發佈時間：19:20 2024-01-21
藝人洪永城及太太梁諾妍現正期待第二位千金「Sir face 2.0」的來臨，預產期是今年4月。向來熱愛跑步並曾參加馬拉松的梁諾妍，在周日（21日）參加渣打馬拉松的10公里賽程，佗B達7個月的她，以大約1小時4分鐘完成，而老公洪永城更在她背部貼了「Child in car」的貼紙，以提示在太太身後的參加者。
全程慢跑
梁諾妍在ig分享感受，說今次純粹享受過程，未有刻意挑戰之前的時間紀錄，笑言已當自己創了最佳個人紀錄（Personal Best PB）。「我選擇咗喺自己10公里組別入面排到尾尾先開跑，慢慢起步，頭3公里都比較塞人，唔緊要啊，我就慢慢塞慢慢跑，用自己最舒服嘅pacing去跑。好多謝所有過嚟同我講加油嘅朋友仔！我覺得我都PB咗㗎！係佗住2.0 跑步嘅PB。」
「今次嘅參與唔係想證明俾人睇孕期期間都可以去跑個10公里，只係想鼓勵媽媽們，喺自己身體許可下，了解自己身體狀況下，繼續去做自己喜愛的事，自己能力範圍內做適量嘅運動、散步、yoga、pilates等等，絕對可以令孕媽放鬆心情，相信寶寶都會健康啲，每個媽媽體質都唔一樣，自己一定係最清楚自己身體狀況嘅人。」梁諾妍說。
網民正反意見：任性自私！
梁諾妍佗B跑步非首次，她懷第一胎時仍繼續保持跑步的習慣，而她本身是長跑教練，曾考獲長跑、健身及HIIT（高強度間歇訓練運動）的教練牌照。賽後她獲大批網民力讚是「最強孕婦」，指她打破「孕婦不能做運動」的偏見，網民留言：「我佗B攰到唔想行，你好勁！」、「點解可以咁好體力？有跑開真係唔同！」、「大肚婆都跑得快過我，慚愧！」、「應該有2個獎牌喎！」
網民意見有正反兩極，有不少網民替梁諾妍擔心，更有網民直斥她自私！網民留言：「生仔要考牌系列！跑少次唔得咩﹗」、「跑步年年都有，點解要冒險？太任性太自私！」、「跑唔係問題，但要人睇路又要人小心，將個風險同責任分散咗落其他跑手同工作人員身上，其實有少少自私！」、「要人哋就住你跑，咁跑嚟做乜？人哋撞到你有事邊個負責？」
以上意見也有網民駁斥：「有做開運動嘅話，大肚都可以繼續做運動！」、「如果係照顧到自己，有諮詢過醫生建議，合適同安全嘅運動對媽媽生B時係有好處！」
孕婦運動前須諮詢醫生
孕婦參加馬拉松或田徑賽事近年時有聽聞，台灣女星任家萱（Selina）去年佗B三個月時參加3公里賽事；美國長跑運動員Makenna Myler去年懷孕9個月時，參加了1.6公里田徑賽事，創下5分17秒佳績。運動始終有益身心，無論進行任何運動，孕婦一定要清楚個人身體狀況，須諮詢家庭醫生的意見，切勿「有樣學樣」，仿效其他孕婦的運動習慣！
美國婦產科醫學會（ACOG）曾指出，在大多數正常健康情況下，只要是非高險運動，在安全的範圍內運動，不會增加流產機會，反而「靜止不動」零運動，可能會影響孕婦健康。而孕婦進行運動時，最重要是建立穩定核心力量和關節活動能力，如要跑步，速度不宜太快，要注意重心平衡，避免跌倒受傷，可選擇平坦的道路如公園的跑道、田徑場或跑步機。
曾在佗B六個月時跑馬拉松的美國婦產科醫生Amanda Williams提出，在孕期跑步，是為了身心健康外，更是為分娩做準備，又指在孕期全程運動的孕婦，更能面對生產時的疼痛，增強自信，有助平衡高低不定的荷爾蒙，以及減低焦慮感。
