沙士同新冠疫情等風波，實戰經驗豐富。

回顧過去各地封城鎖國嘅日子，旅遊業長期處於懸崖邊，香港旅遊業議會統計，疫情期間有三百幾間旅行社結業，逾二百員工嘅大型旅行社則減至四間。能夠喺業界支撐至今，除咗考驗財力，更要識得靈活變陣。永安旅遊立足香港六十年，為攜程旗下子公司，財力毋庸置疑，而擅於打逆境波嘅Lanny於疫情期間將網站同App改裝成電商平台，轉賣海外時令手信同生活百貨，並以門市為取貨點。另力谷本地遊業務，如蒲台島、東龍島和荔枝窩等生態遊，幫港客止下旅行癮，同時帶動收入，成功保住四百多名員工飯碗。

通關後短短一年，永安旅遊利潤已回復至疫情前水平。Lanny解釋，開團依靠大量機位同酒店床位，集團疫情間主動向全球合作夥伴找數，總額過千萬元（港元，下同），故疫後對方提供唔少獨家旅遊產品作為回饋，加上有資深領隊坐鎮，令永安可迅速出團，把握復甦商機。

隨科技進步，自由行越趨普及，現時酒店、機票、車票、景點門票上網一click就可預訂，到埗後打開手機地圖導航，便可走偏大江南北。永安旅遊早着先機，於十幾年前率先投資過千萬元自建網上旅遊平台，一站式提供多種旅遊產品，目前佔公司一半收益，會員人數超過二百萬人，每年平均賣出過百萬張機票。Lanny話對比其他平台，官網有過百名開發人員支援，並設國際認證嘅防禦系統，而各級別用戶可享不同優惠，均有助提高客戶黏度。

以往港人去旅行集中吃喝玩樂，務求食得精、玩到盡。不過Lanny留意到，踏入後疫情時代，走馬看花式行程已不合時宜，加上航空運力有限，故永安近年主打中國深度遊，如由武漢出發坐船通過三峽大壩嘅五級船閘；獨家入住《繁花》和平飯店，體驗國家元首級住宿等有趣體驗。佢坦言旅遊業力不到不為財，價格戰並非長久之策，用心策劃旅遊產品至能夠長玩長有。