發佈時間：09:22 2023-08-19
樣靚身材好的郭奕芯（Ashina），近年備受ViuTV重用，除獲安排主持節目外，還有份參演《打天下2》及《法與情》等劇集，令她人氣急升。近日，她更被一間年輕時裝品牌睇中，邀約拍攝宣傳照片，並獲得6位數的可觀酬勞。
拍廣告搵真銀固然開心，但卻𣎴及與偶像合作那般興奮！自爆是「生粉」的Ashina，在《打》劇中，能夠與偶像、MIRROR成員江𤒹生（Anson Kong，AK）合作，兼有夢寐以求的近距離接觸，且有幸獲男方英雄救美，以及拖手仔狂奔，令她回味無窮，就連富貴男友都懶理。然而，男友並沒有因此而呷醋，還不辭勞苦凌晨接收工，錫到爆！
現年27歲的郭奕芯（Ashina），因擔任七仙羽主持的《七救星》嘉賓及主持《七福星》，而人氣急升，並受到ViuTV重用，獲安排參演由江𤒹生（Anson Kong，AK）主演的劇集《打天下2》，以及由謝安琪、陳靜主演的劇集《法與情》。此外，她由於英文名跟一間年輕時裝品牌的名字十分相似，故獲邀拍攝宣傳照，更得到6位數的酬勞。拍攝當日，她以短褲示人，大晒一雙美腿，並換上多套輕便服裝，對住鏡頭「自動波」擺出不同甫士拍照，態度專業，令客戶直竪拇指。
提到跟AK合拍《打》劇，Ashina就自爆是「生粉」，今次戲裏戲外都可以與偶像近距離接觸，是她夢寐以求的：「MIRROR入面AK係我比較鍾意嗰種類型，我之前有諗過，如果可以同佢拍戲就好喇！因為個角色講我鍾意AK，我同AK有好多對手戲，真係好開心呀！我覺得佢好charm、做嘢認真，同埋會好take care對手⋯⋯」不過，害羞的Ashina，私底下卻不敢主動跟對方說話。劇中有一場AK英雄救美戲，令她十分難忘：「其中一場打鬥戲，佢救我，拖住我跑，我覺得行動比說話更重要，呢啲肢體上嘅互動會比說話更加深刻。」
親自下廚
Ashina如此迷戀AK，男友Brian可會呷醋？她直說：「我冇理佢喎！我覺得男仔心態，唔多唔少都會有啲嘅。」雖然Ashina懶理男友感受，但男友依然對她十分照顧，還做「柴可夫」管接送：「當時經常拍到凌晨，佢日日都嚟接我收工，等3、4個鐘佢都係咁等，我都覺得幾感動，同埋我做完嘢好攰，佢會幫我按摩，幫我吹頭，佢好好，好細心，同埋佢又鍾意做家務。加上我比較懶散，佢都會幫我執手。」其實，Ashina不時會為男友親自下廚炮製美食，製造驚喜，鎖住男人的心，先抓住他的胃，她當然深明此道！
