發佈時間：19:12 2024-10-19
由叱咤903主辦、麥當勞協辦的《903 AllStar 籃球賽》，將於11月23日（星期六）假亞洲國際博覽館AsiaWorld-Arena舉行，屆時「九零三人隊」會熱鬥「歌星勇士隊」。本月率先舉行一連四場《903AllStar 熱身賽》，包括：羽毛球賽、乒乓球賽、排球賽及足球賽，為兩隊加操備戰。昨日（18日）舉行第3場熱身賽《903 AllStar 排球賽》，一共鬥3個回合。結果由朱薰領軍的「九零三人隊」以2比1大勝由鄧麗欣（Stephy）領軍的「歌星勇士隊」，勇奪金牌。
歌星勇士隊敗陣
「歌星勇士隊」由隊長Stephy率領隊員Gin Lee、Elka@Lolly Talk、阿妹@Lolly Talk、Anson Lo@MIRROR、Ian@MIRROR、Jeremy@MIRROR、Ada@VIVA、ValC@VIVA和葉巧琳（Misha）。「九零三人隊」則由隊長朱薰率領森美、Donald、Jacky、Jeff、如、梁子、梁文禮、志淙及金，再聯同6位中學校隊成員迎戰。當日戰況激烈，「歌星勇士隊」首場以26比24先取一局，「九零三人隊」第2局則以25比22追平，而最後一局更取得25比19，以局數2比1戰勝「歌星勇士隊」，勇奪《903 AllStar 排球賽》金牌。
Gin Lee拉傷小腿
Gin Lee稱自己已有25年沒有打排球,已特別為今次比賽相約師妹VIVA一齊練波，卻拉傷了小腿：「小腿個位一發力就痛，痛到我要懷疑人生，醫生話至少兩個禮拜先好番，可以做嘅治療都做晒，今日就靠晒師妹Ada同ValC喇。」Misha續說：「喺中學打過排球，今日有一球判斷錯誤，以為Ian會打，所以打失咗。不過我都打得好開心，因為開波都贏咗好幾分。」至於Elka和阿妹在中學時期都有打過排球，Elka說：「我同阿妹特別搵咗教練練波，Ian同Stephy 又帶得好好。但有時我唔敢殺波，不過都盡咗力，都滿意自己嘅表現。」
Stephy畀3男滿分
從中一開始打排球、入選香港青年代表隊的Stephy，事隔多年再打排球感到興奮：「今日好多學生睇住，所以好緊張，我就唔滿意自己嘅表現。我同Ian、Anson Lo同Jeremy之前一齊拍《男排女將》，今日再一齊打波，好開心，拍劇嘅感覺返晒嚟，我一落場就叫Bobby做Setter，因為排球講求Teamwork，無夾過都可以咁有默契，我畀佢哋3個滿分。」
Ian話下次要贏番
獲Stephy大讚表現滿分的Anson Lo說：「我覺得我Set嘅波畀我想像中好，我本身好鍾意打排球，今日可以見番力圖一半嘅隊員，好似Re-union咁好開心。」Jeremy比賽期間發生一段小插曲：「今日有個蝦碌波，個波夾咗落塊面度，我就攬住個波唔識反應，成件事好搞笑。」前排球港隊的Ian稱十分享受今日的比賽：「今日打得好開心，學校現場氣氛好好，個個表現都OK。雖然今日輸咗，但我哋嚟緊一定會喺903 AllStar籃球賽贏番DJ隊。」
下周第4場熱身賽
第4場熱身賽《903 AllStar 足球賽》將於下周五（10月25日）下午4時30分在881903.com、「my903.com商業電台」Facebook專頁及「商業電台 Hong Kong Toolbar」YouTube Channel現場直播。
《903 AllStar 籃球賽》
日期：2024年11月23日（星期六）
時間：晚上7時
地點：亞洲國際博覽館ARENA
