發佈時間：20:19 2025-01-13
2025年《東周網》第一個直播訪問，就搵嚟「叱咤我最討厭男人」林作和「叱咤我最豬嘜女藝人」和田裕美做嘉賓。點解話裕美係「豬嘜」？因為林作咁嘅男人，她都可以不離不棄「啃得落」；而他們身邊還出現一位火辣辣的女郎「五索」（Rachel），五索即五子索媽咁解。
最近3人經常合體拍搞笑短片上載到社交平台，事緣是已有5位小朋友的闊太五索，身家「億億聲」，因近年做闊太做到悶，所以曾想參選港姐的她，決定做幕前，不論是女歌手或「女一」都得，才搵林作和裕美合作搞搞新意思！
1) 林作同五索識咗幾耐？
林作：都識咗幾年，我哋喺富豪飯局識嘅，我當然出席係想搵闊太。
2) 點解最近才合作？
林作：佢之前忙於生仔。
五索：我之前喺飯局冇𠵱家咁有錢，最近佢喺飯局見我咁有錢，佢話真係可以做朋友。我變咗富婆，就即刻係咁黐住我。
裕美：佢都係見高拜見低踩嘅人嚟。
林作：佢嗰時冇𠵱家咁威，又多背後嘅支持，熔光煥發，我哋最鍾意同咩人一齊？同叻嘅人喺埋一齊。
3) 有冇向五索埋手？
林作：真係冇，第一我食唔起，第二唔係我個Type，我目標好明確，我養開狗，你話畀隻波斯貓我，唔得㗎！
4) 五索身家有1億嗎？
五索：一定過喇，其實我做咗7、8年少奶奶，真係好悶，所以我想做幕前，因為我大學畢業前係打算選港姐，點知大咗肚選唔到，其實我唱歌唔錯，但啲唱片公司要我練習，要我簽長約，我梗係唔肯，所以林作介紹裕美畀我認識，我覺得幾好，可以好自由咁做歌手，我哋之後會出新歌，新年願望係做女歌手，同埋我一定要做女一。
5) 五索有冇跟過名師學唱歌？
五索：我都跟過幾個名師學唱歌，但最後佢哋話我生咗小朋友入行唔方便，我覺得奇怪，生小朋友同入行有咩關係，所以就搵林作，而佢話裕美喺呢行好熟，咪叫佢幫手。
裕美：佢錄過一啲Demo畀我，我嘗試發畀唱片公司，但冇回音，所以決定自己嚟。其實五索學完唱歌都係一樣，把聲都獨特嘅，不過𠵱家唔興經常練習唱歌嘅人，流行有自己風格嘅，唔需要音調，最緊要係有感情。其實音準每個人都做到，佢嗰種反而難做。
6) 有冇考慮參加《中年好聲音》？
五索：我唔鍾意人哋評擊我，唔鍾意人哋話我唱得特別，因為有好多嘢唔係話你努力就可以，因為一命二運三風水。其實我有時都幾羨慕啲窮人，覺得佢哋好開心。
7) 五索有冇八達通㗎？
五索：冇，我有次喺中環搭港鐵，我喺入面兜咗成個鐘，都唔知出口喺邊，但其實我以前有窮過，我住喺大埔街市附近，呢幾年我發現真係唔可以過番窮人嘅生活，唔識用八達通，唔識搭巴士同地鐵，全部技能冇晒。同埋我𠵱家買嘢係唔睇價錢，每次同另一半鬧咗交，佢馬上會Cut咗我啲信用卡，頭幾日我都冇事，使到第6日時，咁多錢真係畀唔到。我𠵱家住喺山頂，我同個女住一間獨立屋，4個仔住另一邊，生活無憂。
8) 五索嘅感情狀況如何？
五索：我嘅感情狀況係Complicated（複雜）嘅，5個小朋友分別係屬於2位爸爸，第1位爸爸係第1個小朋友，當時我意外懷孕，大住個肚大學畢業，因為好驚做Single Mum，所以馬上結婚，後來先後悔點解同個咁窮嘅人一齊，（佢有幾多身家？）我諗最多一億幾千萬。
9) 第2位爸爸係咩人？
五索：其實我都幾驚訝，冇諗過佢咁有錢，因為佢一開始好低調，林作都認識，佢仲話我醒。其實一路以嚟，啲算命佬都話我大富大貴，一定嫁富豪，而且我生到咁多個小朋友，個子宮好爭氣，就算做咗安全措施都可以有BB。
10) 最近你哋喺社交平台拍跳舞片，又唱歌同做短劇，你咁有錢點解同佢哋拍呢啲片？
五索：因為做咗少奶奶太耐有啲悶，想做幕前畀人欣賞下我個靚樣。
11) 你有冇做過醫學美容？如果有係邊幾個部分？
五索：當然有，由頭到尾都做過，我睇番以前啲相都唔認得自己，但以前都係靚女；至於上圍就由細到大都係大嘅。
12) 五索身材澎湃，上圍級數係？
五索：應都都有G級，其實我介意成日畀人話波大冇腦，林作安慰咗我好多次，佢話顏值同智慧永遠都唔可以並重，我又覺得好似係喎。
