發佈時間：12:00 2026-09-22
近日，內地頂流小生成毅，正在趕拍曾志偉自組公司的頭炮懸疑劇《狩謊》。為拍此劇，成毅已留港近4個月，足跡更遍及土瓜灣、中環、上環等，而所到之處例必引來海量粉絲逼爆街頭。
日前，本刊獨家直擊劇組移師鴨脷洲拍攝，期間；成毅更上演一場打鬥重頭戲。由於他的人氣超強，數百名粉絲聞風而至，場面墟冚！而成毅未埋位時則獨自坐在路邊木箱靜待，低調貼地毫無架子。
車廂肉搏
日前下午2時，劇組殺入鴨脷洲進行外景拍攝。當日，成毅以一身白色打扮，外襯黑白格仔恤衫登場，造型清爽利落。劇情講述他駕駛的士期間，突然被一名從後座撲出的男人襲擊，對方來勢洶洶，兩人隨即在狹窄的車廂內肉搏，不僅扭作一團，還你一拳我一踭，打到車身猛烈搖晃。之後，該男子更抽出一條黑色皮帶，從後箍住成毅的頸部；而成毅就一邊掙扎，一邊批踭反擊。最後，該男子被擊退敗走，短短幾分鐘打鬥已睇到在場人士屏息靜氣，氣氛緊湊。
由於成毅角色涉及不少激烈的動作場面，劇組在拍攝前安排替身反覆試位，模擬被箍頸、扭打及撞向車窗等。現場所見，成毅多次親身上陣拍攝打鬥場口，只有部分的鏡頭由替身代勞。知情者透露：「呢套劇，衛詩雅、譚坤倫兩位演員都先後因為拍動作戲而受傷，所以安全措施絕對不能鬆懈，尤其係成毅作為頂流，更加唔可以有閃失。其實，成毅都好想全部動作戲都自己嚟，但劇組考慮到佢之後仲有好多場戲要拍，唔想佢整親，所以有啲位都堅持用替身。」
貼地低調
在等埋位時，可見成毅未有躲入保母車休息涼冷氣，反而選擇坐在路邊一個木箱上，自己擔住雨傘遮擋太陽，再戴上墨鏡，默默觀察現場的環境。期間，有粉絲高呼他的名字，他也有微微點頭，但盡量保持低調，知情者透露：「成毅好專業，經常都提早到場，未埋位就自己坐埋一邊睇劇本，唔會要求特別待遇。佢知道香港街頭拍攝地方窄、圍觀人多，所以好配合劇組，盡量低調。」
《狩謊》自開拍以來備受關注，劇組移師鴨脷洲拍攝的消息一傳開，數百名粉絲火速聞風而至，將整條街塞得水洩不通，搞到工作人員如臨大敵，除拉起繩索維持秩序外，更不斷大聲呼喝粉絲：「行番上馬路！」每當成毅準備埋位，助手立即高舉雨傘遮擋，防止劇情細節曝光，若發現遠處有人舉起手機，即以雷射筆照射，其後更驚動幾名警員前來了解情況。
不過，大批粉絲未有因此而離場，在炎熱的天氣下堅持守候，有人戴上應援手幅之餘，還帶備長鏡頭相機、摺櫈、飲品及應援物資，更有人表示已連續多日守候：「佢嚟咗香港咁耐，我哋都想畀佢知香港有好多粉絲支持佢，所以日日都嚟，辛苦都值得！」一眾粉絲都難掩興奮，尖叫聲此起彼落，相信成毅全部都收到晒！
