認識鄧予立超過三十年，當年鄧翁全力為佢一手創立嘅亨達集團南征北討，雖然都係周遊列國，但以工作為主，甚至係幫公司做先頭部隊去新市場探路、挖掘商機。集團業務逐漸上軌道後，鄧翁積極培養第二管理梯隊並安排交棒，到近年更年輕嘅第三梯隊上場，佢正式轉任顧問，由「外匯教父」變身為「老頑童」，「全職」旅遊，一年到尾得幾十日喺香港。

陸叔收到鄧予立送來新書和紀念郵票。

鄧翁份人做事認真，連去旅行都分外認真，旅途上將所見所聞筆錄，返港後出版社有興趣將文章出書，佢就更加有系統地寫遊記。後來由於出書要登相，鄧翁為求出版效果好，更加拋棄傻瓜機改學專業攝影，結果不但出書更開埋攝影展。好多謝鄧翁一直記掛，出新書都會送嚟，等我可以跟住佢嘅足跡遊埠。

鄧翁呢位旅遊玩童，截至今日已經踏足過一百四十八個國家地區，即使過去三年全球疫情肆虐，都無阻佢踏上旅途。其中，佢用咗超過一百日去「疫」行意大利，差不多行遍整個國家，連鮮為人知嘅城鄉小鎮都到此一遊。我收到鄧翁本《老玩童遊義大利三部曲》，原來一共三冊；據佢講總共寫咗二十萬三千字，半年內分三本出版，行事速度一如當年做外匯交易咁迅速。

揭開第一部曲，鄧翁喺前言一章寫，意大利係四十年前佢同鄧太新婚度蜜月之地，因此呢本書唔止係遊記，亦係人生情書。事實上，鄧翁確實鍾情意大利，四十年來多次到訪，但書中記載嘅係二○二○年疫情高峰期間嘅遊歷，當地一度處於封城狀態，體驗同以往迥然不同。

好似浪漫之都威尼斯，鄧兄書中憶述，蜜月旅行時與愛妻初乘貢多拉小船暢遊水城，雖然三十分鐘船費高達一百五十歐元，但唔少遊客都甘心做水魚，不時出現塞船狀況，笑言疲憊多過愉悅。鏡頭一轉，疫下一排貢多拉停泊靠岸，遊客可同船伕討價還價，八十歐元玩足一個鐘。但因為旅客大減，威尼斯運河竟然清到可以見到水母、海豚；點出疫情無疑係旅遊業噩耗，但同時又令大自然得到喘息機會。

鄧翁同時送上一套列支敦士登出嘅郵票，睇真郵票上係老玩童嘅攝影作品。原來佢早前獲列支敦士登國家博物館邀請舉行攝影展，係首位香港人獲邀。列支敦士登係世界知名嘅「郵票王國」，鄧翁於是向當地申請出版紀念郵票，獲批後就出咗一套十款「疫行三百天」攝影作品郵票，包括歐洲各地名勝，相片特色之一係全部都無遊人阻擋，包括一張齋景無人嘅巴黎鐵塔。鄧翁講笑話，以前去熱門名勝係影群體相，疫情下可以慢慢捕捉景物。

有遊客講歐洲多國治安轉壞，鄧翁又有無失物經驗？佢話「疫行三百天」完全無遇過搶劫，力保不失，反而最近返港喺機場攞行李時竟然畀人打荷包，身經百戰嘅鄧翁估唔到喺自家地頭「失守」!