發佈時間：08:59 2025-01-16
我手寫我心，是天賦，也需努力，最關鍵的元素，是靈感。
即使是元祖級文青系唱作歌手，黃凱芹也如是說：「我寫歌嘅靈感，有個人嘅經驗，亦有好多係睇書，或者係朋友嘅故事、睇戲，俾我嘅靈感、衝擊，其實咩都有。」
於8、90年代已是「情歌王子」，可想而知，除了創作，黃凱芹的歌聲，縈繞過多少樂迷的心頭。寫過近200首曲、詞，他的靈感，37年來也從未缺席。
「通常我除咗沖個涼，就係去廁所諗到，呢啲都唔會嘥好多時間。或者坐飛機、或者坐火車，都係好快。因為我嘅習慣就係，當我構想一個題材、一首歌嘅時候，我係連曲連詞一齊嘅，所以起貨係比較快。
「我真係冇試過超過一日嘅紀錄（寫歌），通常係幾個鐘之內，連曲連詞，最多係我喺錄音室嘅時候，有時自己改一隻字，其他都冇咩需要改。」
藝術系出身的黃凱芹，不只靈感如泉湧，即將與杜自持合作舉行《唱．2025 Live演唱會》的他，更是「至抵精明眼」。
「今次因為適逢有呢個演唱會，我同杜自持合作，我覺得應該有啲嘢揸手。所以我哋開會嘅時候，我同佢講不如佢創作新曲，我填詞。但係佢話佢寫曲會比較慢，因為靈感嚟得慢，編曲就嚟得快，叫番我寫。
「我呢啲人就打蛇隨棍上，叫佢編曲唔好收錢。我哋兩份開一個咁嘅音樂會，首歌我寫曲、詞，佢去編曲，好公平吖。開完呢個會，我即刻去沖涼，我就由沖涼嘅時候開始諗歌曲同歌詞，到第二日朝早已經寫好嘞，寫完之後即刻Send俾佢編曲，叫做〈陪你唱〉。」
我手寫我心，除靈感，信心也不可或缺。
將於1月舉行一連4場《唱．2025 Live演唱會》，黃凱芹笑言只差一點點就不成事。
「最初係因為製作公司，打算延續我《聽》嗰個系列嘅演唱會，因為我做過《聽》（2021年）、入行35周年嘅《細聽》同2023年嘅《聽》。但係，我已經做咗3次，我覺得應該係時候停一停。尤其係因為我出咗現場嘅唱片、CD，連金碟都出埋，除非有新嘅衝擊，例如搵個拍檔，或者有新嘅形式、搞作。
「後來製作公司Book咗場先話我知，咁一定要搵啲嘢嚟搞，我真係好頑固！我哋嗰個年代嘅歌手，一係就唔唱，一唱就要最好，所以我就提議搵音樂人合作。我同Andrew（杜自持）合作過好多次，由我出道中期到做Hi-Fi碟嘅時候都有，如果佢肯做，我就做，呢個係我嘅要求。」
多得杜自持一口答應合作，令The show can go on，讓黃凱芹也有一個跟老拍檔同台的機會。
「我第一次做個人演唱會，就係Andrew幫我嘅，係2002年我返香港做嘅演唱會。後來2004年又係佢，所以有佢喺度，我就覺得冇問題！」
力求完美的黃凱芹，對演唱會的宣傳海報，也有一定要求。
「我上網搵咗好多其他Reference，外國或者其他地方都有啲Design，我嘅要求就係我哋兩個合作，我希望張Poster有設計感。製作公司於是做咗好幾個根據我俾佢哋嘅版本，唔同顏色都有，但我就揀咗呢個黑白嘅，我覺得呢個係比較配合我哋兩個嘅感覺同氣質。𠵱家呢隻玻璃字體，係我搵返嚟嘅，字體透明得嚟又有色彩，因為我覺得純黑白，最好有啲點綴，所以如果我哋將來繼續唱，2026、2027、2028⋯⋯都用呢個字體就得嘞。」
唱作多年，黃凱芹也記得自己寫過的歌曲背後的故事，不得不先提的，是其首張大碟《Moody》的主打歌〈傷感的戀人〉。
「初初冇諗過係主打歌，但我就好想自己走創作人嘅路線，所以監唱片公司聽我寫嘅歌。
「寫嘅時候，我仲記得嗰一晚，因為當時我間房好細，得一張碌架床，我細佬瞓樓下，我就瞓樓上。總之喺佢瞓咗嘅時候，半夜三更，我就拎住Keyboard、戴住Headphone自彈自唱，錄呢首歌嘅Demo。
「但係𠵱家我聽番首歌，係有兩個後悔嘅。第一，我覺得自己放得太多英文喺入面，『I love you more than anyone』呢句，其實係可以用中文嘅，我覺得其實我可以寫得好啲；第二個後悔，就係我寫咗『擠熄了煙』，我自己唔吸煙，而且都好反對吸煙，但唔知點解當時嘅畫面，就覺得『擠熄了煙，滿腦疑問』好似好型，有啲不羈、浪漫，但其實係不必嘅。」
檢視過去，是生活的小趣味，膾炙人口的〈情深緣淺〉，也同樣可堪回味。
「〈情深緣淺〉呢首歌係我寫嘅，我仲記得寫完之後，交俾盧東尼編曲，佢𠵱家仲記得，當時佢編出嚟俾我之後，我同佢講我唔係要呢啲嘢，佢好記得我發脾氣。但係，呢個都唔係脾氣，係一個要求。因為當時我寫嘅時候，其實我係想要一首比較Bossa nova（波薩諾瓦）嘅歌，但佢編出嚟係好大路嘅4拍4嘅歌，未係我當日想要嘅嘢，所以印象好深刻。
「至於歌詞呢，其實當時我寫咗好幾張唱片嘅歌，想有少少新嘅火花，所以就搵林夕去填詞。佢填咗呢份歌詞，咁有情深緣淺嘅感覺，但佢改咗個歌名叫〈終於也知道〉，因為係首歌嘅第一句。
「咁啱嗰段時間，我嗰個年代有一間出版公司叫做友禾，出咗一本口袋書叫做《情深緣淺》，我覺得好有感覺，於是就拎咗嚟做歌名，出嚟嘅反應都好好。」
