發佈時間：09:00 2025-03-16
跨界藝術家馬興文﹙Simon﹚近年銳意將其藝術創作走向國際，除了上海基地，更進軍中東杜拜開設展館，今年他更會在香港舉行多個大型水滴展覽。
以往返港多住酒店的他，去年索性買下一艘泊在銅鑼灣避風塘、長70呎的大型遊艇，再改裝成為其香港居所，「這艘船有3層共3000呎，有廳、有房，仲有party room，最正係有個無敵海景，農曆新年仲可以邀請大班朋友嚟睇煙花，真係物超所值。」
維港煙花景
馬興文去年初買入這艘遊艇後，隨即花上百多萬港元進行裝修，並命名為「小龍馬號」，停泊在銅鑼灣避風塘。這天《東周刊》記者到訪，先在世貿對出的炮台碼頭登上駁艇，然後駛到近天后的泊位登船。
由陸上住到水上，Simon說：「李丞責﹙玄學家﹚話過我五行欠水，加上我呢幾年做水滴藝術走向國際，心諗不如就住埋喺水上面。去年初去睇船，睇咗兩周就買入呢隻長70呎，面積達3000呎的大型遊艇。在這裏住了大半年，感覺好自由好舒服，同埋喺水上面份外寧靜。因為平時工作好忙，返到嚟可以俾到一個空間去淨化自己，有時坐喺甲板上望住個海，突然會有好多創作靈感。」
而他坦言最喜歡是有個無敵海景，「呢度360度都係水，除了望晒成個港九兩岸維港景色，每逢節慶大型煙花或無人機匯演，都可以無遮擋近距離觀賞，剛過去的年初二，我都邀請咗大班朋友上嚟睇煙花。」
太陽能發電
全艘船高三層，中層是長方形巨廳，除了擺放了大型梳化，還有空間擺放音響和樂器夾band；近船頭位置是主人房和衣帽間，擺放king size睡牀還可以三邊上落牀，空間感十足。上層是飯廳、廚房和酒吧；下層則是健身、瑜伽室、兩間客房，和機房的所在地。
「地方夠晒大，呢啲屋喺陸上要過千萬，呢度七位數字搞掂，對我嚟講確實物超所值。其實媽咪都有屋喺西貢，但我的工作室喺南區，出入時間長唔太方便。之前返嚟香港都係住酒店，3年使咗7、80萬，都住得好侷促，加上唔係自己地方，有時想布置吓都好多限制，𠵱家就自由好多，無論燈光、音響、擺設，鍾意點搞就點搞。我又裝咗太陽能發電，連引擎都唔使開就有電用，全船每年維修保養費用都係有限數。」
開P夾band
船上面積大，除了作居所，Simon亦不時招待朋友上船耍樂，「我經常會請朋友嚟食飯、飲酒、食雪茄，有時又會開派對和夾吓band，工作以外有番啲生活品味。呢度最好係周邊嘅船冇乜人住，有時玩夜咗都唔使擔心嘈到人。閒時一個人我就鍾意喺船上做吓運動同做瑜伽，有時望住個海都好relax。」
他表示，正計劃買多一艘快艇，「下一步要買架快艇仔，到夏天就可以出海玩吓wakesurf，或者出海釣吓魚，甚至開去鄰近島嶼食海鮮。」
雖然出入都要駁艇，但他卻習以為常，「呢度有船家提供接駁，Call船五分鐘內到，話晒上岸就係銅鑼灣，去邊都方便。因為泊喺避風塘入面，船身長時間都好平穩，有風有雨係會搖啲，到打風咯，梗係返上岸啦！」
延伸內容：行運一條龍 馬興文
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
即睇：李珊珊罕談舊愛錢嘉樂 剖白患驚恐症瀕死感覺 : 我會活好呢一生!
即睇：朱慧敏第二胎B仔出咗世啦！分享懷胎湊B心得 收蘋果批做結婚周年禮物 又喊又笑講「愛的宣言」
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
