發佈時間：15:28 2024-12-09
要贏，核心的內部，不一定取決於起跑線，讓沿途風景滋養生活，也可成為人生贏家。
45歲的翁子光，19歲便踏上光影旅途，於鏡頭後由低開始浸淫多年，到2015年執導的《踏血尋梅》，揭開香港影壇的奇案新一頁，一切也源於荃灣。
「荃灣有好多好嘅戲院，好老牌嘅戲院：龍華、大光明、好景、凱旋戲院⋯⋯荃灣係特別多戲院，我屋企樓下就係蘭宮戲院，專播3級片嘅，但係好奇怪，我係喺嗰度睇《天空之城》嘅。嗰度嘅雪糕、軟雪糕，仲有思樂冰，唔係便利店嗰啲，我覺得係好美好嘅童年。」
電影拓闊翁子光的視野，讓其思維隨着光與影飛翔。
延伸內容 : 荃灣弒母殺妹案｜劉青雲《爸爸》改編真實個案 15歲乖仔突行兇 父子近況曝光
延伸內容 : 劉青雲挑戰沉重角色 新片劇本靈感來自「荃灣享和街弒母殺妹案」
延伸內容 : 《爸爸》劉青雲心碎演繹令人折服 谷祖琳角色沉重 : 要掏空自己
「我喺嗰啲地方長大，所以戲院對我嚟講係好美好嘅場地，電影都令我離開咗好多現實生活。可能我細個窮，生活簡單，冇得坐飛機周圍去，而電影就帶我去好多唔同嘅世界，睇到好多唔同嘅嘢，豐富我嘅生活。」以奇案類電影起家，但翁子光有着跟其外觀成反比的膽量。」
「拍奇案片，其實我好唔舒服！從我第一部拍咗《踏血尋梅》呢啲類似嘅奇案電影之後，好多人都以為，我對呢啲嘢⋯⋯好兇殘，或者家庭有問題、心理不平衡之類。但其實我唔係！」
「我記得喺屋企食飯，電視做緊《十大手術傳真》，播緊解剖，我就即刻嘔！我係好驚嘅，細個連《黑太陽731》都睇唔到，覺得會發噩夢。」
話雖如此，其新作《爸爸》，也是以奇案為藍本，翁子光坦言，奇案之下，是他為香港人寫的情書。」
「既然《爸爸》係一部療傷嘅電影，一部釋懷嘅電影，我覺得我自己有好多嘢都要釋懷。呢幾年，可能有啲家人經歷嘅嘢，正常嘅，唔係特別慘，可能係家人離去，或者因為COVID，因為好多變化，心裏面唔舒服嘅時間，我覺得很多嘢，香港人都需要釋懷。」
從光影找到屬於自己的美好年代，於晦暗之中，翁子光也捉住了滿足心靈的要素。
「好多人覺得，香港電影嗰種娛樂，好似同其他城市有啲唔同，唔係爆笑，唔係要歌舞昇平，可能有時睇啲沉重嘅電影，反而得到釋放。你睇《年少日記》、《白日之下》，或者好似我哋嘅《正義迴廊》，都唔係一啲陽光明媚嘅電影。但反而電影裏面形成咗一種文化，就係大家喺呢個價值、維度裏面消費，覺得喺呢度，得到心靈嘅滿足。
「至於我嘅幸福度、滿足度，喺𠵱家我嘅人生入面：我未組織家庭，冇咩特別；喺創作同心理健康層面上，我都唔錯。拍完電影，又可以見到啲朋友，討論吓電影嘅嘢，喺呢個層面，我都有7、80分。」
心靈富足，也是一位贏家。
《爸爸》是反璞歸真的故事
《爸爸》取材自2010年於荃灣發生的少年弒母殺妹案，一般人的着眼點也於奇案上，但翁子光想呈現的，是另外一回事。
「我係想講一個家庭嘅故事，後來再諗，部戲對我嚟講，最大嘅主題係時間，時間對人嘅無情、傷害；仲有時間對人嘅溫柔。
「呢個係一個反璞歸真嘅故事，我深信，最好嘅電影，其實係反璞歸真嘅。當然我唔係話呢部係我最好嘅，但我覺得佢好代表到我。」
為了展示自己，翁子光也花了不少心思。
「今次我用咗4:3畫面，以前我覺得4:3係好親密，電影當然係大電影、闊銀幕，而4:3係好親密嘅，係專門俾我自己覺得要好技巧化，令所有嘢都好簡約。
「連我講嘅故事都係好簡單，就係普通人嘅故事，整體嚟講，都係有一種親密係講番人嘅本質，呢個感覺令我覺得好舒服。」
對於被歸類為「奇案片專家」，他即耍手否認。
「我覺得我唔係『奇案片專家』，或者我未來可能會改編一啲我好鍾意嘅文學作品，我自己都諗緊一啲故事，可能真人真事，但唔係奇案。
「因為我嘅創作力好差，可以講係冇創作力，我比較分析性，睇到一啲嘢之後，我會點諗，用我嘅角度去講，可能會引申一啲人性嘅嘢。我希望短期之內，香港嘅奇案都唔好再關我事。」
