發佈時間：18:00 2025-07-25
見到陳豪（Mo），自自然然浮現「好男人」三個字。
這天，他比原定時間早了半小時到達本刊影樓，自己揸車的他，沒有助手、髮型師、化妝師簇擁，貼地親民。
陳豪與咖啡，似乎分不開。訪問前，我為他斟了一杯平價掛耳咖啡，難得他沒有嫌棄，還飲至一滴不留。他說，他每天的飲咖啡量，是1公升。
「可能慣咗通頂，工作時會飲多少少，平均每日都飲1公升。Aimee（太太陳茵媺）以前都好鍾意飲咖啡，嫁俾我之後就飲少咗……」
正當我一臉疑惑，為何不是愛屋及烏飲多了，而是飲少了？只見他蠱惑地笑：「因為佢已經得到咗咖啡啦嘛，哈哈哈哈。」
這種肉麻當有趣，逗得我和攝影師都開懷大笑。
陳豪就是有這種親和力，無論他說甚麼，都不會令人反感。他與陳茵媺的12年婚姻，亦是令人睇得舒服的一對。這對夫妻，從不嗌交，早在拍拖時，已自設「愛的密碼」。
「我哋一開始拍拖就已經講好，如果將來大家出現意見不合，解決唔到嘅時候，就講呢個密碼。密碼一出，所有唔開心都要完全放下。」
這個至今仍未曾出招的密碼，謎底是甚麼？
「我話你知呀，我係唔會話（密碼）俾你知㗎！哈哈。」
只有兩個人懂的「黃金密碼」，就算搵人同朕check吓，都好難check到。
最坎坷時200蚊捱足4日
演藝圈充滿無限的可能，54歲的陳豪，近日在劇集《執法者門》中，飾演31歲何依婷的父親，就令觀眾質疑這對「父女」年齡是否太相近。
「我曾經raise（提出）過一個question（問題），會唔會個女（年齡）太大，不過戲裏面何依婷嘅歲數係比真實年輕，所以又唔係唔成立嘅。」
曾幾何時，陳豪亦曾在《帝女花》中演過佘詩曼的父親，當時他32歲，而阿佘28歲，分別飾演崇禎皇帝與長平公主。數數手指，已經是22年前的事。
「娛樂圈就係咁，唔好將任何演員定型。其實我剛入行，好多人已經同我講，阿Mo嘅性格唔太適合呢行，比較內向，唔鍾意social，但我鍾意演戲。雖然我相對地行咗一條比較辛苦、崎嶇的路，做過好多茄哩啡、配角，但我係享受嘅，因為我可以從中學習到點樣喺挫敗中生存，反而令個人更加強大。」
觀眾眼中的好男人，也曾年少輕狂過。中三隨家人移民澳洲，至大學二年級暑假回流香港的陳豪，當年做模特兒出身，最愛蒲蘭桂坊，換女朋友如換衣服。憑着高大外形，間中在電影中客串，已有幾萬元落袋。後來電影圈衰落，他試過半年冇工開，欠下成身卡數。
2000年轉戰TVB後，月薪由十萬跌至幾千元，生活亦由夜夜笙歌至歸於平淡。最坎坷時，200蚊要捱足4日，死慳死抵，連由旺角去銅鑼灣，都要行路去尖沙咀搭 $2.2的天星小輪，落船後再步行至目的地。但捱窮的歲月，他反覺很腳踏實地。
「我其實想放棄好耐，尤其拍電影嗰段日子，每日都唔知聽日會發生咩事，唔知有冇工開，好無安全感。以前做模特兒好似搵好多錢，但日子好空虛，時間過咗，卻冇實際做過咩出嚟。反而入電視台之後，人工好低，工作好多，但我好開心，因為我劇接劇，不斷在生產，不斷去學習，好似入咗一間大學咁，喺不同前輩身上吸收佢哋嘅優點。」
眼中只容得下太太陳茵媺
在事業與愛情上跌跌撞撞，造就出今天的陳豪。劇集拍檔李佳芯就曾在訪問中說過，若不是陳豪已經結婚，她一定會愛上他。
「過獎了。表面上我好似好開放，但其實我好傳統。男女授受不親，我平時好收埋自己，唔會俾人遐想，所以即使你話有女仔鍾意我，我都唔會知道，因為我對眼根本都睇唔到佢。當第一步的眼神接觸都冇開始，就唔會有再進一步。」
開劇時每天只睡4小時的他，眼中只容得下太太陳茵媺一個。上月11號是二人結婚12周年紀念，他即使多忙也陪太太度過。「結婚周年係一對夫婦必須要保衛嘅日子，我成日都話，夫婦關係係需要努力維繫。照顧小朋友唔係一件容易嘅工作，有時太太心情唔好，或者stressful，作為丈夫係有責任令佢放鬆啲。譬如去一次旅行，或者做啲嘢去氹下佢，等佢知道你重視佢、疼愛佢，呢件事係好重要。」
陳豪夫婦床上有指定動作
為了製造溫暖的氛圍，陳家有一個傳統，就是每年必定去兩次旅行，一次是一家五口的親子遊，另一次則屬於夫婦的二人世界。「呢個係我同Aimee之間嘅承諾，夫妻感情維繫得好，屋企先至有愛，小朋友先可以喺愛嘅環境之下長大。如果兩夫妻成日唔開心，屋企少咗愛，就會衍生好多問題。」
