發佈時間：15:35 2026-04-04
昨晚（4月2日）一集《正義女神》另一焦點劇情，是《萬千星輝頒獎典禮2025》「最佳女新人」得主倪嘉雯飾演的補習老師Lydia。倪嘉雯在劇中一改一貫清純氣質，飾演開放又貪玩的補習老師，不但幫高成彬（劉倬昕飾）補習時顧住玩電話，一聽到可以未夠鐘就落堂去玩時，更興奮到跌到成地係筆；Lydia俯身執筆期間，由於身穿低胸衣服，令高成彬動了歪念；之後高成彬與Lydia相約行山，期間高成彬向Lydia露出陰森笑容＋古怪眼神，令大批網民擔心Lydia安全。
同陳自瑤、徐淑敏、龔嘉欣撞樣
雖然Lydia生死掀動不少網民情緒，但有網民卻錯重點大讚倪嘉雯顏值。為了突顯Lydia對高成彬的吸引力，劇組刻意將「登山Lydia」拍到仙氣爆燈，加上倪嘉雯的無敵甜笑，圈粉力極強，令第四集在內地播出後，網民對倪嘉雯的顏值高度好評，更有人指她是陳自瑤＋徐淑敏＋龔嘉欣混合體：「TVB真會選角，Lydia好好看」、「樣子很有辨識度，不是一般網紅面」、「像Yoyo剛出道時的樣子」、「又美又年輕」、「很甜很正氣」、「目前新生代就對她有好感」、「很有靈氣」、「很適合演黃蓉」。
獲陳煒傳授防走光秘技
極受內地香港網民歡迎的倪嘉雯，笑言Lydia算是她拍劇以來最大「尺度」角色，並笑言有即場向陳煒請教防走光秘技：「因為我之前都係接開乖乖女角色，所以呢個對我嚟講都算係大挑戰嘅角色，因為我之前都冇演過咁大尺度。我好記得拍心口走光嗰場時，我好疑惑點樣先唔會真係走光，好彩當時現場煒哥咁啱喺度，我就請教佢，好多謝煒哥教我點做好防護措施，因為我真係冇經驗，唔知點樣保護好自己之餘，又可以配合到鏡頭拍到個效果。」若細心追劇，不難發現倪嘉雯拍攝相關場口時，一度緊張至心口及雙腿通紅，相當可愛，倪嘉雯亦坦言拍攝時候其實蠻緊張。
讚劉倬昕私下勁活潑又幽默
而談到首度合作劉倬昕，倪嘉雯透露她和劉倬昕私底下相處勁愉快：「其實劉倬昕本身好活潑開朗又幽默嘅人，同埋我覺得佢好犀利，佢一Roll機就可以秒變好恐怖嘅高成彬。我知道佢呢個角色好難做，但佢都Handle得好好同事前做咗好多功課。同埋行山場口，佢都有好Take Care我，因為啲山路都有啲位幾難行、拍嗰日又大風，佢都會扶一扶我。」
2026年奪「最佳女新人」獎
現年30歲倪嘉雯於2020年加入無綫電視，成為旗下基本藝人合約藝員；同年因在處境劇《愛·回家之開心速遞》的演出而受到注目；2021年4月，她加入兒童節目《Think Big天地》擔任主持，同年8月過渡成為《Hands Up》主持。入行幾年，她先後在劇集《換命真相》、《雙生陌生人》、《十八年後的終極告白2.0》、《隱形戰隊》、《破毒強人》和《新聞女王》。2026年1月，倪嘉雯於《萬千星輝頒獎典禮2025》中憑《虛擬情人》、《新聞女王2》、《美食新聞報道》三套作品獲頒「最佳女新人」獎。
