時光的流逝，從來停不了，才令光陰特別珍貴。

從事舞台演出28載的焦媛，從沒虛耗時間，以其生命體現「戲如人生」。

「我一直用生命去演戲，呢28年都好似做戲咁，我係盡情去、盡情Enjoy！因為人生係自己嘅，只要唔好傷害到其他人就得。我唔想臨走嘅時候係喊住、有遺憾嘅，要微笑咁去另一個階段，就要盡情Enjoy，活在當下！」

每個當下，48歲的焦媛也醉心於舞台演出。舞台上的她，亮麗耀眼，演活林林總總的角色；舞台下，她則保持少女心，像訪問這天，她紮起Elsa式辮子，附帶一句：「我仲好少女㗎。」

正當想問焦媛要否吃雪糕之際，她接着自幽一默：「平時我對食物冇乜要求，連護膚都冇乜，所以我咁多年都好少演出電視劇、電影，專注舞台，咁唔使太Close-up我吖嘛，哈哈！」

歲月於焦媛臉上留下適當的痕跡，也毋損她根深蒂固的演藝底子，28年來，對舞台演出的熱情，從未減褪，每一次也傾情傾力投入。

「藝術喺我生命嚟講，係好重要嘅，係一種動力、一種生命力，令我繼續行落去。」

儘管時間流逝，盡情享受每一個當下，焦媛更見自若。

以柔制剛

縱橫舞台28年，焦媛的最新作品，是重演音樂劇《鄧麗君》，而焦媛跟本尊的「相遇」，則要在她6歲時說起。

「我係鄧麗君嘅歌迷，因為我爸爸好鍾意佢，所以我細個聽嘅流行曲，就係聽鄧麗君。第1首聽嘅係〈小木馬〉（隨即唱出數句），首歌好似兒歌，令我印象好深刻。

「到我中學參加學校嘅歌唱比賽，我都係唱佢嘅歌：〈水上人〉、〈在水一方〉、〈但願人長久〉，3年都拎冠軍；到第4年，我一冇唱鄧麗君嘅歌，就拎咗亞軍。」

除了緣份，焦媛表示：「鄧麗君嘅聲音係好溫婉，同時都好有力量，就好似做人咁，以柔制剛。」

劇中焦媛於兩小時內，演繹由少女到熟女時代的鄧麗君，說她是一再考驗自己，她則坦言：「做戲，唔係做年紀，因為每一個人成長都唔同，所以我會搵人物嘅內在感覺。」

花了人生超過一半的時間於舞台，焦媛笑言：「我從來都唔當佢係一個Job，呢樣係我嘅愛好、熱情。工作有分開機、熄機；返工、放工，但對於我嚟講，舞台係生活嚟嘅，所以我係24小時On-call㗎！」

戲劇療癒

投入得義無反顧，全因焦媛的起步點，來得純粹。焦爸爸跟媽媽也是藝術家，於內地為京劇演員及芭蕾舞家，惟遷到香港時，為生計未能盡情尋夢。

「我開始做舞台工作，係想完成我爸爸希望喺舞台做到嘅事，發光發亮。後來做做吓，發現原來父母都遺傳咗佢哋嘅藝術細胞俾我。

「不過，喺我啱啱喺演藝學院畢業嘅時候（1998年），佢就離開咗，所以我都有少少遺憾，當我喺舞台上有少少成就嘅時候，佢已經唔喺度。」

於是她於2021年，自編自導自演了舞台劇《約定．香奈兒》，作為送給亡父的禮物。

「部劇係講我同爸爸嘅關係，做嘅時候，係痛嘅，但做多幾場，就有少少釋懷，原來戲劇真係可以療癒嘅。

「喺疫情期間，因為舞台工作停頓晒，我有一排失眠，喺搵方法令自己瞓得着嘅時候，我就諗番起，以前爸爸每晚都會講故事𠱁我瞓覺，記番起佢有幾錫我。」

兒時的記憶，令焦媛開設了其個人Podcast頻道，「因為後來我係因為聽Podcast，克服咗失眠，所以就開始透過Podcast，分享自己嘅生活點滴，好似爸爸以前咁，𠱁其他失眠嘅人瞓覺。」

 

一見鍾情

說舞台，焦媛侃侃而談；說她跟高志森長達21年的戀情，她也打開天窗。

「我覺得有時兩個人相處，困難越大力量係越大嘅，白羊座就係愛字當頭，當時我唔係第三者，而我就係（突轉國語頻道）一頭栽進去，就是要愛這個男人。

「佢（高志森）永遠係我屋企人嚟㗎嘞，仲係我老細、戰友、老師、好朋友。到𠵱家我都係咁講，冇佢當初俾機會，可能我條路就唔係咁行㗎嘞。」

即使二人於2020年分手，焦媛的人生路上並不孤單，她身邊有其愛犬金金相伴，「我對金金係一見鍾情！本身我諗住買狗女嘅，但去到寵物店，見到佢『黑古勒突』喺個Corner位度，嗰一刻我覺得佢好楚楚可憐、好可愛。

「但當時我見佢有行鼻涕，就驚佢有病，所以叫自己唔好咁衝動，於是就喺對面街觀察咗兩個禮拜，睇到佢周圍嘅狗狗都俾人買咗，我就覺得呢個係緣份，一定要買佢返屋企。」

她也有用心經營這「天賜」的緣份，為照顧金金，特別去上堂接受訓練。「因為我唔識點同狗溝通，但我好想佢都好似我咁自律，所以就去搵Trainer上堂。

「𠵱家我唔喺屋企，金金都會自己一個，默默地瞓、食嘢、飲水，然後等我返屋企，真係好乖。我真係當佢係我嘅BB，對佢所有嘢都好上心，所以突然間就明白咗媽媽好多，亦都錫媽媽多咗。哈哈！」

甜蜜蜜

甜美生活，身邊未必需要有個人。

結束20年情後，焦媛早抱不婚主義。

「因為我知道，自己一喺個台度，就六親不認㗎嘞。嗰種集中、嗰種專注，對對方係好唔公平嘅。我衡量過，如果喺結婚同舞台之間做選擇，我都係會揀舞台囉。」

不過，夜闌人靜，難免會覺得空虛覺得寂寞覺得凍⋯⋯

「我又冇㗎喎！我好Enjoy獨處，除咗可以睇劇本、為我嘅角色做功課，我會睇好多戲，特別係謀殺、查案嗰啲。

「我仲要每個星期清潔屋企一次，對我嚟講係排毒、減壓。我好鍾意洗碗，見到啲污糟嘅碗碟，俾我洗乾淨晒，好有滿足感。仲有洗廁所！連清潔劑嘅功效，我都研究埋！」

一個人也可活得精采，獨居的焦媛，有愛犬金金相伴外，還有天台的花卉「同住」。

「唔係啲咩特別品種嘅花，啲種子都係我喺連鎖家品店度買嘅，不過我個天台好好陽光，加埋我都好俾心機種㗎！見到啲花開，我嘅心情就更加好。」

從焦媛說自家花卉的甜美笑容，要明白獨處是藝術，也可Sweet sweet，不是難事。