發佈時間：01:15 2025-02-06
《903 發 賀歲波》今日（5日）大年初八在車路士足球學校順利舉行，由林海峰和余德丞等組成的「903 UNITED」，對戰柳應廷@MIRROR、林家熙（Locker）、洪嘉豪和胡子彤等組成的「FC3」及YanTing周殷廷帶領的「二月五號足球隊」。經過3隊人馬激戰3場，最後由「903 UNITED」奪得金牌，銀牌和銅牌則由「FC3」及「二月五號足球隊」分別奪得。得第二的阿Jer柳應廷表示輸波因太緊張；同隊的Locker則稱Jan哥哥林海峰太勁，比賽時像隱形一樣，希望之後繼續練好球技，下次可勝出！
賀歲波由3支隊伍參賽
《903 發 賀歲波》為7人足球賽，採用單循環賽制，共進行3場比賽，每場賽事30分鐘，並由馬啟仁（Keyman）現場評述，吳兆庭及譚伯得擔任裁判，並邀得一眾樂迷到場打氣。每場勝方得3分，負方得0分，賽和各隊得1分；由3支隊伍「903 UNITED」、「FC3」及「二月五號足球隊」爭奪金、銀、銅牌。「903 UNITED」由叱咤903《在晴朗的一天出發》、《口水多過浪花》、《聖艾粒 LaLaLaLa》及《強大人 Get Set Go》結集足球強人組成出賽，隊員包括：林海峰、黃志淙、當奴、傑朱、余德丞、阿強、Jeff、天欣@881和Agent L，以及香港足球代表陳肇鈞、蔡子濤、陳正勤、陳加邦及鍾景恆，並由丘建威擔任教練。
FC3集合音樂界台前幕後
「FC3」集合音樂界台前幕後，成軍後首次出賽，隊員包括：洪嘉豪、柳應廷@MIRROR、胡子彤、林家熙、吳肇軒、陳家樂、周志文、馬志威、黃溢濠、黃梓僑、李子俊、吳家偉、鄭敏、文國駿及香港足球代表蘇宸褕（灰熊），並由陳偉豪擔任教練。「二月五號足球隊」由網絡成軍，隊員包括：YanTing周殷廷、許賢、米爺、朱Mic、蘇致豪、贊師父、近南哥、文Sir、Mario Hau孝仔、Ern9、含爺、狼少、良少、阿J、雞翼和香港足球代表范俊業及顏卓彬，並由陳浩然擔任教練。
「903 UNITED」贏得金牌
首場賽事由「903 UNITED」對戰「FC3」，「903 UNITED」隊長林海峰、香港足球代表陳正勤及陳加邦各入一球，以3比0大勝「FC3」。第2場賽事由「二月五號足球隊」對戰「FC3」，輸了首仗的「FC3」，由洪嘉豪及黃梓僑各入一球，以2比0取得勝利。第3場賽事則由「二月五號足球隊」對戰「903 UNITED」，香港足球代表顏卓彬為「二月五號足球隊」先入兩球，之後反被余德丞施展帽子戲法連入3球，陳加邦再入1球，令「903 UNITED」以4比2反勝。結果由「903 UNITED」贏得《903 發 賀歲波》金牌，銀牌及銅牌則由「FC3」及「二月五號足球隊」分別奪得。
洪嘉豪挑戰職業龍門范俊業
洪嘉豪在第2場賽事為「FC3」踢入致勝一球，他在賽後指：「守龍門嗰個係職業龍門范俊業哥哥，其實細細個已經聽阿爸講范俊業有幾勁，今次有機會同佢踢波，我仲入咗個Legend波，都覺得自己成為一個Legend，真係好開心！上次903 AllStar足球賽輸咗，今次又輸，希望嚟緊可以搞多啲大型足球賽畀我哋報多仇！」
柳應廷稱輸波因為太緊張
阿Jer柳應廷上次在903 AllStar足球賽大玩帽子戲法對於，今場未能入波，他續稱：「今場試射咗4、5 腳，雖然冇入波，但都覺得好難得，因為我喺賽前定下目標，就係要入范俊業個龍門，但原來真係好難。其實另外兩隊嘅實力都好強，大家落到場比賽，贏嘅決心都好強，特別係港超聯球員好犀利，1個扭3個，引晒啲球員過去，今日我哋輸，主要因為太緊張。」
胡子彤靠做好防守和傳波
負責踢中後場的胡子彤指：「我今日盡力做防守同埋傳波畀佢哋，第1場發揮得唔係特別好，好多隊友都好少有正式比賽，相對綁手綁腳。第2場就調整好心態，好彩有教練陳偉豪幫手。FC3逢星期六就會練波，想每個星期搵一日閒日可以約一場友賽，我哋真係當一個球會去做，想有恆常訓練同比賽，同埋做School Tour。今日係我哋FC3成軍後首場公開比賽，今日嘅表現係100分，因為第一次同大家見面，心態其實好好，而球技就會繼續努力練好啲。」
林家熙大讚林海峰好技術
擔任「FC3」隊長的林家熙指：「今日嘅表現未如想像，畀自己70分，因為太多顧慮。而Jan哥哥（林海峰）超勁，佢喺比賽中會隱形咁，但突然又會出現，真係以為佢踢緊職業。之後我哋FC3想報7人或11人聯賽，球會要交會費，會Keep住練波，仲希望去到唔同嘅中學踢School Tour，拉近同中學生嘅距離。」吳肇軒則指：「其實我係初次接觸足球，今日冇大失誤已經好開心，而兩隊都比我哋想像中強。」
延伸內容：《903 AllStar 籃球賽》排球熱身賽激戰 Stephy讚Anson Lo Set波好 Ian輸波話會復仇
延伸內容：叱咤頒獎禮第4場校園巡演 洪嘉豪即興與男同學台上合唱 中六女生放膽獨唱好感動
延伸內容：Gin Lee與6大學院校表演團體 進行終極大匯演 讓每位學生發光發亮
