發佈時間：16:00 2024-12-05
人生啊！除了生死，其他都是擦傷。
跟食鹽多過食米的藝人傾談心事，絕對是袋錢入我袋，特別當話題牽涉到生老病死，更有深切的人生體會。
早前剛做過心臟通波仔手術的肥媽Maria，也是從鬼門關逃出來。那天早上，她如常在家中上香拜神、種菜淋花和放狗，誰知忽然感到心口彷彿被重物壓着，很辛苦，開始呼吸不到，全身又流汗濕透。
工人起初以為肥媽悶熱，拿出風扇替她降溫，她心知不妙，馬上拿出放在家中「看門口」的脷底丸服食，症狀雖然能夠舒緩一點，但肥媽絕不諱疾忌醫，馬上趕去醫院求診，經檢驗後得知心臟中間一條血管塞得很嚴重，需要馬上動手術。
「好多時啲人以為搽啲藥油，瞓一陣就會冇事，但一過咗黃金時間，一瞓就會係咁先囉！」
延伸內容 : 肥媽李鼎打大佬｜肥媽好信邪 自爆瞓棺材衰足三年
延伸內容 : 肥媽講性經 教做小女人：性需要都冇，你做咩女人呀？
延伸內容 : 女人不可以不做愛│黃庭桄
肥媽經歷多次生死劫
生死劫，肥媽經歷得多，廿年前患過癌，子宮又生肌瘤，連最愛的丈夫Rick，也在她毫無心理準備下離世。
「嗰朝我先同佢食早餐，之後佢話想入醫院。去到醫院，佢打晒電話俾咁多個孫，逐個傾完偈就話想瞓。突然間佢話見到有好多天使嚟接佢。」
當醫生說丈夫已經斷氣，肥媽不能接受，撲上病床，攬着丈夫的屍體，唱起二人最愛的情歌，良久不願放手。
「人條命，其實唔係想像中咁長。我哋做人好鍾意有一連串計劃，五年後我做乜， 十年後又想做乜，仲有冇命做先得㗎 ？所以我哋真係要活在當下，尤其是我哋呢啲年紀。其實上天對我好眷顧，總之唔好成日同人比較，人哋有幾多身家，間屋有幾大，關你乜嘢事呢？屋幾大，你都係瞓半邊床啫。總之有家人、有朋友喺身邊，心中有愛，已經活得頂呱呱啦！」
感覺到亡夫Rick在身邊
對肥媽來說，除了子孫幾代同堂之外，埋藏在心中的愛，當然是亡夫Rick。
「每次老公回家，都必定鼓勵我開直播，更在每次直播中讚好同埋畀「心心」。」丈夫臨終前，更叮囑肥媽一定要繼續做直播。
「每次開live，我都感覺到佢就在我身邊。我一直當佢冇離開過㗎 ！我一遇到乜嘢問題，成日都會對住空氣講，老公啊，如果我咁咁咁，你話好唔好啊？每次講完，我一定會諗到解決方法，好神奇，我唔係鼓吹迷信啊！」
丈夫在生時，曾在肥媽一次入院治療前向她承諾：「你一定要健康地出返嚟，出嚟我就再娶你。」
肥媽指當她手術後一醒過來，就不禁問醫生：「我幾時嫁得？」經歷過生死劫的肥媽指自己「曾三次嫁給丈夫」，愛得纒綿。
2020年11月4日Rick因末期肺腺癌離開人間後，肥媽深情的寫下悼念心聲：「I will see you in heaven!(我們將會在天堂再見）」 。1999年結婚的情緣，即使隔別天上人間，濃情從來沒有退減。
問肥媽如果他日在天堂再遇亡夫，會講甚麼情話？「仲講？梗係嘴啖先啦！咁耐冇見喎，唔係唔嘴呀嘛？」
《星桄伴我心》訪談節目簡介
快樂有時，感性有時，名人明星為你訴說有深度的故事。《東周刊》全新系列訪談節目《星桄伴我心》，由《東周刊》副社長黃庭桄主持，和城中的名人明星，進行笑淚交融、百無禁忌的深度訪談，論盡家事、情事、天下事，自揭那些年不為人知的秘密，天南地北，暢所欲言，喜怒哀樂，盡付笑談中。
《東周網》訪談系列節目《星桄伴我心》重温11月重磅嘉賓：
黎諾懿夫婦互爆閨房樂事 慶結婚10周年
林保怡提名《金雞獎》影帝 送花冧李珊珊 激罕親揭秘密關係
周吉佩牀前唱歌送別：「爸爸聽到眼角滴淚，先至斷氣！」
梁敏巧哭訴阿媽爛賭輸層樓 悲慘身世揭秘
