面對氣候變化，全球着眼可持續發展，如今經營業務，除了追求EPS（每股盈利），亦越趨重視ESG。今年港交所提出更新ESG披露規則，要求上市公司由二○二五年一月起，更詳細披露碳排放訊息，如供應鏈上下游碳排放數據，以及夏天颱風、暴雨等極端氣候問題對營運影響等。相關新規將於明年起分階段實施，意味ESG將進一步影響企業營運、風險管理，甚至供應鏈安排。

早喺一九九四年，會德豐前主席吳光正已成立吳氏會德豐環保基金，開創先河。

港交所嘅ESG報告指引於二○一六年一月生效，當時要求上市公司就ESG事項按「不遵守就解釋」原則作出披露。不過，ESG一詞其實可追溯至二○○四年，由聯合國全球契約首次提出，提倡將ESG因素納入企業評估指標，並認為ESG表現較好嘅企業，有助增加股東價值，並可實踐企業社會責任，以及提高社會聲譽。直至近幾年因疫情、全球暖化同俄烏衝突等威脅湧現，ESG浪潮開始席捲全球，大量資金湧入永續投資市場。據彭博研究，預計明年全球ESG資產規模將有機會超過五十三兆美元。

講到本地ESG發展進程，喺上世紀八、九十年代香港經濟騰飛，但同時電力需求、車輛數目同工業活動激增，上空不時被霧霾籠罩，市區空氣污染問題日益嚴重。喺呢個黃金年代，正當人人向錢看，對環保概念可謂兩眼漆黑，卻有一位企業家居安思危。

早喺一九九四年，會德豐前主席吳光正已成立吳氏會德豐環保基金，開創先河，同政府轄下環境及自然保育基金合作，合共提供一億元（港元，下同）資助環保相關工作，為全港首個政商合作嘅環境保育基金。吳氏當年指出，雖然香港經濟取得驚人成長，但同時亦付上環境代價，並認為大企業應承擔更多環保責任，帶頭提高社會環保意識，否則最終將損害香港營商環境和聲譽。

過去幾十年隨環保意識抬頭，至今綠色及可持續發展確成為國際共識，同時印證吳氏嘅高瞻遠矚。呢個基金今年成立三十周年，多年來促成逾百個資助項目，涉及空氣污染、海洋保育、廢物處理、樹木保育、交通、能源、建築廢料等研究同教育範疇，當中不乏具創意同影響力嘅方案，例如向本地學校撥款興建空中花園，以美化校園同改善空氣質素。

除咗係一項使命，以往被視為「付出」嘅ESG亦成為投資新貴，可持續投資產品相繼興起，各大評級機構亦陸續發展ESG評分系統。香港作為國際金融中心緊貼市場走勢，例如政府今年將續推二百億元綠色債券，恒指公司亦推出「恒生氣候變化1.5°C目標指數」，以推動本地綠色金融。學吳氏話齋：「飲食有得揀，但空氣無得揀。」佢喺三十年前率先倡導商界走上綠色賽道，到今日ESG成為眾多企業和投資重點，令可持續發展更上一層樓，相信無論政商民都樂見。