發佈時間：18:02 2024-03-13
做雙職媽媽，要面對巨大的家庭及工作的雙重壓力，然而當全職媽媽，冇糧出冇假放，on call 24小時，壓力更大！不少丈夫常以為太太在家照顧小朋友，打理家頭細務，尤如歎世界做少奶奶，未有體諒箇中「單打獨鬥」式的全方位應付家中的大小事，往往成為夫妻間爆發衝突的原因。日前一名港媽在Facebook專頁「十萬個惡頂老公的惡行」爆seed：「我真係好x嬲！」力數另一半的「謬論」！
港媽：我真係好x嬲！
該名港媽自稱全職湊仔，雖有家傭幫手，但忙到「每日都唔夠瞓」，最近和老公吵架，因對方從來未有欣賞及體諒她為家庭的付出，反而以「睇唔起」的態度，聲稱「全世界女人都識生仔架啦，又咩咁巴閉？」，港媽說：「佢話求其係街搵個工人都可以代替我，唔使我湊小朋友都無問題！」
港媽發文：「我係全職湊小朋友，雖然辛苦，但我覺得可以見證小朋友成長好開心，滿足感多過打工好多，但依條友（丈夫）就睇我唔起，完全唔欣賞我嘅付出，當然我都有鬧爆佢，覺得佢好廢，又幼稚又無能，又唔識教小朋友，自己有唔如意就搵我來鬧，係出面就扮晒好好先生，成日係度發窮惡。」她續稱曾以「無錢唔好學人生B」為由，「警告」丈夫對生兒育女要深思熟慮：「佢又自卑，根本唔適合有小朋友。」
斥老公自卑是廢人
港媽說曾嬲到離家出走兩天，因難捨骨肉而返家，更言到現在都「仲好X憎」丈夫，又以「廢人」形容：「一直到而家我都仲好x憎佢，無本事的男人先會將自己無能賴落另一半度，真係好廢。自問我打理頭家好好，外人都覺得我湊小朋友湊得好，教得好，得佢一個對我極不滿。識咗佢十年一啲都無進步過，仲係停留係十年前思想，我發覺同佢步伐差好遠，雖然我無做野但我眼界都高過佢，十年來人都不斷進步睇嘅嘢都唔同咗，但個廢人仲原地踏步十年前，日日話唔知幾多年前菠蘿包$3個，真係唔知佢點解思想咁老，真實年齡唔係咁老，但思想係上一代的思想，真係好廢！」
網民反指拜金不體諒
港媽這段帖文引來大批網民熱討，有些網民替男方不值：「有工人，仲想點？」、「人哋養起成頭家，有工人唔使你做，咁叫廢？咁多聲氣你唔去做嘢？又話窮？」、「永遠責任不在我方，最衰都係個老公當初死纏爛打追樓主，搞到樓主冇得去識富豪」、「你又話佢錢小，但係佢又養得起成頭家仲請埋工人，真係唔知你心目中嘅搵得多係幾多？」
見被網民圍插不知足不體諒，該名港媽留言補充，指很多朋友做全職媽媽，但有3個家傭兼有司機：「老公搵好多，7萬幾租間屋為咗小朋友返學都有，其他嘅媽媽有幾層樓收租，呢啲老公咪叻囉！如果我老公提供到呢啲畀我，佢鬧我廢，我都無話可說。但佢而家提供緊啲普通、大部份家庭都有，有咩咁巴閉有咩咁叻？」
港媽繼續補充：「我唔欣賞佢咩都向錢看，有錢先至等如有付出，只要佢講句：『知你好辛苦』，我已經感覺好好。無論咩事都入我數，自己唔夠洗，屋企人負擔，咩都入我數，我真係好無奈」
也有網民反問港媽為何不轉型找工做，甚至質疑她拜金：「老公窮你又嫁？」港媽回覆稱不會去找工作：「點解你又要女人生，工又要女人做？啲男人有咩做呀咁？一啲都唔公平！」、「咁佢咪好着數？負責畀幾粒精子我，又有工人服侍每日返嚟食瞓痾，仲要我出埋去做嘢幫佢，咁點解佢唔負責生仔？完全唔公平！」、「即係代表我偉大囉，咁窮都肯嫁，代表我唔係拜金囉，佢唔掉返轉多謝我咁窮都肯嫁肯幫佢生小朋友？」
