發佈時間：19:44 2025-07-25
港鐵站驚現「親戚童黨」？一名女事主日前在社交平台Threads分享遭遇，指在月台等候列車時，一名男童突然上前，以純正普通話向她討飯吃不果後，又向她討要2元。她給了錢後，男童跟着她上車，其間竟向其他乘客聲稱自己是她的表弟！有網民調侃指她是「2蚊多咗個表弟」，但也有人表示「細思極恐」。
男童：姐姐，你好漂亮
女事主於本月22日發帖指，剛在港鐵站月台等車時，「有個自稱11歲嘅細路仔無啦啦走過嚟用十分純正嘅普通話同我講『姐姐，你好漂亮』，問我可唔可以請佢食飯」。她沒有理會對方，男童「跟住又問我可唔可以俾兩蚊佢，咁兩蚊我，算啦，我俾佢，跟住佢同我講『你對我那麼好是不是因為我可愛』？？？？？？？？？」
在登上列車後，她一直不理會男童，但男童又不停跟她攀談，「最X誇張嘅係佢無啦啦同隔籬嘅一個陌生人講我係佢表姐，我WXXX（玩乜嘢）？？？？？？我幾時多X咗個表弟？淨係想講呢個世界乜人都有」。
網民訓誡：兩蚊都唔應該俾
帖子引發網民關注，不少網民對女事主給2元的舉動予以訓誡，指「兩蚊都唔應該俾」、「雖然只係兩蚊，但樓主又做咗水魚」、「你俾咗2蚊佢係鼓勵佢繼續咁做」。網民並提醒﹕「其實唔睬佢乜事都冇！」「下次乜都唔好俾，唔好接觸，一接觸佢扮暈你就有排煩」、「扮唔識聽普通話，唔好俾反應，唔好回應佢，更加唔好俾錢佢」。還有數口精的網民算出，「一日有30個你咁嘅人俾$2佢，佢咪可以有$60食快餐」。
網民細思極恐
此外，網民亦紛紛提醒大家提高警覺，留言「細思極恐」、「這叫行乞」、「咁細個做騙子」、「小朋友都已經咁㗎啦，恐怖」、「小騙徒新手村任務？問5個笨蛋拎$2」、「騙徒試下殺傷力無咁大嘅嚟練大個膽」。
有人則猜測﹕「表弟？佢一陣搞咗啲麻煩嘢走咗去，妳就出事喇。對方：你係佢表姐嘛，佢偷咗我嘢，而家唔見咗人，妳賠返俾我。」、「突然出現幾個『親戚』夾你，就死火了。況且點可以俾個細路呃$2！」
有網民更指﹕「小心啲。有啲會癲到叫你同佢合照，然後可能會有個男性大人過嚟拉住你走，如果你反抗，然後其他人過嚟救你，或者了解吓情況嘅話，佢哋有機會會周圍同人講你係佢家姐或者媽媽，然後等佢哋放下戒心，就諗住唔插手人哋家事咁樣。今次係兩蚊就算了……佢後邊亂咁認你做表姐，都係驚你有人身安全問題。」
有街坊則懷疑事發地點為觀塘站，有兩人提到自己也在該站內有類似遭遇﹕「我仲記得之前觀塘嗰條仔，又借錢又哥哥，仲要坐我大髀」、「係咪觀塘地鐵站呀？因為嗰日喺觀塘站又係有個大陸細路都叫我請佢食飯，話佢好餓但佢阿媽返緊工」；還有人稱「我都有試過撞過兩次，超級恐怖囉」。
資料來源：yk43._＠Threads
