發佈時間：01:02 2025-01-20
《萬千星輝頒獎典禮2024》頒發了多個獎項包括：最佳劇集、最佳男主角、最佳女主角、最佳男配角、最佳女配角、最佳綜藝節目、最佳資訊及專題節目、最佳男主持、最佳女主持、飛躍進步男藝員、飛躍進步女藝員、最佳電視歌曲，以及今年新設獎項最佳男新人、最佳女新人，以及海外獎項包括：大灣區最喜愛TVB女主角、大灣區最喜愛TVB男主角、大灣區最喜愛TVB劇集，以及馬來西亞最喜愛TVB女主角、馬來西亞最喜愛TVB男主角、馬來西亞最喜愛TVB劇集。張振朗、龔嘉欣、楊茜堯、張曦雯、馬國明等獲得視帝、視后殊榮。
相關內容 : 萬千星輝頒獎典禮2024 ｜龔嘉欣入TVB 16年首封「最佳女主角」 直言好似發夢咁
相關內容 : 台慶頒獎禮2024｜張振朗憑《反黑英雄》奪「最佳男主角 」成雙料視帝
龔嘉欣入行16年 首奪影后
龔嘉欣入行16年，今日憑《企業強人》奪得「最佳女主角」，登上視后寶座的她致感言時表現激動，她表示自己如同發夢一樣，坐在台下時曾經冇諗過自己有沒有機會奪得「最佳女主角」這個獎座，而拿上手的時候，真的覺得這個獎項很有份量。首次奪影后的龔嘉欣多謝高層曾勵珍、樂易玲、曾志偉、《企業強人》的台前幕後，包括拍檔陳豪、譚俊彥，張曦雯等。
大讚珍姐有情義 煮飯畀人食
龔嘉欣邊喊邊說︰「冇你哋，我唔會咁有信心去演好呢個角色，我覺得我好似這個角色，我19歲加入TVB，一路上有好多機會，亦遇到好多好好嘅人去幫助我，所以我今日喺度好想多謝每一位曾經同我共事過嘅同事，好多謝你哋嘅包容，亦都好想多謝畀過機會我嘅人。」龔嘉欣更多次強調要多謝TVB執董曾勵珍，龔嘉欣說 : 「珍姐！多謝你！你真係我見過一個最有情義嘅人，我哋好多時候遇到好多問題，我哋第一個一定係搵你，因為我哋知道你一定會盡全力去幫我哋，雖然我成日都好驚，因為我知道你一定會鬧我，但係我真係好鍾意你鬧我，你唔鬧我我就會覺得我唔重要。好多謝你成日鬧我，你圈我但係我都要多謝你，因為你真係一個會去用行動去幫我哋嘅人，成日都會將最好嘅嘢留俾我哋，為我哋嘅將來打算。你唔單止喺事業上面成日畀一啲意見我，你喺我人生上面亦都幫咗我好多，成日叫我要儲錢，好多謝你！我好想借大家嘅掌聲一齊多謝珍姐！珍姐，以後希望你繼續帶領我哋同公司一齊進步，冇咗你真係唔得，多謝珍姐！仲有邊有上司會咁好煮飯畀人食，珍姐！以後輪到我煮飯畀你食，希望我唔會失禮《在家宴客50道菜》。最後，我嚟緊……我應承過你，我唔會再做妹仔釘，我要行出嚟話畀大家聽，我經過咗16年喺公司嘅進步，我覺得我而家比以前更加有自信，用行動證明俾大家睇，我會係咁熱愛我嘅演藝工作，多謝大家！」
龔嘉欣爆冷封后 網民洗版喪畀嬲
龔嘉欣爆冷封后，即時有不少網民洗版戥楊茜堯唔抵，喪畀嬲，就有網民即時在TVB官方Facebook上，就恭喜龔嘉欣奪視后的帖文，紛紛留言發表意見，網友留言:「其實佢好多戲都做得好，但呢套真係一般，佢角色唔突出」、「唔係話佢唔好，但同楊茜堯比真係未夠班囉！」、「 估唔到係佢，仲以為係楊怡或者林夏薇」、「 佢真係未夠班，做黎做去都係果個樣」、「楊怡同林夏薇點會輸比佢架，佢攞真的太失望」。雖然有網友不滿龔嘉欣封后，不過都有網友認為她的演技出眾，奪得視后都是實至名歸的。
