樂隊RubberBand成員馮庭正（阿正）的太太尚羚（Sherine），曾是1998年馬來西亞環球小姐冠軍，並曾參加亞洲小姐獲「最上鏡小姐」後，再回流香港發展模特兒及歌唱事業。和阿正育有愛女豆豆的尚羚，雖然要照顧家庭，但對爵士音樂的鍾愛從未褪減。

繼2021年推出的香港爵士界首張 MQA 製式高音質全英文大碟《TWO FOR THE ROAD》後，久違3年，其第三張個人爵士音樂專輯《3 & More》終於面世，並在今日（28日）假藝穗會Fringe Club舉行發佈會，即席獻唱多首新專輯的作品，老公阿正和囡囡豆豆亦有到場支持。

新專輯《3 & More》背後的意義，是人聲與樂器的疊加效果，同時亦代表尚羚與老公及囡囡三人的故事。尚羚說：「今次嘅創作概念，係第一首歌由三個樂器彈奏開始，第二首就有四個樂器咁，一路加上去，所以叫《3 & More》，同時都可以話係代表我、我先生同豆豆，因為呢件事係我哋三個去開始嘅。我記得造完第二張專輯嗰陣，我哋三個喺咖啡店，好隨意咁話會唔會下星期就可以錄音呢，講吓講吓就真係開始咗。」

尚羚更邀得來自香港、日本、荷蘭及法國等世界各地的知名樂手，當中包括爵士樂結他手Jesse van Ruller、爵士音樂家TOKU、長號手Dree Peremans、結他手包以正、鼓手Stéphane Belmondo及Paul Pouwer參與，她表示能夠與多位大師級音樂人合作深感榮幸。唱片製作費龐大，她說是由老公負責支出，坦言花了很多錢感到不好意思，是老公鼓勵她當媽媽後不要放棄追夢。阿正說雖然製作費昂貴，因邀請的全是爵士界頂尖樂手，但製作費比製作流行曲較便宜一點。

《Waltz for Debby》對女兒的不捨和期待

來到第三張專輯，尚羚終於一圓她的待辦清單，在美國推出個人大碟：「收到呢個消息嗰陣，我真好開心，因為美國係爵士音樂嘅發源地。我自己都喺美國上過好多堂，遇到好多好好嘅老師，所以對我嚟講，係一個好大嘅驚喜，你做咗一啲嘢，都好想人哋聽到㗎嘛。如果我喺美國嘅老師都留意到呢張碟，我諗佢哋都會為我感到驕傲。」她透露明年將回到馬來西亞宣傳及演出，另外亦計劃到美國及歐洲，與不同地方的人樂迷分享她的爵士音樂。

新專輯有十首歌，當中有兩首別具意義，《Waltz for Debby》是描述母親對孩子日漸長大的不捨，尚羚說：「11月豆豆就4歲，我好想見證佢每個成長嘅階段，雖然日日陪住佢，但係都覺得佢長大得好快，然後就會好珍惜、好珍惜而家嘅時間。有時我喺屋企執嘢、洗碗都會唱呢首歌，然後豆豆又會跟住我唱，佢音準好好，好得意。」

身為母親的尚羚，直言對歌詞特別感觸，經常會幻想豆豆長大離家：「好怕佢會離開自己身邊，我成日都諗起呢樣嘢。如果有機會，豆豆又真係好鍾意唱歌嘅話，都想同佢合唱，我覺得會幾得意，不過而家太細啦，等佢大啲再睇吓。」

感謝老公支持

除了融入對豆豆的愛，當然還有與老公阿正的甜蜜邂逅，歌曲《A Foggy Day》是最好的寫照。尚羚笑謂老公經常鼓勵她要收錄這首歌：「我自己都好鍾意，因為我係馬來西亞人，香港對我嚟講係外國地方。初初嚟嗰陣，所有嘢對我都係好有新鮮感，但係喺呢個地方耐咗，都會好掛住屋企，甚至乎有個寂寞嘅感覺，直到你遇到一個人，成件事就好Sweet，生命都有意義咗，《A Foggy Day》就係呢個氣氛。」

她指老公由一開始已經很支持自己的音樂事業：「佢會介紹啲朋友畀我識，一齊研究到底要造咩歌，佢一直都陪住我。雖然我次次邀請上台幫我彈，或者同我一齊錄音，佢都唔會，我覺得佢係怕醜，因為佢覺得有咁多大師級喺度，呢件事又唔係佢最耍家嘅，所以我哋未必會有couple version。至於會唔會為我哋呢個屋企造一隻碟呢？我暫時冇咁諗，又其實，一直以來，我都做緊呢件事。」

對於未來的工作計劃，尚羚希望繼續好好唱歌，與不同地方的樂手交流：「無論喺香港定係外地，都希望可以有多啲Live嘅演出啦。雖然香港冇乜爵士樂文化，不過我都留意到香港多咗年青人鍾意爵士音樂，有啲唔同嘅音樂會，又會有啲工作坊，都真係吸引多咗人去接觸，希望多啲人可以試吓聽就好啦。」