發佈時間：18:36 2025-09-15
這是一個神奇的領養故事，狗奴才Nat日前在threads分享自己的領養經歷，她從狗場領養了一隻皮膚病及感冒的狗狗，帶回家眠乾睡濕悉心照顧，回復健康還原靚靚樣子後，與家中原居民狗狗相處融洽，她為兩狗進行DNA測試，竟發現這位被繁殖場遺棄的新狗，竟然與家中愛犬有親屬關係！
只要有愛，流浪漢都變王子
她在threads分享：「今年5月睇到有一隻狗可以領養，就係睇得兩幅相咁多，1日之後我就去咗接佢。本身知道佢係有感冒係咁咳同鼻水，都覺得唔緊要啦，接咗佢先再醫。點知醫生發現除咗重感冒原來佢全身生廯，甩毛爛肉，我哋每日兩次全身清洗傷口搽藥膏藥浴剃毛，同屋企原住民隔離，消毒全屋（因為亦可以傳染人）。再食抗生素同抗廯藥，歷史三個月，七月嘅時候佢終於可以完成隔離同原住民一齊玩！
亦都喺七月嘅時候同佢做咗個狗嘅DNA Test，神奇嘅事嚟啦。。。結果發現我領養嘅，係我隻原住民嘅近親！DNA相似度係20.8%，問咗研究機構，發現原來佢哋係爸爸嗰邊嘅堂兄弟或者係half brother！
所以，命運我領養咗自己隻狗嘅親戚！！！！！」
根據研究機構所說，Pickles和Nachos來自同一個父系祖宗，兩狗關係是堂兄弟或疏堂兄弟！
「到而家我都覺得成件事好奇，狗場狗狗都可以逆襲，只要你有有愛，流浪漢都變王子。
最尾加一個Pickles自己去wee wee嘅video，喺狗場大嘅佢係唔識定點去toilet㗎，我每日要同佢換兩三次床，換左3個月，不過佢真係嚟報恩，訓練咗一個禮拜佢已經識聽wee wee指令，而家自動去toilet唔使擔心啦！」
Nat希望透過分享自己的經歷，令更多人在考慮養寵物時可以選擇，帖文還特別加上#領養 #領養狗狗#領養代替購買等字句。
感冒+全身生癬 治療大作戰
Nat是一名從英國回流香港的解剖化驗師，現於醫院任職。回流香港後，第一隻狗狗是購買的，是一隻約瑟嗲利狗仔，名叫Nachos。Nachos備受疼愛，過着王子般的生活。Nat由於工作關係，未能時時刻刻都倍伴Nachos，在她六個月大時想為牠找個伴。
「領養嘅原因係我覺得自己好愛Nachos，覺得既然我可以咁愛一隻狗都可以分啲愛比其他冇屋企或者缺愛既狗狗，所以決定下一隻狗都會領養。」
在機緣巧合，有朋友傳了一隻被繁殖場拋棄、外貌像約瑟的狗狗相給Nat，相片只有兩張，並不特別漂亮，Nat考慮了一日就決定接回家，並改名為Pickles。
Pickles當時是一隻病狗，Nat帶牠見獸醫檢查發現正感冒中，而且身上皮膚受真菌感染，除了要服一周的抗生素治感冒，之後兩服40天的抗生素治療皮膚病，加上抗真菌治療藥物，這期間牠的額頭和耳朵都有大片脫毛斑點，每一處皮膚在紫外光燈照射下都發光，顯示仍然有癬，必須把牠的毛剃光，方便塗藥。
Nat每天早晚都要幫牠消毒，給牠吃藥，抹上藥膏。同時要將牠和原居狗隔離以免傳染。
經過一個多月的特殊照護和每周覆診，Pickles終於康復！可以開始和Nachos相處，學習做好朋支，好兄弟。
感恩遇上牠們 成為一家人
狗奴Nat說，Nachos經DNA檢測確認是一隻純種茶杯約瑟爹利，嬌生慣養，膽小又挑食，體重少於1kg。Pickles外貌像約瑟嗲利，比較細粒，領養後獸醫評估約一歲，但已經滿口牙石，可想而知繁殖場生活多惡劣。「佢嗰陣已經知道佢有感冒，去到獸醫度更加發現嚴重皮膚病、滿口牙石。獸醫估計佢一歲，所以只比Nachos年長幾個月左右。 冇得退縮，所以就醫足三個月。」
Pickles完成康復後Nat為牠安排DNA測試，主要想知道牠有沒有遺傳病及確定牠的品種，因為很多時疾病都與品種有關，Nat希望及早做好準備，讓兩狗有更好的照顧。結果DNA檢測竟然為家中狗狗尋回家人！「好神奇咁發現Nachos係佢爸爸嗰邊嘅近親。而Pickles就係91.1%約瑟血統、8.9%北京狗。」
「醫佢嗰陣真係好辛苦，每個禮拜去醫院複診，每日全身消毒傷口，食藥搽藥膏，足足三個月。不過到頭來望返真係好值得。如果我唔接佢走、唔醫佢，可能已經被人道毁滅咗。但係而家我搵到Nachos既親人，仲做埋我隻狗。
希望真係可以推廣領養呢樣嘢，令到冇人要嘅狗狗有一個屋企，未必真係會搵到有血緣嘅屋企人，但係佢哋有個家就夠㗎啦。」Nat說。
