發佈時間：17:36 2025-03-05
ANGEL FACE創辦人兼「瘦身教主 」唐安麒近來在社交媒體頻頻出片派金句引起網民熱討，但惟日前有網民在Threads大展示唐安麒的近照，以及ANGEL FACE長年於紅隧廣告所用的唐安麒照片：「日日經紅隧都見到依條女，十幾年都係咁嘅樣」，又指屬「照騙」，更標籤了唐安麒。
該網民出po後，不少網民幾乎是一面倒指發文者是「網絡流氓」，指對方「非常無聊」甚至是「惡意攻擊」：「你用人哋十幾年前張相同而家比較，你接受唔到咪唔好接受囉！」、「你唔拎埋出世張相嚟比較？」、「人總會老，你唔會老嘅咩？」也有粉絲留言，指唐安麒一早表明是在50歲開始增肥，更展示唐安麒早前的「要靚定要瘦」的短片，指瘦身要視乎年紀，因不想面容憔悴，情願要靚唔要瘦，刻意增肥，令面龐飽滿，精神奕奕！更有網民轉載教主近日粉絲會的照片，大讚她現在的樣子，靚過紅隧張相！
對於以上事件，唐安麒接受訪問時，稱是其公司法律部的同事告知下才得悉，更反過來叫法律部同事不要採取行動。「我都唔知發生乜嘢事，係法律部同事同我講：『要做嘢啦，呢啲內容告硬嘅！』我先知道呢件事，不過我叫同事唔使做嘢，可能係嗰位網民壓力大，搵啲無辜嘅人鬧下發洩吓嘅啫。所以我親自去留言，亦同時提醒嗰位網民，叫佢自己用AI查吓佢嘅言行有乜嘢問題。」唐安麒平時非常留意AI的相關動向，常發文分享推介好用的人工智能Apps，而她回覆該網民的留言，更被其他網民大讚為幽默風趣的「神回」，希望對方別以身試法。
唐安麒留言：「我諗你用『依條女』形容我，真係抬舉咗。如果我好命18歲生仔嘅話，我個仔又18歲生仔嘅話，我個孫都可以20幾歲啦，所以用『依條婆』嚟形容我會好啲。」
「我好多年前已經講，呢張相，係我最後一次會出現在招牌上嘅相，因為我唔係靠個『樣』搵食做招牌，係靠個『朵』。如果我靠個樣搵食，就可能冇飯食，唔可以屹立喺香港快40年㗎！我唔換相個邏輯，就係好似麥當勞叔叔同肯德基爺爺丶𤦍夫人咁，呢個就係嘜頭嚟㗎啦。」
「另外你可以話我『醜』話我『老』，但係用『世紀大？？』嚟形容就會有好大問題，我建議你用你嘅題目，用AI查吓，ChatGPT又得，我最近鍾意用Grok ，睇吓你呢條題目，有機會構成什麼樣的罪行。因為我個『朵』屹立到咁耐，就係因為我唔騙人丶唔呃人㗎！好多美容行業手法不良，但係唔劈客、唔硬銷丶服務好，係我喺行業生存之道。我估你可能係壓力好大，搵啲無辜嘅人嚟鬧吓丶發洩吓嘅啫，歡迎你睇吓我嘅Threads同埋IG，我發放好多正能量文章㗎，希望可以幫你舒緩到啦！」
網絡欺凌無日無之，因一時貪玩或發洩，而在網上胡亂發表言論，真的隨時因構成誹謗而惹上官非！記者試把該網民的發文在Grok上分析，問會否構成誹謗或失實罪行，結果顯示：「根據香港法例，呢段文字真係有機會構成誹謗（defamation），而且如果內容無事實根據，亦可能被視為失實陳述」。又指當中所用的個別字眼是嚴重指控，足以令人覺得所指的人物品格有問題：「如果無任何事實支持（例如無法庭判決、無警方調查、無可靠新聞報道），咁呢個指控就係失實嘅。喺誹謗案中，如果被告（發帖人）無法證明陳述係真（truth）或有合理根據（justification），佢就要負上法律責任。」
至於唐安麒的神回覆，既搞笑又充滿關懷，難怪支持者留言：「教主好嘢！」