對於涉足奇案類，他表示初時只是抱着嘗試心態。
「但係我又覺得，有時人係好得意，對某一件事恰好⋯⋯好有感覺，可能當中有啲原因。可能奇案有啲嘢係包含唔到，因為佢係好極端咁反映人性一啲好深層嘅嘢，我會對呢啲嘢有興趣。
「我諗係因為我對文學嘅興趣多啲，我以前好鍾意睇松本清張嘅小說，又會覺得點解香港冇社會推理派呢類電影，好耐都冇，所以我覺得可以試吓做一部咁嘅電影，當時就做咗《踏血尋梅》。」
生活感覺放入電影內
除了對人投入感情，翁子光對自己的作品，也滿滿注入獨特的情感，《爸爸》亦不例外。
「好多人都話，陳麗雲飾演嘅嫲嫲，佢嘅狀態、樣、同個仔講嘢嘅態度，仲有同後生仔講嘢嗰種好心，全部都好似我嫲嫲。係嗰種所謂嘅歸屬感，我將好多我生活嘅一啲感覺，或者一啲靈感，仲有觀察到嘅嘢，都放喺電影入面。
「其實部戲真係好貼合我嘅生活，包括嗰個男事主，其實係冇養貓嘅，係我寫劇本嘅時候，覺得養貓會令佢嘅生活多番啲色彩，所以我就放咗貓入去。嗰隻貓小花係我養嘅，係《踏血尋梅》拍完之後收養，一直都喺我Office，養到𠵱家都12歲嘞。」
祖母、愛貓之外，還有：「因為我媽媽係惠州人，我真係叫我姨媽去教谷祖琳講客家話，我將好多我生活上可以拎出嚟嘅嘢，都放去電影入面。我自己冇做過爸爸，未做爸爸啦！但係喺父子關係入面，有啲對話，可能都有啲我同我爸爸嘅關係喺入面。」
滿足了心靈，翁子光也要面對現實問題。
「我拍每一部戲都要撲水，《正義迴廊》之後，我做咗《爸爸》，今年又做咗《法迷藏》，幫一位編劇朋友做監製。我真係唔想再做奇案！幫嗰位編劇朋友做監製，都係因為個劇本唔錯。
本色演出
「拍戲，因為香港電影求唔到啲咩，只係餓你唔死，但又食吃唔飽。如果純做香港電影，就真係餐搵餐食。我好多時候，都要做一啲香港以外嘅工作去幫補。我覺得見步行步，都總係會有路可以行。」
要把時間、釋懷等大道理精準呈現，除了必然食胡的劉青雲及谷祖琳外，翁子光為「兒子」這個角色，也費盡心神。
「Cast咗好多個演員，但係都係未搵到，最終係有個同事話，佢個朋友個仔有我搵嘅元素，就係Dylan（蘇文濤）。」
18歲的蘇文濤，是100%素人，演出時正為DSE作準備，現已於大學修讀英語教育。沒有戲中的陰沉，說起作品面世，更見MZ世代的幽默。
「我有大學同學睇咗我喺《爸爸》嘅演出，佢哋覺得我係本色出演，精神病嗰方面，除了殺人犯嗰Part之外，佢哋覺得我是本色出演，覺得我好睇⋯⋯我都好少俾我嘅朋友讚。」
其身旁的導演，再一次見證時間的「殘忍」。
「我都⋯⋯18歲都青靚白淨過，而Dylan唔係好似我嗰種，佢嗰種青澀，代表咗人生呢個階段係一個過渡時期，係好美好嘅年代，有純真嘅年代。」
時日如飛，當少年成了大叔，真正的少年，十分容易滿足。
「18歲之後第一件事，除咗換身份證，我都有入場睇咗套3級片，就係《Deadpool》！」
年齡只是數字，青澀之下，蘇文濤對這次旅程，也有自己的想法。
「我發現演戲幾好玩，因為好似令自己人生豐富咗，好似過多咗另一個人生。例如我自己，我可能讀完書出嚟做老師，我𠵱家去做戲，體驗咗多一個人生，雖然呢個人生未必好好，係一個殺人犯，但至少我體驗了咗，明白個心情會係點。
「做戲可以做多啲唔同嘅嘢，體驗多咗，其實我之前有諗過做社工，因為做社工會見到好多唔同類型嘅人，見到唔同類型嘅人，會擴闊自己嘅視野。」
要豐富人生，時間就是本錢。
《東周網》訪談系列節目《星桄伴我心》11月重磅嘉賓：
黎諾懿夫婦互爆閨房樂事 慶結婚10周年
林保怡提名《金雞獎》影帝 送花冧李珊珊 激罕親揭秘密關係
周吉佩牀前唱歌送別：「爸爸聽到眼角滴淚，先至斷氣！」
梁敏巧哭訴阿媽爛賭輸層樓 悲慘身世揭秘
《東周網》訪談系列節目《星桄伴我心》12月重磅嘉賓：
肥媽攬屍唱情歌 憶亡夫飲泣 搵胡楓哭訴對話大公開
