陸叔：恭喜發財！今期見報之時，已經過咗立春，進入「甲辰」，先祝願各位讀者事事如意，吉星高照。每逢新年，我都會請老友記羅奇峰Raymond睇下流年運程。唔識風水玄學嘅人都聽過，二○二四年已進入「下元九運」，對我哋嚟講，係唔係一個好嘅新開始？

金融玄學家羅奇峰預期龍年會有好多突變和外部引發的動盪。

峰：或者我會咁講，如果從大局角度出發，新世運就會有新遊戲規則，自然有新機遇，只係呢幾年世運交接，成個世界都好動盪，作為地球村一分子，大家都要面對。由於今年叫做正交接，情況唔會一下子一百八十度轉變，所以我認為係一個新開始，但仍未可以安定落嚟。香港仍要面對好多挑戰，唔會一帆風順。

陸叔：你咁講都有道理，呢幾年無論世界或香港，都係我前所未見嘅亂局，不過點都好，我哋都要重新出發。講返最關心嘅香港，嚟緊一年會唔會走出谷底，返回以前嘅光景呢？

峰：「九運」係離火通明之象，科技、生物科技、網上世界生意、文化產業、娛樂事業都會當時得令，但香港喺過去黃金二十年，喺呢啲範疇上無咩播種，所以世運一轉，我哋會感到好吃力。而且香港金融、地產兩大支柱轉弱，單靠「食老本」同埋「阿Q精神」去轉型，我睇唔到好明顯嘅出路……

 陸叔：我都認同你嘅講法，不過好多玄學家都話今年係龍年，龍本予人祥瑞感覺，如果從流年命盤去睇，有咩啟示？

峰：今年立春八字係近年難得一見動盪格局，重點係四柱沖尅太多，年柱同日柱出現「辰戌」相沖；月柱時柱又「寅申」沖，俗啲講句真係「沖到九彩」，呢個係一個幾唔理想嘅格局。以一九八七年為例，當年丁卯年立春八字月支與日支及時支出現「寅申」相沖，當年正正就係八七股災。又例如二○○三年立春八字又係出現「寅申」相沖，而當年就係「沙士」肆虐。

陸叔：如果聽你咁講，今年聽落去都唔係咁順，以上事件會重演？

峰：我會咁睇，八字五行係一種象數，最終可以以不同事件去應象，但有一點幾肯定係今年香港面對好多突如其來嘅變局，而且係外來因素引發嘅震盪。至於大家最關心嘅港股，雖然或會有明顯反彈，但我預期仍會非常反覆，所以我認為今年唔係冒進之年，而且要做好風險管理。

陸叔：呢點我都同意，外資流走，北水又無咩力，除非有「白天鵝」出現令局勢改變，否則再平嘅股市，都未必可以熱炒。不過，都係嗰句，有危就有機，香港始終係福地，好多困局最終都可安然過渡。

峰：不過我有一點想寄語大家，重回二十年「八運」（大財運）既easy money時勢並不容易，大家亦要適應新世代嘅生存模式，客觀條件改唔到，就自己去調節心態、價值，咁樣喺新世代亦可活出一片天。最後我都祝大家財源廣進，心想事成。