發佈時間：20:58 2024-04-26
現年55歲、身為1987年港姐季軍的林穎嫺，選港姐後被無綫力捧，先後主演多部劇集，包括和萬梓良合演《成吉思汗》、和梁朝偉合演《大都會》、和羅嘉良合演《烏金血劍》等。深受歡迎「入屋高」的她，於1989年到美國攻讀會計，並在暑假時才返港拍劇，直至1994年正式離開娛樂圈並到美國定居。
林穎嫺於1999年和美國男友Tom Dupont結婚，現在更育有三名子女，身為家庭主婦的她，生活優哉悠哉，但一場新冠疫情，令她更感一切是且行且珍惜。在疫情期間，她有見人人困在家，情緒容易抑鬱，於是開設YouTube頻道「林穎嫺Wing4U」，拍片、剪片、訪問等一腳踢，借着訪問藝人或分享自己的生活日常來調劑大家，不少網民指其節目是心靈雞湯。
林穎嫺又有新搞作！最近推出新書《如何活出燦爛人生》，於今日（26日）在柴灣舉行簽名會，圈中好友賈思樂、2014年港姐冠軍邵珮詩及何國鉦等到場支持，原來何國鉦是林穎嫺的表弟。
新書《如何活出燦爛人生》，林穎嫺說已籌備了30年，內容是由選美入行開始，展開銀色生活，成為人生轉捩點，並分享在美國生活的苦樂點滴外，更分享理財慳稅等。「呢本書我籌備咗30年，真正動筆，用咗兩個月，因為內容係講過去經歷，寫關於我自己，內容好有養份，係一本天書。我好想將呢本書畀我嘅小朋友、網友同朋友睇，老公同小朋友都會趁暑假嚟香港支持我。」林穎嫺說。
林穎嫺笑言，回首人生，是無憾：「我想做嘅嘢已經做好多，有家庭同三個子女讀大學，佢哋有精彩生活，我亦做返多啲回饋社會慈善工作。有好多嘢想做，例如同大家分享美容、養生、健康。人生未係滿分，要做多啲慈善活動幫多啲人，咁先至滿分。」
林穎嫺笑言從來沒有說過退出娛樂圈，更說寫作已成為她生活的重心。「我從來都冇講過話退出，不過家庭一定排第一，之前小朋友仲細，想我喺佢哋身邊，而家佢哋都大個，我可以做返自己想做嘅嘢，就係寫作。」至於會否拍戲，她說：「隨緣！緣份嚟到你擋唔到嘅，暫時我嘅緣份係書，我喜歡寫作。」