「吵架」兩個字，從來不會在他與陳茵媺身上出現。「因為我哋兩個都好明白，任何嗌交，都只會傷害大家嘅感情，一嗌交就好易會講一啲攻擊對方嘅說話，形成永不磨滅嘅烙印。所以生氣嘅時候，我哋要冷靜去解決件事，或者選擇聆聽，而唔係傷害對方。」
與其互相傷害，不如相親相愛。每天起床及睡覺前，親嘴已變成陳豪夫婦的指定動作。除了設定「愛的密碼」，兩人的手機密碼，銀行存摺等，透明度都很高。「我哋係冇秘密，我可以睇佢電話，佢亦都可以睇我電話。兩個人越係透明，夫妻之間嘅關係先會健康。越有嘢收收埋埋，隔膜只會越來越大，互相不信任。所以我哋早在拍拖時已經講清講楚，好嘅嘢要俾佢知，唔好嘅嘢亦要俾佢知，因為人係無完美嘅。」
出名是愛妻號的他，曾被傳媒影到買60萬元的名牌鱷魚皮包包冧妻，而家中的財政大權，亦是由太太掌舵。「我覺得女士應該有自己嘅私己錢，而男士唔應該有私己錢，點解呢？因為男士擔當一個養家的責任，我難得娶到一個好老婆，仲有三個小朋友，我就有責任確保佢哋每個都活得健康快樂，過住無憂無慮嘅生活。屋企嘅事點樣去調配、小朋友讀咩班、旅行嘅安排，都會交俾Aimee去處理；至於對外去傾合約、房租、生意，就由我負責。我哋所有決定都係透明，由大家共同去處理。」
延伸內容 : 《萬千星輝頒獎典禮2023》陳豪相隔16年再稱帝 太太陳茵媺頒獎激動落淚
延伸內容 : 陳茵媺加拿大返港獲特別待遇入駕駛艙 陳豪親身到機場接機
3個小情人 性格各有不同
在充滿愛的環境下成長，令三子女都成了「開心果」，不過性格就各有不同。讀會計出身的陳豪，曾在一次旅行中觀察三人的消費模式。「有次去葡萄牙旅行，我哋俾咗少少零用錢佢哋各自去買手信。大仔（Aiden）好識格價，佢鍾意食沙甸魚，所以就專買沙甸魚罐頭，$7的有金箔、$5.5的有骨、$6的冇骨，佢比較完一輪，最終揀咗中間位，$6冇骨嗰一種去買。二仔（Nathan）呢，比較溫柔同最慳儉，只揀最便宜嘅去買，只捨得買$1的磁石貼，但其實買埋買埋，可能全部都係垃圾，最後放喺屋企用唔着。囡囡（Camilla）就最豪爽，佢鍾意食糖、食零食，又貪靚，乜都買買買。所以對呢個女，我哋反而要小心啲，要睇住佢，唔可以俾佢亂嚟。」
他說，11歲大仔的吊兒郎當，10歲二仔的溫柔及處事的原則性，都與他同出一轍；而細女的正義感，則遺傳了媽媽陳茵媺。面對這位剛踏入9歲的「前世情人」，他笑言已經開始擔心其感情事。
「囡囡係戀愛腦，現在已經憧憬愛情，早排仲問我：『Daddy，你幾時開始拍拖㗎？』我話18歲，佢就話『唔係呀嘛？咁遲？』之前去加拿大summer camp，有啲鬼仔向佢獻殷勸，佢都不知幾enjoy。所以我都好擔心，但你話點做好呢？我真係唔知道，惟有見招拆招啦。」
對於養兒育女，他主張窮養。現時名下有4間咖啡店，他也不會強求子女去繼承父業。「我小時候有個想法，就係將來有嘅嘢，要靠自己雙手去創造。我覺得有時父母嘅幸福，反而會害咗小朋友。點解咁講呢？假如父母一開始就送層樓俾個仔，即係將個仔嘅買樓能力take away，咁佢就唔需要再努力賺錢去買啦。
「相反，我主張仔女早啲搬出去住，早啲去應付屋租，面對成年人要經歷嘅磨難。到佢再大啲，可能30幾歲左右，當佢已經有能力自己買一層樓，到時候你先至再俾一層樓佢，等佢將層樓租出去，有多一份收入養家，呢份passive income就真正幫到仔女。」
咁識得未雨綢繆，唔使check，都知道他是一位好爸爸。
演過激情三級片 陳豪苦盡甘來
自稱思想傳統的陳豪，也演過激情三級片，在94年的電影《晚九朝五》中，更有不少露股鏡頭。30年後的今日，若有導演要求他再露股演出，他願意嗎？
「我當然願意，不過我相信無咩人想睇，要睇都睇小鮮肉啦。哈哈哈。」
「小鮮肉」不再，但在家中的小情人眼中，他就是100分的Sugar Daddy，女兒更經常笑言要嫁給他。
每次在電視屏幕前見到他，三子女都會欣喜若狂。「佢哋會話：『嘩，爹哋呀！好大個爹哋呀！』有時出街，佢哋又會expect有人同我傾偈、影相，更會expect啲同學仔鍾意自己爹哋，當人哋話唔鍾意，佢哋就會覺得無可能嘅！都無taste！哈！」
Taste，是需要時間去提煉，正如飲咖啡，亦不是飲一、兩杯，就能懂得欣賞箇中滋味。
「人生就好似Espresso，剛開始飲時，你可能嫌佢味道太濃，唔係好舒服，但慢慢細味之後，嗰種甘甜，嗰份美好，就係『苦盡甘來』。」
回甘的Espresso，陳豪飲過了。你呢？
