港人北上消費蔚然成風，內地亦冒起一股「南下買樓潮」，成為近期本地樓市引擎之一。自今年二月全面撤辣後，內地人毋須繳付巨額辣稅，加上有地產中介轉攻小紅書賣樓，大量港樓資訊湧現內地社交媒體，吸引唔少「西餅客」（指豪客）赴港掃貨。上月更有一組內地買家豪擲一點六億元（港元，下同），連掃全層兩打（二十四伙）單位，本地樓市可謂久旱逢甘露。

陸叔參觀何文田新鐵路豪宅新盤。

我同好多香港人一樣鍾意睇樓，因此地產商老友開新盤都會請我去參觀，最近就應鷹君集團（0041）邀請去睇何文田鐵路新盤朗賢峯ONMANTIN第IIB期。記得細個時會跟媽媽去何文田山一位世交屋企探訪，當時好嚮往呢區，覺得周邊環境同住宅都好高級。何文田確實係九龍傳統豪宅區，亦係「四大名校網」之一，極受家長歡迎。朗賢峯屬三十四校網，男拔、喇沙、培正和瑪利諾等名校雲集，同時鄰近理工大學，對家庭客和學生租客具一定吸引力。

何文田雖然係豪宅區，住客出入好多自己開車，但港鐵何文田站喺二○一六年啟用後，令呢區交通連帶物業價值都大大提升。其實不論自住或投資，鐵路盤一向受追捧，市區站上蓋供應就更為搶手。朗賢峯由鷹君同港鐵合作發展，坐落港鐵何文田站上蓋，有屯馬及觀塘雙線之利，兩站可以到達會展，三個站到柯士甸，方便搭高鐵北上。屋苑仲設有專屬升降機直達何文田站，出門口一𨋢到站，呢個設計好罕見。

上星期參觀咗新盤一房、兩房同三房示範單位。三房戶實用面積約一千平方呎，大廳間隔分明，睡房方正實用易擺傢俬，主人房兩邊大窗，採光度充足，部分單位更有維港煙花景。項目裝修設計亦花心思，整體設計用米色和木材做主調，配灰色大理石廚櫃，簡潔舒服。見到發展商好落本，用料高級，例如全部單位都用德國高級家電品牌Miele。

項目分兩期發展，共五幢住宅大樓，合計九百九十個單位，由一至四房間隔都有，我覺得自住的話，兩房同三房都係好選擇，開則理想兼價位適中。投資客可以選擇一、兩房單位，適合學生同優才小家庭租住，而且樓盤設施多，應該幾好租。IIB係壓軸一期，上星期首張價單，重返同區八年前一手大型新盤定價。新盤定位高級而開出爆炸性定價，確實有吸引力，而以呢個定價估算，租金回報應該唔錯。

睇返樓市數據，撤辣後一、二手交投應聲彈起，上月共售出約四千二百伙新盤，按月激增十四倍，三月單月成交量更創二十六年新高，漸現小陽春。隨市場信心逐漸復甦，加上息口見頂，樓市有望企穩並逐步回升，呢個盤擁有地利兼享政策時機，吸引唔少買家捧場。