發佈時間：15:50 2026-10-24
布偶貓絕育懷疑被切磋膀胱死亡事件連日來受到關注，一名貓主在社交網絡上有關貼文下申訴自己貓貓亦是獸醫診所受害者，然而事件出現羅生門，獸醫診所在社交網站發帖文稱有人顛倒是非，當天獸醫發現求診動物頸上插有縫衣針懷疑受虐待，已即時報警，貓亦已被愛協帶走。
貓主發文投訴貓被插入縫衣針
一名帳號nefertiffliswylitxhj的threads 用戶多次有有關布偶貓絕育死亡事件帖文下留言：
「抵制觀塘xx動物醫院同香港xx動物醫院！佢都一樣咁黑！我隻貓貓死得仲要比妮妮慘，佢比人插入一支逢衣針，spca拉走後活活拖死佢話搶救唔到，但我只貓身體報告正常！而我甚至要半年以上先可以拎番遺體！詳情可以睇我post」
動物醫院發文澄清
今日香港社企動物醫院面書就上述事件發佈貼文：
「到底可以有幾離譜？！自己用「縫衫針」幫隻貓「針灸」，成支針插穿頸椎令佢神經壞死同癱瘓？！
網上顛倒黑白真係唔使成本。」
帖文指，前幾日有一位自稱「中醫」及「中大就讀」的主人帶同拿破崙貓貓到診所求診。當時貓貓到達診所時已經張開口抖氣、低體溫、嚴重脫水，甚至接近完全癱瘓！獸醫檢查發現頸上有一個不尋常、大面積化膿傷口！
帖文俗稱，「貓貓主人一開口就拒絕所有檢查，淨係要求醫生直接開消炎藥比隻貓。我哋姑娘同醫生見到隻貓咁嘅情況，唔做檢查根本無可能可以斷定到係咩事、好言相勸同佢講解咗好耐，好不容易先至說服到佢同意比貓貓做基本檢查同照 X-Ray。」
X-Ray揭發貓頸被插縫衣針
「點知一照 X-Ray，全診所人真係震驚同極度憤怒——貓貓嘅頸椎，竟然直！接！穿！過！咗！一！支！「縫衫大頭針」！！？？？我哋到底睇緊乜嘢？！
頸椎係集中咗全條中樞神經（脊髓）、重要血管同氣管嘅生命重地，長期插住一支針既情況底下。」
「問返詳情先知，原來隻貓 8 月發燒嘔吐睇完街X診所打完皮下水之後，呢個主人就開始自己當醫生。隻貓有傷口，佢就比「中藥」佢食；到隻貓懷疑肺炎開始癱，佢竟然自己上網 Search 中藥同針灸，再用「縫衫大頭針」幫隻貓「針灸」咗咁耐！！
主人簽妥同意檢查文件，照完哂有針之後，主人母親仲打電話嚟話：
「我無話過做呢啲檢查」？
「如果洗錢醫到就話啫，如果洗完錢都醫唔到，我就唔同意洗呢舊錢啦！」
獸醫決定報警同聯絡搵SPCA 處理跟進。帖文指「貓貓靠驚人意志力捱到呢一步，可惜最後警方同 SPCA 接手治療後，都係無力回天……」
本刊正聯絡愛護動物協會了解事件。
