發佈時間：17:00 2025-10-09
愛情路上，人人都經歷過失戀。失戀那種痛，要釋懷，要重新出發，除了靠時間沖淡一切，寫歌宣洩，未嘗不可。
湯令山（Gareth. T）是魔羯座男生，這個星座出名長情。和舊愛鄧凱文（Moon Tang）分手後，他所寫的一系列歌，都與情傷有關。歌詞慘到無倫，偏偏他越痛，歌迷就越buy。他，彷彿成了悲傷代言人。
翻查YouTube紀錄，Gareth. T熱爆的〈緊急聯絡人〉，MV點擊次數已超過1,492萬，〈用背脊唱情歌〉也有660萬。而他即將在倫敦和澳門舉行的演唱會，主題也叫「心傷王子」。
雖然訪問中，「Moon Tang」這個名字有如佛地魔，大家都沒有提及，但他寫歌的對象，你知，我知，單眼佬都知。
「每次失戀點樣療傷？喊啦、唔瞓覺啦、做運動、寫歌，跟住再喊過、唔瞓覺⋯⋯無限輪迴。音樂某程度上有治療作用，所以每次寫一首唔開心嘅歌，或者唱完一首唔開心嘅歌，都有：唉！放低咗啲嘅感覺。」
現時的他，已放下舊情，見到雨後陽光。「冇再傷心喇，感恩呢個經歷令我個心變大咗。」
戀愛未有新着落，唯有寄情事業。他與MC張天賦、姜濤、Tyson Yoshi和林家謙，被網民封為「樂壇新五虎」。對於這個稱號，他說：「可以諗下嘅，整個男團都可能得，但我哋唱咩歌係一個問題。」
那不如先邀請其中一、兩位做澳門演唱會嘉賓？他即刻做打大交叉手勢：「唔邀請，唔要嘉賓！」
反應咁大，並非不想被搶風頭，而是他花了很多心機在set list上，覺得沒需要。明嘅。
私心去蒙古
近黃昏的這個下午，約了Gareth. T做訪問，事前擔心他寡言，慶幸在5名宣傳人員陪同到場下，經過一輪熱身，他逐漸脫下cool cool地的面具，還捉着在場人士試咪，讀出其新歌〈泥菩薩〉MV中一段曹操為報父仇，率軍攻打徐州的字幕。
〈泥菩薩〉比他的舊作另類，引入了曹操的故事，原來念頭來自喜歡《三國演義》的MV導演。「呢首歌係想探討善與惡嘅觀點同角度，Wyman（黃偉文）有一句填上：『留言擂台你看下去，每個毒舌都隱姓戴面具。』真係幾貼合𠵱家嘅social media世界。」
鍵盤戰士多的是，他坦言並不會嘥時間去留意惡評，即使是好消息，例如〈緊急聯絡人〉和〈用背脊唱情歌〉MV點擊率強勁，都是筆者告訴他才知道。
出道8年，很多人都覺得〈用背脊唱情歌〉是其代表作，但他耍手擰頭。
「唔係代表作，其實代表作係咩意思呢？我覺得每首歌都超越緊上一首，因為我追求進步，同首歌多唔多人聽，唔係衡量好唔好嘅一個標準，只可以話〈用背脊唱情歌〉係我最赤裸嘅一首歌。」
Wyman的歌詞，有如Gareth. T心入面條蟲。〈你都不知道自己有多好〉在他迷失時出現，鼓勵他；〈用背脊唱情歌〉就令他待人接物方面變得成熟，要做小朋友的好榜樣。
提到〈緊急聯絡人〉MV落重本去蒙古拍攝，他坦言有私心，「我想去一個地方可以騎馬、射箭，諗住嗰時蒙古係冬天，會落雪，成個影像白色，配合到歌詞『白朗之巔墮下』，點知去到發現地球暖化，得泥色。可能有人會話首歌同個MV唔make sense，其實純粹係我想去咪去囉。」
天生有自信
一個人的性格和才華，很受家庭成長環境影響。眼前的Gareth. T只有25歲，但在音樂方面自信滿滿，例如月前他脫掉上衣，率領53名半裸男士在朗豪坊演繹〈用背脊唱情歌〉。問他的自信，是否跟媽媽家教有關？
「唔係，佢叫我唔好咁有自信。我太有自信，細個開始從心而發，帶來問題多過好處，好似會堅持數學題係咁加法，拉小提琴個音唔係咁，係有盲點㗎！人越大，開始接納人哋意見，自信係有嘅，但要適可而止。」
