愛情是什麼？真的又Pure又True？無綫節目《東張西望》在周日（5日）開始報道的一段「爺孫戀」，成為全城熱話！主角是一名76歲老翁「何伯」喪妻9年後，在街市邂逅一名43歲的內地女子，飲湯飲出真感情，乾柴遇上烈火，3個月內即應女方要求火速結婚，男方更送贈共值近30萬元的鑽戒及名錶，以表一顆不變心。

本身已育一子、身為單親媽媽的內地女子，升呢做「何太」後，更要求何伯提取100萬元做餐飲生意，立刻驚動何伯五名子女的「提子」本能，懷疑有人是「騙子」，對父親另有企圖，屢勸無效下，關係破裂，幼女不單提防騙子，更提走和父親聯名戶口內450萬元積蓄，只剩4千多元！何伯投訴銀行指聯名戶口是「雙簽」才可提款，但銀行稱該戶口本屬「單簽」！何伯憤而採取「報東張」行動，和愛妻聯手血淚大控訴！

何太：鬧我臭X！

何太戴着名錶又晒疑似Hermes的手袋，更連環晒喊功，陪伴何伯繼續在昨晚（6日）於《東》現身說法。何伯聲稱多次致電子女不果，就算染上新冠肺炎，子女亦不聞不問，更稱幸好有愛妻風雨不改的陪伴，他說：「我對呢五個仔女失望心淡，五個都不孝！個個都反骨！我娶個好太太，應該戥我開心啦！冇呢個老婆喺度，我點算？邊個服侍我呀？」

聲言會照顧何伯一世的何太，果真為了偉大的愛情，榮辱與共，她一時邊哭邊攬着何伯：「佢（何伯）唔應該受呢啲苦嘛！」一時勇字在心口：「佢哋搏命鬧我，鬧到我都怕咗，都唔敢再聽佢哋電話啦！佢哋鬧我『姣X』、『臭X』、『大陸X』，仲有死八婆咁囉！我即刻Cut線就算，我一句都冇出聲。」

大女要攬炒

何伯說：「大女又話同我斬纜，又話同我攬炒呀咁！老竇幾十歲……攬炒？你咁後生同我攬炒？我咪咁話佢囉！後尾佢又唔聽我電話。」他更指大女曾在凌晨12時至清晨5時，無間斷致電他50次，又寫訊息：「我親愛的父親，你死咗未？咁耐都唔覆電話。」

本住在二子家中的何伯，和子女缺裂後，二子更換門鎖，不得其門而入的何伯，搬往太太家居住。何伯更帶《東》到二子家家門前，親自示範「冇門口入」的一幕：「有褸、有衫，喺我間房度，鎖住晒，攞唔到。早15日前仲同我太太返過嚟，同我攞過些少嘢，而家換咗鎖囉，返唔到入去！」

何伯指細女調走定期存款內的450萬元後，拒接聽他的電話，何伯帶《東》到細女工作的醫院等待，未能成功見面：「佢好冇人情味！3月份我哋去搵佢，我老婆笑笑口對佢好好禮貌，點知佢雙眼倔實我老婆，好似想殺人咁。」更指細女表示要報警，而何伯致電細女老公，遭粗口回敬。

何伯食藥自殺？

何太心痛何伯被子女離棄，忍不住數度落淚：「好難受，心痛我老公夾喺中間，佢啲仔女咁樣對佢。佢唔應該受呢啲苦，佢人咁好。佢哋唔錫我，都錫吓佢呢個老竇啦！」她更大爆何伯曾一度輕生，在洗手間服食大量藥物：「佢嘔到成口都係血，佢頂唔順，拉開門，我一睇嚇親我，個缸全部係血。嗰時我都唔知點算，我話：『你唔可以死，你死咗，第日你啲仔女嚟搵我算帳』。如果真係死咗，我就成咗罪人。」

被懷疑是騙子的何太，堅稱對何伯是真心：「有啲人畀人呃咗錢真係好慘，但我唔會！我會照顧佢，有一啖飯食佢就有，我唔會畀佢餓親。生意失敗嘅話我都會打工養佢，佢唔使憂！」選擇與太太繼續生活，寧和子女反目的何伯說：「嚟咗咁耐，佢服侍我咁耐、照顧我咁耐，證明我冇娶錯呢個老婆啦！」

網民叫何太打工照顧提款基2.0

何伯的血淚大控訴第二集昨晚（6日）播出後，再掀起全城網民熱議，大批網民稱何伯變了「提款基2.0」，完全是李龍基的翻版，又指何伯的子女們是用心良苦，目的是不想父親受騙，又指何太為真愛，可以打工養何伯：「好彩有仔女把關，唔好再錯落去，及早回頭！」、「何伯，到時你冇自理能力，佢仲肯照顧你，就係對你真嘞！」、「全民反詐騙！」、「何太，何伯下半身同下半生都交畀你！」、「何太你出去打工啦！賣晒啲首飾就有錢！」、「何伯瞓醒未？」、「扮喊，扮到好假！一滴淚都流唔出！」

同時也有網民指，即使認為何伯喝了「迷湯」，五個子女都不應以粗口或難聽語氣對待，網民留言：「雖然我感覺唔到呢位女士對何伯嘅真愛，但佢啲仔女咁對個老人家，都唔係咁好！」