林作：波大冇腦對富豪可能係好事，波大有腦先驚！
13) 裕美曾經講過林作從來冇畀過你家用？
裕美：通常我畀佢，冇諗過係咁，當初同佢一起，覺得自己終於釣到金龜，殊不知落咗一條賊船，原來係佢鍾意使我錢，當初報章睇到佢咩牛津畢業，又住半山，阿媽又穿金帶銀，同佢一齊之後確實大開眼界，發覺富人越富，窮人越窮嘅原因，因為富人從來唔用自己嘅錢，係使別人嘅錢，真厲害！
林作：小時候夢想係咬老軟，𠵱家畀我咬到，終於夢想成真，好開心。但講真，我哋呢啲垃圾富二代冇用，五索先識搵真正有子彈嘅對象，我覺得係功力上嘅差別，裕美都要向佢學習。
14) 裕美最近公開同林作嘅性生活，話佢30秒就完事，完全滿足唔到你任何嘅慾望？
裕美：本來係36秒，𠵱家得番30秒。其實好多網民同朋友都問我，點解要同林作一齊？我覺得同林作一齊有個好處，就係我越來越瘦，因為我對住林作食唔落飯，亦令我可以好專心工作，因為如果你有個太靚仔嘅男朋友，你成日想同佢親密，時間就會用晒喺嗰度，同佢就唔使喇，我叫佢返房瞓，唔好搞我，咁我就有好多時間用。
15) 有次林作飲醉酒瞓喺馬路，裕美好想將佢棄置喺垃圾站？
裕美：嗰次我火都嚟，其實佢鍛鍊到我好冷靜，我會盡我職責抬佢返屋企，用狗尿片墊住佢個頭，臭醒佢。
16) 其實裕美你都一表人才，點解唔撇咗林作？
裕美：落咗賊船，我做人從來唔後悔，同埋冇乜時間溝仔，都冇人追我。我覺得做女人一定要自強，做咗有錢女人一次過有10個男朋友都冇問題，你鍾意飛邊個、同邊個一齊都得。
17) 你同林作一齊都煩？
裕美：佢都煩，但就當係養狗，因為你養狗唔Expect佢畀好多嘢你，你只會覺得有時佢都幾頂癮；我屋企有隻狗幾似佢，好百厭，周圍痾屎尿，又破壞晒我屋企啲嘢，但我哋好鍾意佢。
18) 林作有咩吸引裕美？
裕美：其實唔關佢係讀牛津嘅事，我唔鍾意學歷高，反而我鍾意佢一開始係暖男，我同自己講，雖然佢生得醜，但佢好清楚我想要咩，好似唔使我講，佢都知我想食咩，話頭醒尾，但唔知點解佢𠵱家冇晒呢個技能。
林作：我已經完全放棄辯護，我冇所謂，你對我嘅指控，我完全收到晒，我咬得老軟，你話咩咪咩，我係一隻好狗，做狗冇問題，最緊要係搵到好碼頭，我同五索咪醒，搵到另一半係好碼頭，面皮厚係基本，無恥就係無敵，我講完喇，多謝大家！
19) 裕美都嫁富二代？
裕美：咁多年啲風水佬都話我要靠自己。
五索：裕美係衰在個胸，我成日同佢講唔好慳呢啲錢。
林作：我鍾意貧乳。
20) 舊愛麥明詩大肚，林作你羨慕嗎？
林作：你意思係有小朋友嗎？其實我同裕美一件都唔想要。
裕美：因為幾年前我曾經同佢傾過，如果有小朋友，錢銀點分配？佢話AA制，但我呢幾年真係好攰，再生多個冇命。
21) 林作現在忙咩？
林作：都係做啲諮詢嘅工作，好似「五索」呢個名係五索畀10萬蚊我幫佢改嘅，意思係「五子索媽」，所以其實我識到兩位真係我嘅福氣。有時覺得需要努力做嘢嗎？其實𠵱家唔使努力、躺平都可以有咁好嘅生活，簡直係夢寐以求！所以今日我出嚟係晒命，人有嘢唔需要多，嘢都係人哋畀嘅，多謝兩位！
五索：你鼓勵人唔需要努力，真係金石良言！
裕美：我當初都有反駁佢呢句說話，因為我長期博晒老命做嘢，當我睇完佢哋呢兩個見證後，其實我咁努力做咩呢？
延伸內容： 林作裕美堅結婚定真吹水 ? 母親節活動突然跪地斟茶畀阿媽
延伸內容： 遭新何太拒絕 林作鬧爆 : 你慢慢X你老公啦！
延伸內容： 裕美事隔13年出歌《最佳女友的自我修養》重新出發
《東周網》訪談系列節目《星桄伴我心》12月/1月重磅嘉賓：
即睇：肥媽攬屍唱情歌 憶亡夫飲泣 搵胡楓哭訴對話大公開
即睇：「黑妹」李麗霞2段婚姻3次患癌「我其實係一個軟弱女人！」
即睇：《異空感應》阮浩棕演技大爆發 罕談緋聞女友何沛珈 致電某人激動爆喊真情流露
即睇：劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