湯媽媽自小帶他去聽管弦樂團，又栽培他學小提琴和鋼琴，更支持他到波士頓的音樂學院進修。
「我玩得最好嘅樂器係電腦，因為用程式整歌。當同學仔放學溫書，我就匿喺房度不停整。如果冇整咁多，冇咁夜瞓，可能會生得高啲。」他苦笑道。
喜歡音樂，但入行唔擔心收入唔穩定就假，所以有一段時間，他跑了去教音樂，亦曾經因為在時裝店做暑期工執衫，令他更堅定自己的心，只可放在音樂創作上。
他出歌頻密，以為要經常出街睇人生百態攞靈感？他說：「冇喎，如果要專登搵，代表你嘅生活唔夠多姿多采。其實只要擘大隻眼去睇自己嘅人生已經足夠，因為啲歌來來去去都係講啲相同嘅東西，睇你點去用佢。」
目標唱紅館
創作靈感，生活中唾手可得。〈honest〉正是Gareth. T在一次過馬路，發現跟人潮逆流而上，有點驚和寂寞而寫成。「最近聽返，覺得假如我喺呢個城市成功唔到，都要接受。唔係覺得自己喺樂壇係魚仔，我腦裏面自覺係猩猩，真實嚟講係隻pug（八哥）。」
Gareth. T在1999年出生，那年的《十大勁歌金曲頒獎禮》得獎者有陳慧琳、謝霆鋒等，當中他對陳奕迅的〈幸福摩天輪〉最有印象，亦讚歎一班前輩的實力，至今依然活躍。「原來佢哋做咗咁耐，差唔多26年㗎喇？」
他曾為不少歌手作曲、編曲和監製，例如容祖兒的《九秒九》、姜濤的《Master Class》等，又與姜濤、Tyson Yoshi等被封「樂壇新五虎」。問他下一個夢想是否殺入紅館開騷？
「紅館係一個目標，要開始籌備。我知啟德體育館大啲，但我淨係去睇過阿仙奴踢波，唔知有冇4萬幾人嚟睇我。」舊愛讚過你有自信和堅持喎？「我幾有自信都冇用，唔到我控制。」
有指他曾說希望自己或自己的作品成為亞洲第一，他即刻澄清：「唔係我講，係姜濤講㗎！係我哋一個團體目標，係接力賽，唔係單人賽。其實呢幾年，發現做第一、第二根本冇分別，即係首歌好聽就俾第一你，唔好聽就俾第四，唔make sense嘛！應該要改為做啲從未做過嘅廣東歌，唔可以話做亞洲第一。」
「令山轉」之謎
〈用背脊唱情歌〉熱爆全城，Gareth. T在MV的2分59秒邊唱邊轉圈，最後單腳跪地的「令山轉」，更掀起模仿潮，引來網民狂爆金句：「山不轉路轉，路不轉令山轉。」、「令山轉英文係咪Gareth Turn？」
Gareth. T說：「首先多謝母親幫我改呢個名，同埋多謝大家咁鍾意睇我轉。」當聽到有人跟他轉到拗柴時，他一臉驚訝。
「令山轉」的誕生，源於拍第3幕，「我想有啲舞步、有啲動作，咁就同跳舞老師諗咗好多唔同steps，最後settle一個轉就夠，所以嗰排我喺屋企不停轉。真係冇諗過會變成網上熱話呢個東西囉，多謝你哋鍾意。」講完，他雙手豎起手指公。
至於媽咪幫他改名「湯令山」，又有何意思？
「因為母親鍾意行『山』，『令』字就唔話你知，係有原因嘅，反而我冇問過佢英文名點解咁改。如果解做亞瑟王，OK有型啦！」
謎底解開了一半，轉個話題。既然現在樂壇很多歌手都爭相跟他合作，問他期待自己在樂壇的位置去到邊？
他亳不猶豫地說：「我想做湯令山囉！我有嘗試搵過有啲咩人好似我咁樣，但真係比較少。」
是曲線讚自己風格獨特，戰勝了99%其他對手？他點點頭：「嗯，係啩。」
音樂才子，果然從來不缺自信。
延伸內容：湯令山率53裸男 朗豪坊快閃演出新歌《用背脊唱情歌》惹哄動
《東周網》訪談系列節目《星桄伴我心》9月重磅嘉賓：
即睇：羅毓儀淚眼訴說4段情 冧數林俊其出「七連招」追求 甜蜜剖白：我想出年結婚！
即睇：鄭子誠感動細訴與劉倩怡「手指公」情緣 爆因黃夏蕙變奸 因陳百強變成偷渡客
立即追蹤《東周刊》全新WhatsApp頻道，緊貼全城熱話、突發猛料、獨家消息！
